Kan ton mi thil zeitindah kan lehrulh ton?

Luke 6:35 “an cungah khan ṭhatnak tuah u”

Nifatin kan nunnak ah kan ton mi thil pohpoh hi, kan holh in (or) kan tuahsernak in lehrulh (response) peng a si. Ţhatnak in lehrulh khawh asi, daitein umpiaknak in lehrulh khawh asi, cun ţhatlonak zong in lehrulh khawh asi. Zeitindah kan lehrulh ton i, zeitindah kan lehrulh lai ti cu kanmah le duhthimnak kha asi ko lai. Bible nih fiangtein a chimmi cu, “mi nih a tuh mi cu a zun ko lai” a ti (Gal. 6:7)

Rev. J. Stuart Holden cu ral kap a tlak lio i ral chung an um lio ah, zan khat cu a hawipa nih a khuk aa bil i thla a cam. Cutikah, “miral chiapa, zei thla dah na cam len” tiah thla a cam mi a hawi pa cu kedan a cheh. A thaizing ah a hawipa nih cun a chehnak mi a kedan te cu thiang tein a ţawl piak i a ihkhun tang te ah a vun chiah piak. Ţhatnak in a lehrulh. Cubak nih cun, J. Staurt cu a lungthin a kekkuai, a lung aa thleng i nihin ah cun Pastor minthang pakhat ah aa chuah cang ti asi.

Ka hawi pa James P. Bik cu zingka tein a tho i, mirang ca ka aw chuah hi ţha deuh seh tiah, aw chuah in mirang bible a rel ton. A um ţi mi a hawi pa nih, ‘mi thawh hlan ah hna na chet tuk’ tiah a sik. Aw chuah ti lo in a rel ţhan. Daiten um piak nak in a leh rulh. Nihin ah James cu khua le ram, khrihfabu caah Pathian mihman bak asi ti cu, keimah pumpak in tampi ka hmuh khawh.

Jesuh nih cun a thah tu pawl caah, “ka Pa, ngaithiam ko hna, zei kan tuah ti an thei lo” tiah thla a cam piak hna. (Luke 23:34)

Steven zong lungin a cheh tu hna caah thla a cam: A khuk aa bil i fak piin a au i “Bawipa, hi sualnak hi an cungah khing hlah,” tiah a ti (Lam. 7:60)

Nihin ah ral zong kan ngei lo kho men, lung in cheh tu, a kan thah duh tu zong kan ngei lo si ko lai. Asinan, khi pawl thengtheng kha ti duh mi si lo in, nifatin kan ton mi thil pohpoh hi kan duh zong duh lo zong ah, kan holh in maw kan tuahsernak in dah lehrulh peng a herh mi asi. Cutikah kan nih teh kan ton mi thil poh: kan riantuannak ah, kan boss le cungah, kan hawi le sinah, kan saya/mah te cungah, kan pongkam kan um nak poh zeitin dah kan lehrulh ton/lai?

Rick Warren nih “vawleicung kan rak chuah hi Jesuh i tehte (witness) ţha si ding in asi” a ti bang in nifatin kan nunnak ah Jesuh nih a kan cawnpiak mi nun, Pathian fa kan sinak kha kan langhter a herh ngaingai. Cutikah, mi nih Khrih zultu, Pathian fa kan sinak kha kan nun ah an hmu lai i, cucu kan nun in a Bia kan phuan nak le a tehte kan sinak kan langhter mi cu a si. (Luke 6:27-36 hi rel hrimhrim hna uh sih)

Kan tonmi thil poh hi Pathian duhnak hal in le ţhatnak lei in a lehrulh kho tu kan si cio nak hnga, Pathian nih thluachuah rak kan pe cio ko seh!

Pahniang

Ka Nu ka lawmh ter maw?

Phungthlukbia- 23: 25, “Nangmah an hringtu cu lawm tein um seh”

Nu le an sunlawinak kong cu hmurkaa in chim khawh a si lo. Ho sin hmanh in kan hmuhkhawh lo mi dawtnakvel kha anmah sin in kan hmuh. Zeitikhmanh ah, ‘ka fa le sinin ka ngah ţhan te lai, a ka cham ţhan te lai’ ti mi ruahnak in a kan zoh khenh bal lo. A tianghlim taktak mi dawtnak in a kan daw tu an si. Asinain, hinak in thuk deuh le sangdeuh in a kan daw kho tu le a kan daw pengtu Pathian a um ti mi hi philh hrimhrim hlah uh sih. Zeicahtiah, Bible chungah, Isaiah- 49: 15, “Nu nih a fa a philh hnga maw? Daw loin a um kho hnga maw? Nu nihcun a philh hmanh a philh ko hnga, sihmanhsehlaw kei nihcun kan philh hna lo” a ti. Cun, II Siangpahrang 7 ah kan zoh ahcun mangtaam ruangah an fa le sa a ei mi nu pahnih kong kan hmuh. Minung kan sining a langhtertu asi ko. Minung hi a mah nunnak ding ahcun midang an thih ah a zei a poilo mi tampi kan um, mah fa le zeiti an va um zongah a poi ah a chia lomi tampi kan um ko. Sihmanhsehlaw kan Pathian nihcun kei nihcun kan philh hna lo a kan ti. Cu tluk dawtnak sung, nu le dawtnak, a saangtuk kan ti lengmang minaak sang chinchin in a kan dawtu Bawipa kan ngei. Kan philh hna lo a kan titu hi, a sawhsawh a si lo. Van le vawlei zeizong vialte a sertu asi. Zeizong a hngal i khuazei ka hmun poh ah a ummi a si. Nu le hna upatnak caan kan phak caan poah ah zeitik hmanh ah a kan philhlo tu Bawipa a dawtnak ruat than usih. Minthang Paul Tillic nih a nu a thih kate ah a farnu ca a kuat i, a tialmi cu, “ka nu a thih hnu cun inncungkhuh aum lomi tangah a ummi ka lo”, a ti. Nu le cu inncung khuh bantukin a kan khuh tu an si. Nu le cu inn a lum ter tu bak an si fawn.

Hringtu nu le hna ni (Mother’s Day) ah hin kan nu le upat kan pek hna cu kan mithmuh Pathian an si caah a si. Nu le hna kan dawt hna le upat kan pek hna cu sertu Pathian upat kan pek le kan dawt a si. Kan mit hmuhmi kan nu le hmanh kan dawt khawh hna lo ahcun mit hmuh lo Pathian cu kan daw taktak kho hnga maw? Ka nu ka dawt ah cun zeitindah ka um lai? Kuli hlawh le tangka kuat le hei cawm long hi asi rih lo. Hi nak pinlei pi ah siter a kan duh mi a um rih.

Bible nih “nangmah an hringtu cu lawm tein um seh” a ti. Cucaah, a kan hringtu kan nu le kan lawmhter asiahcun Pathian zong aa lawm ve ti nak asi. Zudin, sa ei, duhpoh in tlawng leng le hmuitinh mi ngei lo in um sawh, vakvai sawh nak nih ka nu a lawmh ter hnga maw? A kan hringtu kan nu le cu zeitindah kan lawmh ter lai? ‘Nifatin ka tuahser mi pawl hi ka nu aa lawm hnga maw’, ti hi ruat lengmang hna uhsih law, nihin nu le ni longah si lo in nifatin kan nunnak ah nu le a lawmh tertu, Pathian a lawmhter tu nun kan ngei khawh nak hnga Pathian nih thluachuah rak kan pe hram cio ko seh!

Pastor Hniang Uk

Manila, Philippines