Josiah Nun in Cawn awk

2 Siang. 22:2 “Bawipa mithmuh ah a dikmi thil kha a tuah”

Judah Siangpahrang Josiah hi a sual tak mi siangpahrang rak sisehlaw a mawh lo kan ti hnga, zeicahtiah, a pu Manasseh hi Judah siangpahrang lakah a sual bik mi pawl a si: afapa zong khanghthawinak ah a hman, a sual lo mi thisen tampi a chuah fawn. Cun apa Amon zong hi Manasseh bantuk in a sual tak mi si ve hoi. Pathian duhlonak long te a tuah ve (2 Siang. 21:1-22). Josiah cu siangpahrang a si lio kum riat long a si rih tik ah a pa le a pu keneh zulh awk kha a fawi ngaingai mi si. A um nak pongkam, a chungkhar hnazong Pathian a zawmhtlaih mi, a nih sawh mi longte an si tik ah anih zong anmah bantuk in si ve awk hi a fawi tuk mi a si.

Sihmanhsehlaw, Josiah cu apa le apu Manasseh hna lam kha zulh lo in, Bawipa mithmuh ah a dikmi thil kha a tuah i a pu David lam kha a zul, orhlei ah siseh, kehlei ah siseh a pial lo, a ti.

Nifatin kan umnak, rian kan tuannak, kan tlawnlennak kan pongkam hna hi Pathian a thei lo mi, Pathian zei a rel lo mi an tam ngaingai. An mah ban tuk kan si sual lai (an kan influence sual lai) ti hi phan a um ngaingai. Ziah tiah cun, micheu hna cu duhpoh in an um, tangka an ngei, an sinpi peng ko tikah ‘zeiruangah mah ti i kaa sum lengmang mi hi zeidah san a tlaih’ tiah an mah bantukin um ve ko ning tiin kal sual a fawi te. Cucaah, kan innchuangkhar ruangah, kan pongkam ruangah, kan umnak hmun le hma ruangah Pathian sin in lam kan pial ti hi a dik lo, a hman lo nak kong kha Siangpahrang Josiah nun nih a kan cawnpiak mi cu a si. Nangmah le keimah pumpak hrimhrim in duhthimnak kan tuah mi tu kha a si ko. Sual nak tuah tik poh i keimah ka si lo, Satan si ti zong kha a dik lo mi si. Kan pongkam puh ti hna hlah uh sih, pumpak cio in Pathian kha naih peng i zuam hna uhsih. Pathian na naih deuh pohah cun an naih deuh ve lai i, a biathli zong an chimh lai.

Psalm ca tial tu nih “A fekmi na dawtnak nih lam a ka hmuhsak i, zumhawktlak na sinak nih a ka hruai zungzal.” a ti bang in kan nih hna zong nifatin kan nunnak ah a fekmi a dawtnak in lam rak kan hmuhsak sehlaw, zumhawktlak a sinak nih lam kan hruai zungzal ko seh!

Pahniang

Manila, Philippines

///////////////

Nihin ah Laimi (Chin) Nih Kan Herh Mi Lungrualnak

Nithaizing Chin National Day ah laimi (Chin) caah ka saduhthahnak Israel mi hna tuanbia zoh chih bu in sermon toite.

Salm 133

Kan Bible Biakam hlun chung kan zoh tik ah Pathian hi mi phun in rian a rak tuan ti cu kan hmuh khawh. Cu miphun cu Israel mi phun an si i, Israel mi phun ah hin phun 12 ah an i then. Tahchunnak ah laimi lak ah, Hakha, Tidim, Falam, Matupi, tibantuk in a si ve hnga. A bik in Joshua chan ah hin an lung aa rual kho tatak. Moses nih Egypt in a rak hruai hna i Thetse ram car chung ah kum 40 chung a rak hruai hna hnu ah, Pathian nih a kamhmi hna ram an luh lai te ah Moses cu a thi. Kumsau pi a rak hruai tu bik Moses nih a thih tak hna tik ah, an tha a der i, an lung zong a dong pah. Sihmanhsehlaw, Pathian nih Joshua cu a thim. (Joshua 1:6-9).

Pathian nih Joshua sin ah a rak chim ban tuk in a kamh mi cu an doh dih hna i an tei dih hna. Nihin caan ah chim ka duh mi cu, Joshua ca uk chung 22:10-31 kan zoh ah cun, Israel mi pawl zei tluk in dah an lung aa rual ti mi hi kan hmuh khawh.

¹⁰Kanaan ram chung Jordan tivakam hrawng ram kha an va phak tikah Reuben mi hna le Gad mi hna le Manasseh phun cheu nih khan khika ah Jordan tiva pawngah biakṭheng nganpi pakhat an ser. ¹¹Cun Israel mi hna nih, “Zohhmanh, Reuben mi hna le Gad mi hna le Manasseh phun cheu nih Kanaan ram ramri ah Jordan tivakam hrawng ram chung Israel mi hna ta a simi leiphek ah, biakṭheng pakhat an ser,” tiah mi nih an chim kha an theih. ¹²Cu kong cu Israel mi nih an theih tikah Israel mi nih an dihlak in annih kha doh hna awkah Shiloh ah an i pum.

¹³Cun Israel mi nih Gilead ram i Reuben mi hna le Gad mi hna le Manasseh phun cheu sinah cun tlangbawi Eleazar fapa Phinehas kha an thlah, ¹⁴cun amah sinah bawi pahra, Israel phun hna chungin pakhat cio, Israel phun hna chung i a lu a si ciomi hna kha an i tel. ¹⁵Cun Gilead ram i Reuben mi hna le Gad mi hna le Manasseh phun cheu hna sinah khan an ra i annih cu, ¹⁶“ Bawipa mibu nih an ning piin, ‘Israel Pathian cungah nan tuahmi rawinak hi zeidah a si, nihin ah Bawipa kha doh awkah Bawipa zulhnak khan nan pial i biakṭheng pakhat nan i ser hi a sullam zeidah a si? *22:16: Deu 12:13-14 ¹⁷Peor i kan sualnak, cu ruang i Bawipa mibu cungah rai a tlun i a thianh hmanh kan i thianh khawh rih lomi kha, kan i za rih lo maw, *22:17: Nam 25:1-9 ¹⁸cu i nannih i Bawipa sinin i i mer nan i timh? Nannih nih Bawipa cu nihin ah nan doh ahcun, Israel mibu dihlak cungah khan thaizing ah a thin a hung lai. ¹⁹Atu cu, nan ram kha a thian lo a si ahcun, Bawipa puan biakinn a dirnak Bawipa ram chungah khan ra ve u law, kan lakah covo i lak ve ko ngat u; sihmanhsehlaw Bawipa tu cu doh hlah u law, Bawipa kan Pathian biakṭheng hleiah a dang biakṭheng sernak in kannih zong kha amah dotu bantuk ah rel chih kan siter ve hlah u. ²⁰Pekchanhmi thil kongah khan Zerah fapa Akhan cu zumhawktlak loin a um i Israel mibu dihlak cungah thinhunnak a tla a si lo mei? Cun a ṭhat lonak ruangah amah lawng kha a thi lo,’ an ti,” tiah an ti. *22:20: Jos 7:1-26

²¹Cun Reuben mi hna le Gad mi hna le Manasseh phun cheu nih Israel innchungkhar i an lu hna cu an leh hna i, ²² Bawipa cu pathian hna Pathian a si, Amah nih a hngalh dih, Israel zong nih hngal seh. Bawipa kan doh ruang a si ah maw Amah cung i zumhawktlak lo kan si ruangah maw ²³hi biakṭheng hi kan ser i Bawipa sinin a kan pialter a si ahcun, nihin ah hin kan zuah hrimhrim hlah u; cun a cung i khangh thawinak thawinak caah caah siseh, chang thawinak thawinak caah siseh, daihnak thawinak thawinak caah siseh, kan tuah a si ahcun Bawipa hrimhrim nih kan cungah phuhlamnak cu tuah seh. ²⁴Cu tuahnak ding caah kan tuahmi a si lo, kan tuahnak cu hmailei ah nan fale nih kan fale cu, “ Bawipa Israel Pathian he zei tlaihnak dah nan ngeih? ²⁵Zeitintiah nannih Reuben mi hna le Gad mi hna, nannih le kannih karah Bawipa nih Jordan cu ramri ah a ser ko; Bawipa chungah nannih cu covo nan ngei lo,’ an ti hna lai ti kan phan caah kan tuah cu a si. Cuticun nan fale nih kan fale cu Bawipa biak kha an ngolter sual hna hnga. ²⁶Cucaah kannih nih, ‘Khangh thawinak caah si loin le raithawinak caah si loin, ²⁷kannih le nannih karlak ah, kan hnu i kan tefa hna karlak ah biahngaltu a si i Bawipa rian cu kannih nih amah hmaika ah kan khangh thawinak le raithawinak le daihnak thawinak in kan rak ṭuan ve tinak caah biakṭheng pakhat ser u sih; hmailei ah nan tefa hna nih kan tefa hna cu, “ Bawipa chungah covo zeihmanh nan ngei lo,” an ti sual hna nakhnga lo,’ tiah kan ti. ²⁸Cun mah hihi hmailei ah kannih sinah siseh, kan ciruang hna sinah siseh, chim a si sual ahcun, ‘ Bawipa biakṭheng a keep hi zohhmanh u, kan pupa hna nih khangh thawinak caah si loin le raithawinak caah si loin, nannih le kannih karlak i biahngaltu si dingah an rak sermi hi,’ tiah kan chim lai tiah kan ruah. ²⁹ Bawipa kan Pathian biakṭheng a puan biakinn hmai i a dirmi hlei in, khangh thawinak le chang thawinak le raithawinak caah biakṭheng dang sernak thawng in Bawipa lam in nihin ah pial le Bawipa doh cu kan ruat naisai lo!” tiah an ti.

³⁰Tlangbawi Phinehas le amah sinah a ummi mibu bawi hna, Israel miphun an lu cio hna nih cun, Reuben mi hna le Gad mi hna le Manasseh mi hna nih an chimmi bia kha an theih tikah, an lung a lawm ngaingai ko. ³¹Cun tlangbawi Eleazar fapa Phinehas nih Reuben mi hna le Gad mi hna le Manasseh mi hna cu, “ Bawipa cungah rawinak nan tuah lo caah, Bawipa cu kan lakah a um, tiah nihin ah kan hngalh; Israel mi hna cu Bawipa kut chungin nan khamh cang hna,” tiah a ti hna.

A pakhatnak ah,

Pathian kha an ţih i lungrual tein an um.

Reuben mi hna le Gad mi hna le Manasseh phun cheu a si mi hna nih Jordan tivakam ah Biaktheng pakhat (Pathian duh lo mi) an ser tiah thawng an theih tik ah Tlawngbawi Eleazar fapa Phinehas le Israel miphun pakhat cio i upa a lu bik pawl an thlah hna. Khah, Pathian duh lo mi thil nan tuah cang hih, tiah va chim ding ah an kal ter mi hna an si. An mah le miphun tenau cio i upa pawl i ton nak le kan mi pawl hi Pathian sin in lam an pial sual maw ti mi ceih hmai nak an ngei lengmang. Zei tluk in dah an lung aa rual ti cu hi ka ah hin kan hmuh khawh mi si. Pathian duh lo mi thil kan tuah sual lai hih tiah an i ralring lengmang. Zeicahtiah cun, Akhan pakhat sual ruang ah zei hmanh a thei lo mi a chungkhar dih lak le a saram vial te tiangin vawlei nih a dolh dih hna. Kan nih Laimi (Chin) hna zong nih kan i zoh chunh awk ngaingai a si. Chin ti mi tang ah hin (khoi ka kan phan poh ah) mah le pengtlang le khua min cio in kan um dih hna i, upa tete zong kan ni thiah cio, kan ngeih cio hna tik ah, hi Israel pawl he hin kan i lo ngaingai ko. A bau mi pakhat cu lungrual nak te hi kan chambau deuh rih hnga maw tiah ka ruah…..

A pahnihnak ah

Pakhat le pakhat an ni chimh hrin i an thin zong a hung lo.

Tlawngbawi Eleazar fapa Phinehas le Israel miphun pakhat cio i upa a lu bik pawl nih, “zei ruang ah Pathian duh lo mi thil nan tuah, Peor i sual ruang ah Bawipa mi bu cung ah rai a tlun i a thenh hmanh kan i thenh khawh rih lo mi kha, kan i zaa rih lo maw, cu i nannih i Bawipa sinin nihin i i mer nan i timh?” tiah an va sik hna. Miphun dawt nak thin lung an ngeih mi hi zoh chunh awk tlak ngaingai an si. Kan nih hna teh pakhat le pakhat kan i chimhhrinh tik ah, ri hlah uh, ding hlah uh kan ti tik hna ah kan thin hna a hung ton maw? Israel timi tang ah hin miphun phun 12 an um i phunkhat le phunkhat lungrual tein an i chimhhrinh ban tuk in, kan nih hna teh Chin timi tang ah hin pengkhat le pengkhat, khuakhat le khuakhat zawnruahnak, chimhhrihnak kan ngei hna maw? Chimhhrinh kan ton tik ah teh kan thin hna a hung sual maw? Remh khawh ti lo dirhmun tiang hna kan phan sual maw? Reuben mi hna le Gad mi hna le Manasseh phun cheu a si mi hna nih cun, chimhhrinhnak an ton tik ah an thin a hung lo i, Pathian duh lo mi biaktheng kha kan tuah lo, a mah Pathian caah kan rak tuah mi tu kha a si tiah ţha tein an nawl hna. Cu tik ah , an mah zong an thin hung lo i Israel hruai tu pawl zong lung lawm tein an kir than. Hi ka i kan hmuh khawh mi cu, zeitluk in dah pakhat le pakhat, phunkhat le phunkhat an ni pehtlaihnak hi a tluangtlam ti mi hi asi. Kan nih hna zong Chin timi tangah hin pakhat le pakhat kan i pehtlaihnak a tluangtlam awk, lungrual tein kan um awk a si ti mi kha hi Bible cacang nih a kan hmuh sak ţhan.

A pathumnak ah

Miphun pakhat le pakhat an ro covo tianghmanh cheuh ve duh nak thin lung an ngei.

Tlangbawi le upa hruaitu pawl nih an ti mi hna cu, “Nan ram a thian lo ruang i Bawipa duh lo mi nan tuah ding nak cha cun, kan lakah ra uh law kan covo i lak ve ko hngat uh,” an ti mi hrimhrim hi kan zoh ah cun, zeitluk in dah phunkhat le phunkhat, khuakhat le khuakhat an i daw ti cu kan hmuh khawh. Zerngeihnak thinlung zong an ngei lo hlei ah an ngeih mi ro (an ram) tianghmanh cheuh ve duh nak thin lung an ngei. Pathian kha an ttih i, an miphun ningpi in Pathian duh lonak thil kan tuah sual lai ti kha lungrual tein an ni ralring peng i pakhat le pakhat chimhhrinhnak zong an ngei peng hna. Hi thin lung an ngei mi hna hrimhrim hi aa dawh tuk mi thinlung put le kan nih nih kan i zohchunh awk thinlung put bak si.

A toinak in kan chimh than ah cun,

Pathian dawtnak tang ah,

1. Lung rual nak an ngei

2. A hmanmi thinlung put an ngei

3. Miphun zawnruahnak an ngei.

Salm 133 ah a ti bang in, an nih Israel unau rual miphun phun 12 pawl cu lungrual tein an um i an ni nuam tuk hna, zeitluk in dah a that i a nuamh ti mi kha an nun nak hrimhrim nih a rak tep. Kan nih Chin mi hna zong nih tep ve cang uh sih law, tep caan zong a cu cang ti hi nihin ah kan Bible nih a kan chimh mi cu asi I, kan nih Chin mi hna zong nih kan ngeih awk a herh ngaingai mi thinlung put cu an si ko lo maw tiah nihin Chin National Day ah Pathian Bia he tlawmpal forhfial nak ka vun langhter.

Pathian nih thluachuah in pe ko hna seh!

Pastor Hniang Uk

Manila, Philippines

Josef Nun in Cawnawk

Gen. 39:2 “ Bawipa nih Josef cu a umpi i a caah thil kalning a tluang dih ko.”

Nihin ah, 'Pathian nih cun Thlarau Thianghlim in a kan um pi peng ko si' kan ti ko lai. Asiko, a hman ko! Asinain, cu an umpi nak kha Amah ţihzah buin na tuah tuan nak he na langhter maw? Kan umtuning kha Pathian nih umpi lo mi bantuk hna in kan um sual maw? Zeitindah kan langh ther? Josef nih cun Bawipa nih a umpi nak kha Amah ţihzahnak le dinfelnak in a langhter.

‘Suffering is part of life’ an ti i, vawlei pumsa kan nunnak ah hin harnak hi cu aa tel chih mi asi cang anti. Jesuh zong vawlei cung pumsa nun in a rak tlawnlen lio ah, a ti hal, a paw tam, a thin hung, a ţap, har sa ngai in vailamtah a phorh, hlinghluchin an khuh, vailamtah ah an khenh chih..tbt..

Cucaah, "Pathian nih um pi" ti tikah hin harnak kan tong lai lo ti nak cu asi hrimhrim lo. ‘Josef cu Bawipa nih a um pi’ titik ah a nun kan zoh ah cun harnak a tong ngaingai: a nu tuan tein a thi, a u le nih an rem lo, khur ah an thlak, an zuar, sal a tuan, a si lo piin an phuh i thong a tla, a pa nih a thi cang tiah a ruah, a u le nih a um nak zong an thei ti lo, hi dir hmun in kum hleithum chung a tuar. Hibantuk ah Josef caah hin zeitluk in dah lunglen awk asi, zeikhuadah a ruat hnga, Pathian a thangţhat peng ko hnga maw, a mawtchiat lai dah, vawleicungah mi vanchia bik ka si a ti ko hnga lo maw tibantuk hi na ruat bal maw? Duh awktlak a um lo mi hi vialte dir hmun ah hin ‘Bawipa nih Josef cu a um pi’ ti asi. Pathian nih Josef cu nunnuamhnak (easy life) a pe colh lo, kum hleithum chung a tuar hmasa. Asinain, Josef nih Pathian a mawtchiat (complain) ti mi kan hmu bak lo.

Nihin ah ngeichiatnak na tong maw? Vawleicung i vanchia bik ah tah naa ruat sual maw? Thong na tla maw? Na tuah lo mi pi kha sual ah an in puh sual maw? Zeituah awk hngal lo tiang in lungrawknak hna na ngei sual maw? Josef a tuar mi tluk hmanh kan tuar rih lo kho men. Bawipa nih a ka umpi, a ka theihpi i a ka tuar pi ve ko ti hi philh hrimhrim hlah uhsih. Josef a nunnak in thazang la hna uh sih. Josef cu zei dir hmun (thonginn, sal tuannak) a phan zongah Pathian ţih zah buin le dingfel tein a um a tuan peng i a donghnak ah cun Egypt ram uktu ah a cang. (Gen. 41:37-44). Pathian a ţihzah mi kan si ah cun Pathian nih a kan zoh sawhsawh lai lo, harnak zong a kan tuar ter peng lai lo, Josef bantukin a theipar zuun can, thil kal ning a tluang dih can a um ve hrimhrim ko lai.

Josef bantukin Pathian a ţihzah mi le Pathian nih a umpi mi kan si peng nak hnga Bawipa nih thluachuah in pe ko hna seh!

PaHniang

Manila, Philippines

///////////////////

I sum nak

I Thess. 4:4“nan pum uk kha nan thiam awk a si,..nan thianter awk le nan upat awk a si”

Fidi, fitlaw pawl hi an min an vun thang bak ah hin cun, hlan lio ban tuk in an vak, an chuak ti lo, zeisi lo in mibupi sin ah an lang duh lem ti hna lo, kan min than nak a tla sual lai ti an phang. 2000 hrawng i Zomi Theological College, Falam ah bible siangin ka kai ton ah hin fitlaw Thet Mon Myint hi dawr a hngak ton i thil cawk pah in kan hei chawnh pah lengmang ko. Nihin ah cun Yangon i an inn hmai in bawh len zong ah a mui hmuh khawh dawh si ti lo.

Yangon sianginn ka kai lio ah ka hoi pa Tan Jar nih fitlaw Khin Lay Nwe te inn ah a ka len pi i, an ka chim mi cu, “Khin Lay Nwe cu video thlak ding ti lo ah cun a leng ah a chuak bak lo,”an ka ti. Ziah ka ti hna i, "mi nih a leng ah hmuh lengmang ah cun an uar ding tluk in an uar ti hna lo” an ka ti. A min than nak a tla sual lai ti a phang!

Ka hoinu Kipte nih a ka chim bal mi cu “Sung Tin Par nih, ‘ka ngai bik mi cu hlan lio (hla tap phel kaa chuah hlan) i ka hoi le he inn hmai ah, veranda hna ah duhpoh in laphehtoh hna kan ei pah in hla kan au, kan sa mi hna kha ka ngai tuk ton ee’ a ti” tiah a ka chim bal. nihin ah cun aa sum cang, a min than nak a tlau sual lai ti a phang!

Voikhat ah Lay Phyu cu lampong i an zawr mi butikyaw kha ei a duh tuk nain, vok thau in reu mi hna si sual lai a ti i a ei ngam bak lo an ti. A aw ţhatnak, san nak hna a rawk sual lai ti a phang!

Khua a ka ruahter ngaingai mi cu: vawleicung minthang, cansau a daih lo mi, zungzal nunnak lei zong ah a nguh lo mi ruang hmanh ah hin tuah an duh mi an i sum, ei an duh mi an i sum, chuah/vah hoi le he i nuamh an i sum, inn bak ah in i khumh i video thlak tik ah chim ding mi bia hna kha heh tiah by heart in ngah ding in an i zuam hi mu…….

Nang le kei, vanram deng tiang min a thang ve mi, Thlarau in hrinthan kan si bak ah vancung in van mi hna nih hla sak piak mi, vanmi nih lawmh pi mi, kan minthannak zong zungzal tiang a nguh ding mi nih zeidah kan i sum ve? Tuah kan duh mi, ei kan duh mi, din kan duh mi poh zeihmanh i sumnak um loin Pathian duh nak he aa kalh mi hna kan tuah thiamthiam maw? Kan thinhunnak teh kan i sum maw, mi lehrulh kan duh nak teh kan i sum maw? Fak deuh in khua ruat tuah uh sih! Khrihfa kan sinak ah i biatak deuh cang uh sih. Pathian hi a ţha tuk lei lam khi si i, kan mah tu hi ‘a ka ngaihthiam ko lai’ ti phun in kan luan tuk ton. Khrih aiawhtu, Khrih ca i lamkaltu, Khrih zultu kan si i kan i sum awk zong a tam ngaingai ko.

I Thess. 4:4, 6, 7 ⁴Nan dihlak in nan pum uk kha nan thiam awk a si, nan pum cu nan thianter awk le nan upat awk a si, ⁶Ahohmanh nih nan u nan nau kha an pawcawmnak rian ah hleng in deh hna hlah u, ningcang loin lemsoi hna hlah u; cu bantuk ṭhat lonak a tuahmi cu Pathian nih dan a tat hna lai tiah kan in chimh cang hna i fak piin ralrinnak kan in pek cang hna. ⁷Pathian nih sualnak tuah lengmang dingin a kan au lo, mithiang si ding tu ah a kan auh.

Khrih duh nak lam kha a zul mi kan si nak hnga Pathian nih thluachuah kan pe ko seh!

Pa Hniang

Manila, Philippines