Sunday, October 10, 2010

Daniel Nun in Cawn Awk

Sep. 5, 2010

Daniel 1:8 “…..siangpahrang nih a ka pek mi rawl le zu hin kaa thurhnomh hrimrhim lai lo…….”

Kan ram a si lo mi, kan phanh bal lo nak ram kan phanh tik ah, holh aa dang, nun can ziaza aa dang, ei din aa dang, upadi aa dang, a tam u cu aa dang dih. Pathian kan zumhnak le kan pom ning zong lam a kan pial ter sual lai ti hi phan a um ngaingai.

Babylon siangpahrang Nebukkhadnezzar nih Jerusalem khuapi a tei, a lak tik ah mino cheukhat pawl cu Balylon lei ah an kal pi hna, cu hna lak ah Daniel zong aa tel ve. Babylon an va phanh tik ah Daniel caah thil thar long te a si cang. Daniel le a hoi le pawl cu Siangpahrang inn ah duh poh in ei din khawh nak, siangparang ei din mi kha ei khawh ve nak nawl an ngei. Zeihmanh phan awk um loh, duhpoh in um ding, ei ding khi a si ko. Sihmanhsehlaw, Daniel nih cun “ siangpahrang nih a ka pek mi rawl le zu hin kaa thurhnomh hrimrhim lai lo” a ti.

Nu le pa, chung le khat um ti lo nak ram kan phanh tik ah tukforhnak phunphun a ra cang: na chung le an in hmu lai lo cuh, zeihmanh poi lo cuh, an tuah cio mi si ko cuh, nangmah nawl si cang cuh (human right), hi ka ram ah cun sualnak si ti lo cuh, ti ban tuk a ra cang. Danial zong hi Babylon a phanh ah cun tlangval mino te dakaw a si, duhpoh in siangpahrang inn ah um i, duh poh ei, din cu a nuam tuk ko lai si. Asinain, Daniel cu dingfel tein a um peng. Chimh khawh ti lo mi fa le nau an tam ngai cang ko ee, tiah ka chung le ka hawi le nih an ka ti tik ah ka ngeih a chia ngaingai ko. Nihin ah Daniel nih a kan cawn piak mi hi fak deuh in ruat tuah uh sih.

Pathian nih thluachuah in pe ko hna seh.

Pastor Hniang Uk

Manila, Philippines

/////////////////

No comments: