Minung ruah khawh nak leng in

Isaiah 55:8 “Ka ruahning cu nan ruahning a si lo, ka thil tining zong nan thil tining he an i khat lo”

2010 April thla ah Malaysia ah ka kal. Ka kir lei ah Singapore Air-line ka cawk caah Singapore transit a si i Singapore ah nazi pa hnih hrawng aa din. Cu ah cun ka thil an thlen sual si men lai, Manila ka phak ah cun ka thil cu ka bawh lengmang nan a um ti loh, ka thil cu a tlau ko. Pathian, ziah zeitin dah si hnga, tiah thla ka cam, a thaizing ka va hlat than, a ngah hlei lo, zarhhnih rak kan hngak chung ti si. Pathian, zei na duh nak dah si tiah ka mawtchiat cang. Sinan, thlakhat rauh hnu ah an ka au than i; na bag kan hmu kho bak ti lo, na thil pawl zeizat man dah si lai dollar in kan in liam lai an ka ti. Dollar 150 man hrawng si lai tiah ka ti hna. Ka thil tlau mi cu bag fate si i laphehtoh, coffee, suantam..tbtk…ka chiah mi 5 kilo te khi si. Dollar 300 kan in liam lai, na lungtling lai maw tiah an ka hal. Tling ka ti hna. Cu ti cun, dollar 300 cu ka ngah. Malay um mi ka u le cu, Laphehtoh, coffee pawl ei din nan ka cawk piak mi kha a tlau dih tiah ka chimh hna. Ka hoi nu May thla ah Malay ah a kal i ka u le nih ka thil tlau mi pawl cu a thar in an ka cawk piak than, an rak ka kuat than colh ko! Dollar 300 ka ngah hlei ah, ka thil tlau mi pawl cu ka u le nih a thar in an ka kuat ţhan ko. Malay ka rak kal lio ah hin dollar 300 bak leiba ka ngei. Cu vial te kha cham piak ding in Pathian nih khua a rak khan, a rak tuaktan cia dih mi kha ka rak thei lo. Pathian min thangthat in um ko seh! Ka bag a tlau lio i Pathian ka rak mawtchiat ning le thla ka rak cam ning ka ruat than tik ah ka ning a zak ngaingai, Pathian sinah ngeihthiamnak ka hal ţhan.

Cucaah, Pathian cu minung kan ruahkhawhnak leng lei in a ţha bik in khua a kan khan piak tu a si peng. Isaiah 55:8 chung ah Pathian nih “ka ruahning cu nan ruahning a si lo, ka thil ti ning zong nan thil ti ning he an i khat lo,” tiah a ti ban tuk in, a rak si hrimrhim ko. Zeizong vial te hi a ţha bik in a rak tuaktan dih, khua a rak khan dih tak ko ti hi kan nun in fian khawh i zuam hna uh sih. Rom 8:28 ah “Pathian nih hin, amah a dawmi hna caah le amah nih aa tinhmi ningin a kawhmi hna caah cun, zeizong vialte hi a ṭha lei ah a serpiak ko hna ti kha kan hngalh” a ti ban tuk in Pathian nih khua a kan khan piak mi hi a ţha bik a si lengmang ko, suaisel awk a um bal lo. Zeipoh kan nun ah a rak chuak mi kha “Amen” pek khawh i zuam hna uh sih. Khatlei in ka theih awk belte cu, kan tuah ning kan zumh ning in kan ton ve, kan zun ve lai ti kha cu kan philh lo awk a tha. Kan mah tu hi zumhawkthlak tein um kan i zuam peng a hau mi si.

Pastor Hniang Uk

Manila, Philippines

Thla kan cam mi kan nun (kan tuah sernak) nih a zulh maw?

Sam. 5:3 “na sinah thla ka cam tawn i na ka lehnak kha ka hngah tawn”

Voi khat cu (2009 ah) ka hoi le pa sarih he thlacamnak tlang ah kan kal. Kan riah nak hmun le thla kan cam nak kha minit pa riat hrawng ke in kal a si. Zing khat cu ruah a sur ciammam i kan riahnak hmun ah kan kal kho ti lo, kal kan duh tuk cang. Kan hoi pa pakhat nih ruah a han nak ding ah thlacam uh sih a ti i, kan dih lak in kan kut kan i tlai i ruah han nak ding ah cun thla kan cam. Kan cam dih, “Amen” kan ti bak ah, kan hoi pa James ti mi pa nih, “kei mah plastic angki pei kaa hruk ko cu, ka va tli lai i nithong ka va lak lai” tiah a ti i kan dih lak in “aw, va la ko” kan ti dih. Nithong cu a va lak i a rak phanh ţhan hlan deuh te ah ruah cu a han ko. Thla kan cam hnu ah cun tlawmpal tal kan hngak ding a si ko nan, kan hoi pa tu cu nithong kan va lak ter. Thla kan cam i kan zumh kan ti zong ah kan tuah sernak nih a zulh ti lo, nithong tu cu kan va lak ter. A ngaingai ah cun Pathian nih ruah zong a han ter taktak ko!!

Malaysia visa apply ka tuah lio ah, visa ngah ding in thla ka cam. Sinan, air-ticket booking ka tuah lio ah, Malay visa ka ngah lo sual ah tiah, Singapore visa ka rak lut pah lawlaw lai ka ti i Singapore air-ticket booking ka tuah chih colh. Malay visa cu ka ngah taktak lo, voitam tuk na kal cang a ka ti i a ka pe duh ti lo. Malay visa ngah dingin thla ka cam nain, visa apply ka tuah hlan pi in, ka ngah lo sual ah tiah Singapore air-ticket kha booking ka tuah cia cang. Thla ka cam cang, ka zumh ka ti zong ah ka tuah sernak nih a zulh ti lo. Nihin khrihfa kan nunnak ah hi ban tuk hi kan tam theu lai tiah ka ruah.

David Siangpahrang pa nih cun, “na sinah thla ka cam tawn i na ka lehnak kha ka hngah tawn” (Sam. 5:3) a ti. Kan nih teh kan hngah maw? Minit pa 5 te hmanh hngak lo in kan hawi pa James nithong kan va lak ter mi te hna, Malay visa hmanh apply ka tuah hlan piin ka ngah lo sual ah tiah Singapore visa tuah nak caah timh tuah nak ka ngeih cia mi hna nih hin ka thlacamnak kha ka tuah sernak he a kal ţi ti lo. Thla kan cam mi hi a phungmen (tabawtayaa) in kan cam ding a si lo. Thla kan cam mi a dang, kan tuah sermi a dang si ah cun a ngah lo, an kal ţi peng hau mi si. Kan thlacamnak, kan zumhnak le kan nun kan tuahsernak a kal ţi peng khawh nak hnga Pathian nih thluachuahnak kan pe hram cio ko seh!

Pastor Hniang Uk

Manila, Philippines

Pathian thil ti ning hi kan lung a tlin lo ah cun?

Rom 8:28 “…….zeizong vialte hi a ṭha lei ah a serpiak ko hna……”

Khrihfami nih kan ti ton mi cu Pathian nih kan caah a ţha bik in khua a kan khan piak ko ti hi cu kan chim ton. Asinan, kan duh lo mi le kan ruah lo piin thil kan ton tik ah kan tuar kho ngaingai ton lo can a tam.

Siangpahrang Hezekiah cu Pathian nih “na dam ti lai lo, hi vial hi na caan cu si cang ko, thih awk ah i tim cang ko” tiah profet Isaiah hmang in a va chim tik ah, Hezakiah nih cun a celh bak lo i, vanpang lei ah khan aa mer i thla a cam, lunghno ngai in a ţap. Cun, Pathian nih na thlacam cu ka thei i na mitthli kha ka hmuh, kum hleinga kan nun ter rih lai tiah profet Isaiah hmang in a chim ţhan (2 Siangpahrang 20:1-6). Pathian nih, hi vial hi na nun can cu si cang ko seh a ti mi kha a lung si lo i thla a cam ţhan tik ah, kum 15 a chap than, a phi chuak cu a ţha ngai mi a lo ko. Sinan, hi kum 15 chungah hin fapa Manasseh a chuak, Manaseeh nih cun Judah cu kum 45 a uk. Sinan, Manasseh hi Judah siangpahrang lak ah a sual tatak mi a rak si, a fapa tiang raithawinak ah a khangh. ( 2 Siang. 21; 2 Chan. 33:6). Cun hi kum 15 chap mi kum ah hin Babilon nih Judah kha nganhta mi zeihmanh um lo in an lak ding nak kong kha a chim, zeicahtiah, amah nih Babilon lamkal tu hna kha zeihmanh nganhta mi um lo in a hmuhsak hna caah si (2 Siang. 20:12-19). Hi vial te hi a chap ţhan mi kum 15 chung i a phi chuak pawl an si.

Malaysia hi voi thum ka kal cang. A voi thumnak ka kal lai ah hin thla ka cam mi cu, “Malaysia visa apply ka tuah lai i kal seh ti na ka duh ah cun visa hi rak ka ngah ter ko” tiah thla ka cam. Visa cu apply ka tuah i ka ngah lo. Pathian nih ka kal ding a duh lo kha a si ko cang. Sinan, lam dang ka kawl i Singapore lei in Malaysia ah cun ka kal thiamthiam. Zei dah cang? Ka rak kir lei ah ka bag pakhat a tlau!

Hezekiah siangpahrang pa a nunnak in fiang ten kan hmuh khawh ban tuk in, Pathian sinah thla kan cam i kan caah a ţha lei kap in a phi a kan pek hnu ah kan lung a tling lo i a phunphun in kan cawlcangh rih, kan hal chih rih a si ah cun a phi chuak cu a tha lem ti ton lo. Na nunnak ah thla na cam i, Pathian nih an leh hnu ah lungtling lo hna in na um sual ton maw? Pathian thil ti ning hi lungtling tein leh khan ko uh sih law, amah hi rinh lawlaw, i bochan lawlaw ko uh sih, Kan hmai lei a hmu chung kho tu Pathian nih kan caah a ţha bik in a kan khan piak peng ko lai! (Rom. 8:28)

Pastor Hniang Uk

Manila, Philippines

Pathian he i hoi kom (Kal ŢI)

Gen. 5:21-22 “Cu hnu ah Enok cu Pathian he (kal ţi) i hoi kom in…..”

Philippines, Manila ah Christ’s Commission Fellowship (member 25000 hrawng an si) timi khrihfabu i an pastor pa Peter Tan Chi cu a rian ţuan hoi pastor te, deacon te, hruaitu upa te pawl an nuncan ziaza a check ton tikah an inn ah ruah lo piin (an um lo chungte a si zong ah) a va kal i an sinum pawl kha bia a ruah hna: nan boss hi zeitindah nan hmuh, a ţha maw, an dawt hna maw, movie/TV te pawl a zoh tuk maw, thlacamnak teh an tuah ton maw, tbtk…in a hal ton hna. Kan nih lai lei siseh law kan innpa chakthlang pawl khi hal an si hnga (sinum kan ngei lo caah). Kan ngamh lai maw? Kan innpa te nih zeitin dah an kan hmuh cio hnga, zeitin dah an kan ti cio lai dah?

Thlarau lei kan i tah nak hi thlacamnak tlang i rawl kan ulh lio, khuaruahhar thil hna kan tuah khawh lio, biakinn chung kan um lio i Pathian kan thangţhat dan tbtk… hna long in kan tah awk a si lo. Nifatin kan nunnak ah zeihmanh special in tuah awk a um lo lio caan i kan tuah mi, punghman ten kan um lio i kan tuahmi, kan ţuanmi, kan ruatmi, kan nuncan ziaza tu in kan i tah deuh awk a si. Cuticun, Pathian he kal ţi ti mi le Pathian he i hoikomhnak ti mi kha kan nun ah a um maw um lo ti kha kan i fiang lai.

Enok cu fa (Methuselah) a ngeih hnu ah a nun chung vial te Pathian he an kal ţi, hoi komh nak a ngei ti kan hmuh. Kan nunnak ah Thiangthlarau fa kan ngeih hnu ah cun nifatin kan nunnak hi amah he kal ţi peng ding kan si ve cang. Nifatin kan hnu, kan hmai, kan keh, kan vorh lei zoh in i ralring peng kan hau, zeicahtiah, sual nak aa pom chih mi vawlei pi chung ah kan um. (2 Tim. 3:13-14) Pathian he na kal ţi deuhdeuh, hoi kom hna na ngei lo deuhdeuh kho men, zeicahtiah cun, na duh mi le an duh mi kha aa lo ti lai lo, na kal duh nak le an kal duh nak kha aa lo ti men lai lo. Pathian na bochan ning le an bochan ning zong kha aa lo ti men lai lo. Na nunnak ah Pathian nih khuaruahhar a tuah mi pawl na ton cuahmah lio ah Pathian naa bochan ngam ning kha, a nunnak i a tong ve lo mi na hoi nih cun Pathian naa bochan dan kha an zoh lai i a lung fiang ti lo kho men. Enok nun nih a kan cawn piak mi cu fapa a ngeih hnu ah a nunchung vialte Pathian he i hoikomhnak in caan a hman ban tuk in, kan nih hna zong khrihfa kan si i, kan i hrinthan hnu Thlarau thianghlim kan chung ah kan ngeih hnu ah cun kan nunchung dih lak hi amah Pathian he kal ţi ding le i hoikomh peng ding kan si cang. Nifatin na nunnak ah Pathian he kal ţi, hoikomhnak na ngei maw????

Pastor Hniang Uk

Manila, Philippines

PIPU HNA THLUACHUAH

2 Chan. 20:6-9

Pastor Hniang Uk

Pathian dawtnak, lamhruainak le umpinak thawng in Kyarinn khua cu kum 50 a si ve cang! Khua tlak ka i khua le ram caah Pathian sinah thluachuah a rak kan hal piak tu Pu Chawn Tum le a lu bik tlangtla in a rak hruai tu Pu Ni Dun cung ah le kyarinn khua tlak lio i a rak i tel mi hna (tam deuh cu an kan liam tak cang hna) an dih lak cung ah upat nak ka pek hna. Hi kum 50 chung ah hin a karlak ah buaibainak, harnak le sunghzatlaknak tampi um ko hmanh sehlaw nihin ah cun kyarinnpar tiah a hung par cang i kan pi le kan pu hna thluachuah cu kan zun cuahmah ko ti hi chim hau lo in mithmuh kut tongh in kan ton mi thil a si.

Nihin tiang (June 2010) ah kan Kyarinn khua in Malaysia a phan mi hi minung 400 hrawng an si cang. Inn khat ah pakhat tluk dengmang in kan kal cang ti nak a si. Malaysia in ram thum nak a phan mi hi upa long te in 150 hrawng an si i, hngakchia le nauthar zong rel chih in cun 240 tluk hrawng an si cang. (Interviewed: Aa Lung). Malaysia le ram thangcho kal long hi Pathian thluachuah tiah ka ti duh nak cu a si lo.

Pipu hna thluachuah ti hi cu a rak um hrimrhim ko! Cu kan pipu hna thluachuah cu a peh zulh ter tu maw kan si, a dongh ter tu dah ti hi ruat hna uh sih. Kan pipu hna thluachuah hi kan mah ah a donghter tu kan si sual lai ti ka phang ngaingai! Kan bible chung ah pipu hna thluachuah a donghtertu an um ban tuk in, a peh zulh ter tu zong an um ve. Duh poh in a nung mi le pumsaduhnak lei ah a pial tu (siangpahrang pawl) nih cun pipu hna thluachuah cu an donghter ton i, dingfel tein Pathian ttihzah bu le bochan bu in a nung mi nih cun cu thluachuah cu peh zulh in an tefa le chan tiang an luan ter ve.

Biakamhlun chung minung tuan bia kan zoh tik ah, Pathian nih pakhat cio te in a rak chawnh hna, pehtlaihnak a tuah hna, asinain a thluachuahnak cu tefa par chin tiang in an co dih ton. Chiatnak lei a si zong ah tefa par chin (chan li nak) tiang chiatnak an tong ton. Cucaah, thatlonak tuah kha thim lo in, dingfel tein Pathian duh nak kha kan thim i kan tuah mi nih khan kan caah thluachuah kan hmuh nak long si lo in, kan tefa le ca tiang ah thluachuah kan ham piak cia hna a si cang. Pathian duh nak tuah ding in kan thim mi le kan tuah mi hi Pathian nih cun a philh bal lo.

Kan bible chung ah David kong hi kan zoh ah cun a fiang ngaingai. David nih Pathian duhnak a tuah mi le aa bochannak hi Pathian nih a philh lo i, a tefa chan tiang ah cu thluachuahnak cu a nguh. Pathian nih David cu ka thin lung a ka tong tu, ka duh ning thin lung a pu tu le a tuah tu a ti. (1 Samuel. 13:14; Lam. 13:22). A tefa hna sual nak an tuah tik zong ah hrawh ding tluk in kan hrawh hna lo, nan pu David ruang ah a ti lengmang.. Solomon nih Jerusalem biakinn a sak khawh zong hi a pa David i thluachuah in a si. ( 2 Chan. 6:4-7:2). Solomon nih Pathian duh lo mi ram dang nu a tthit, pathian dang sin zong ah aa mer tik ah Pathian nih na ram hi then hnih ah ka cheu lai, asinain, nangmah kut chung ah cun ka tuah lai lo, na pa David ruangah (mithmai ka zoh caah) a ti. ( 1 Siang. 11:1-12). David i tefa chung in a chanruknak pa Siangpahrang Jehoram zong a sual tuk ruang ah a ram vial te hrawh dih aa tim nain, na pu David he ka tuah mi biakamnak ruang ah a ti i a hrawh than lo. (2 Chan. 21:7). David chan in kum za lawnh hnu siangpahrang Hezekiah chan zong ah ramdang siangpahrang hna nih an kulh dih i a sung bak ding a si cang nain, Pathian sin khamh awk ah a au than i , a thaizing ah cun a ral vial te cu Bawipa vancungmi nih an thah dih hna ti kan hmu. A ruang cu a pu David nih Pathian sin ah dingfel ten a rak um caah a ti (2 Siang. 19:34). Cun Siangpahrang Hezekiah a zawt lio zong ah Pathian sin ah damnak caah thla a cam i Pathian nih a dam ter. Asinain, Pathian nih a dam ter nak a ruang cu Hezekiah nih a thlacam au nak thawng long si lo in, na pu David ka sal tha ruang ah le kei mah ruang ah kan dam ter a ti than. (2 Siang. 20:5-6). Cu long hmanh si lo in, Pathian nih khamnhtu Zisuh Khrih a kan pek mi a rak chuah nak ding hmanh hi David tefa chung in a si lai tiah biakamnak a rak tuah. (Isaiah 11:1; Lam. 13:22-23). Cucaah David siangpahrang pa nih hin zei tluk ro tha, ro sung lawi thluachuah dah tefa par chin tiang caah a chiah piak hna ti cu kan hmuh. Cucu Pathian kha aa bochan i Pathian he dingfel ten a rak kal nak thawng in a si.

Kan lai mi zong ah kei mah ka theih tawk in cun, khua le ram, miphun le ram caah dingfel tein a tuan tu poh le Pathian a duh i aa bochan tatak mi pawl i an fa le cu thluachuah an hmu dih hrimhrim ko. Khrihfa hmasa a si mi hna Pu Pau Suan le Pu Thuam Hang hna i an tufa le zong mi ah an i chuah dih. Thlarau lei kan pa kan ti mi hna Rev. Van Lo, Rev. Sang Fen, Rev. David Van Bik (tam pi an um rih) hna i an fa le pawl zong thluachuah an hmuh dih. Dr. Steven Hre Kio nih a ti ton mi cu “hi dir hmun tiang ka phanh hi ka pa thluachuah bak a si ko a ti”. Dr. Steven Hre Kio a pa Rev. Sang Fen cu ho poh nih a kong lam kan theih dih, dingfel tein le thihngamh ngai in Pathian thawngtha a rak phuang tu Pathian sal tha a si. A fa le vial te cu nihin ah lai mi nih kan i rinh chanh mi long te an si dih. Dr. Dennis Suh Maung zong nih a ti mi cu, “kei mah ka si lo, ka pa thluachuah bak asi” a ti ve. Dr. Dennis cu Philippine Christian University – Union Theological Seminary, Philippines ram ah professor kum 15 a tuan cang mi si. Nihin ah Doctor of Ministry program ah Coordinator a kan tuan piak tu asi. Dr. Dennis a pa cu pastor zong si lo, khuabawi zong a si lo nain, member sasawh in le khrihfa upa a rak tuan mi, Pathian a ttihzah, aa bochan i a fa le hi zanfatin thlacamnak a tuah pi ton tu dingfel tein a nung mi zumtu tha asi. Dr. Dennis nih cun “ka pa nih a thlacamnak bak in a kan cawm” ati. Cun, Dr. Dennis hi Rev. Sang Fen nih thla a rak cam piak lio ah “kan kawlram ca long hmanh si lo in vawlei cung khuaza ram kip ah kal in a thawngtha phuangtu ding ah” tiah thluachuah a rak pek. Nihin ah cun vawlei cung ram tam pi ah thawngtha phuangtu a rak si ngaingai cang. (Interviewed: Dr. Dennis) Cucaah, “kan pupa zumhnak le thluachuah a dai lo” tiah hla kan rak sa lengmang mi zong hi fiang ten kan hmuh khawh nak tam pi a um.

Nihin kan tuah mi poh hi kan mah ca long ah si lo in, kan tefa le chan tiang (impact/effect) a va daih ding mi a si kha kan hmuh. Kan pi le kan pu hna nih an rak kan ser piak cia mi thluachuah a um ban tuk in kan mah te zong in kan i ser mi a um ve. Cucaah, kan pi le kan pu hna nih kan caah thluachuahnak an rak kan ser piak lo hmanh ah an mah kha mawtchiat awk a si lo i, mawtchiat can zong a si lo, zeicahtiah cun, nihin ah nangmah te zong in nangmah caah na ser khawh mi a si i, na thawk khawh rih mi a si. Cu caah, ka pipu hna thluachuah ka dong mi a um hrim lo na ti a si ah cun nihin ah nangmah nih na thawk ve lai lo maw! David zong amah tein aa ser i, a zun ve hlei ah a tefa chan tiang a nguh rih. (Galati 6:7) chung ah “Mi nih a tuh mi cu a zun ko lai” a ti. Cu nih a kan hmuh ter mi cu zei tluk in dah nifatin kan nun hi a biapi ti mi hi a si. Ahohmanh mah ca long ah a nung mi kan um lo, ai awh tuk kan si dih. Mi thluachuah hmuhnak ding caah ai awh tu ka si ti hi fiang tein kan i theih ah cun nifatin kan nun hi kan duh poh in kan nung ngam hnga lo.

Laimi nih khirhfa kan si lo maw tiah lih bia chim lo kan i zuam, lam ah thil kan hmuh mi kan i lak lo i khrihfabu, si lo le, khuabawi hna sin ah kan va pek, mi kan hleng lo, tthatnak tuah kan i zuam kan ti mi hna hi Europe ram le ram cheukhat hna caah cun zuam hau lo in a ho poh nih an tuah mi, an nun zia khi a rak si. Cucaah, thluachuah kan hmu lo, kan tthangcho lo kan ti ah cun kan mah nun zia ruang ah a si ve ko lai. Hlan lio kan pupa hna zumhnak le dingfel nak hi nihin ah hmuh khawh a har ngaingai cang. Kan khua kan ram ah Bible nih sual asi a ti ko mi kha sual ah kan hmuh ti lo mi a tam. Khrihfa chungkhar cawnpiaknak tha pawl zong hi ram thangcho kan phanh tik ah cun zei kan rel ti lo, san a tlai ti lo (a date out cang) kan ti. Kan pipu hna thluachuah kan donghter thluahmah sual cang hnga maw?

2 Chanrelnak 20:6-9 chung i Jehoshafat nih Bawipa sin ah a au ban tuk in, kan nih hna zong, hi kan khua kan ram hi kan pipu hna sin ah Pathian nih a rak pek mi hna a si i, kan i nuamh can ah, kan har can ah le kan ngeih chiat can amah kan auh nak hmun thiang bik cu siseh law kan pipu hna sinin kan co mi thluachuah kha dong cat lo in a luan ter tu kan si hlei ah, kan tefa hna chan tiang cu thluachuah cu a luan ter tu si hram hna uh sih!

Rick Warren nih “nunnak ti mi hi nangmah kong si lo, Pathian kong tu a si” tiah a rak ti. A hman ngaingai ka ti. Kan nunnak kong taktak hi a hram pi kan vun zoh ah cun Pathian kong long te a si ko. Khrihfa kan vun si chinchin ah hin cu Paul nih a chim mi “kei ka caah nun hi Khrih a si” ti mi hrim hi kan nun a si awk cu a si ko. (Filipi 1:21). Cucaah, ahopoh kan si ah, kan um nak hmun cio in Pathian kan duh, kan ttihzah, kan i bochan, a bia thiang kan rel, thla kan cam, kan si khawh tawk tthatnak kan tuah i dingfel tein kan nun poh ah cun a kan kamh mi thluachuah cu thlarau lei siseh, pumsa lei siseh kan cung ah a tlun hlei ah kan tefa chan tiang an rak dong ding mi asi. Nang le kei zong ninikhat ah pi le pu kan rak si ve lai. Pipu hna thluachuah dong cat lo in tefa par chin tiang a luan ter tu kan si cio nak hnga Pathian nih thluachuah kan pe cio ko seh!