I Timothy 4:12, 15
Vawlei cungah minung kan rak si hi Pathian nih tinh mi a ngei caah a si. Nangmah na duh caah a si lo, nangmah nai thim mi zong a si lo. Kan i thawk nak, kan sullam, minung kan rak si nak i ai tinh mi, pakhat le pakhat kan i dan nak hna hi Pathian sin long long ah hmuh khawh mi a si. Cucaah nunnak timi hi mah duh ning in nun si lo in, Pathian a duh ning in nun ding hi Pathian nih a kan tinh piak mi a si. Pathian nih nangmah kha hma sa bik ah (Oosa pay) in an zoh peng mi na si. Pathian nih an dawt i, man ngei ngai in an chiah mi na si. Na nun nak ah Pathian nih an tinh piak mi na thieh i, cu na theih mi kha na tuah mi nak in a bia pi deuh mi vawlei cungah a um ti lo. Pathian nih an tinh piak mi theih khawh lo ding in Satan nih an hleng lengmang maw?
Pathian nih an tinh peik mi le tuah seh ti an duh mi zei dah a si! Na thei rih lo ah cun tu zan hrimhrim ah thla cam nak in hal. Pathian rian tuan ti mi hi Pastor le Evangelist pawl hna long khi kan hei ruah ko hnga. A si lo. A ho poh, nangmah hrimhrim Pathian rian tuan tu cu na si. Peknak lei kong le a dang cu chim lo, Nifatin na nun nak ah/ na rian tuannak ah thil hme te in thil ngan pi tiang minung hmai ah siseh, Pathian hmai ah siseh zumhawk tlak te in na nun i, Pathian sunparnak na langhter mi hrimhrim kha Pathian rian tuan cu a si ve cang. Pathian ai tel lo mi nunnak cu ruah chan nak a um lo, ruah chan nak a um lo mi nunnak cu sullam a ngei lo, sullam a ngei lo mi nunnak cu pakpalawng men a si. Ngeihchiatnak ngan pi cu thihnak a si lo, ruahchannak a ngei lo mi, ruahchannak a um lo mi nunnak tu hi a si.
Pathian hi feeling a ngei ve ti mi hi kan philh sual tawn. A ngaingai ti ah cun, Pathian cu a thin a hung kho, a ngeih a chia kho, aa lawm kho, mi zangfah thiam mi, tbt, a si. Na duh mi poh na tuah ah khan Pathian aa nuam lai tiah na ruat maw? Pathian hi (tawinto) a hmang mi da kaw a si cu. Pathian nih nangmah sin in a duh bik mi cu a mah he i hawi komh peng hi a si. Cun zum tu hna i hawi komhnak ah vai i tel ve , va kal ve hi a duh mi a si. Kei mah long te in Pathian ka thangthat kho ko kan ti i pumhnak ah kan kal duh lo mi hi kan palh cem mi thil pakhat a si. Pakhat le pakhat thazang i pek , i hoi komh, Pathian bia i ruah ti hna hi Pathian nih a duh mi a si. Zisuh nih zul tu hna thla a cam piak hna lio ah khan "lung rual te in, pum khat an si nak hnga" a ti. Cun Bible chung ah "pakhat le pakhat" ti mi bia fang hi voi tam pi (50) hrawng kan hmuh khawh ,,,Pakhat le pakhat i daw u, thla i cam piak u, i co hlang u, i u pat
uh, ral rin nak i pe u, i chawnh/biak u, i ngai thiam u, bia i ngai u, i zoh khenh u, etc……hna hi an si, hi nak tam pi a um rih, ka chim hlan in an theih cia mi hna zong a si ko lai. A si na in Pathain bia hi theih sawhsawh long hi ngah lo, Nun pi a hau i, tuah a hau, kan nunnak ah a langh a hau, a Sunparnak kan langh ter a hau.
Hruai tu hna nih tha te in an ruat i, cu cu kan tuah lai, kha kha kan tuah lai an ti tik ah: a hau lo, ka duh lo, ka huam lo, kaa tel duh lo, a herh lo, thawh khuan a tam tuk ti mi te hna hi khrihfa ziaza a si lo i, Pathian nih a duh mi zong a si lo. Minung cu a ho hmanh mah long in a nung kho mi kan um lo, Pathian zong nih a duh lo: Adam kha a mah long in um cu a si kho lo a ti i, Eve a ser piak. Cucaah minung hi social life in a nung mi kan si. A can can ah mi bawm tu kan si i, a can can ah cun mi bawmh mi kan si. Hi hi kan theih a herh ngai mi a si. Nunnak tlam tling ti mi hi Khrih ti lo ah cun, minung nih kan ngeih khawh mi a si lo. Cucaah Pathian kan zumh, kan i bo chan a herh i, pakhat le pakhat tlangrual te in kan ttang tti a herh. Nifatin kan nunnak ah zumhawk tlak mi kan si a herh. Pawl nih Timothy sin ah ca a kuat ban tuk in "Na bia chim na holh rel ah siseh, na ziaza ah siseh, dawtnak, zumhnak le thiannak na ngeih mi ah siseh, a zum mi hna caah zohchunh/tahchunh awk tlak va si tuah. Na hthan nak kha mi vial te nih an hmuh nak hnga cu thil cu tei mak te in tuah lengmang ko hna" a ti mi hi kan ca zong ah, kan mah a kan kuat mi zong a si ve ti hi kan philh lo awk a bia bi ngai mi a si. Cucaah, zei ka tuah poh ah zohchunhawk tlak nun in ka nun awk a si ti hi nifatin kan nunnak ah kan philh lo nak hnga hi ca par te in khuakip, ramkip I a um mi ka senthang unau rual nan dih lak sin ah forthfialnak tlawmpal te ka rak tial.
Pathian dawtnak chungah zumhawktlak te in le zohchunhawk tlak tein tthang chin lengmang ko uh ti hi ka saduhthah le ka thlacamnak cu a si.
Pathian nih thluachuah in pe chinchin ko hna seh.
Dawtnak he,
Pastor Hniang Uk
Kyarinn Baptist Church
Kyarinn
//////////////
No comments:
Post a Comment