Lungsi hnangam tein um le Ngeih mi thil hmuh thiam

Filipi 4:12: “lungsi hnangam tein um kha ka thiam cang”

Pakhat pa nih laitlang i minung rak si nak cha cun, US i uico rak si hmanh ka duh deuh a ti, an ti. Ram thangcho nak i um hi mivanţha tinak maw asi? Mivanţha kan ti mi hi zeikhidah kan zoh tiah bia hal nak um seh law kan chim mi aa dang cio ko lai. Asinain, Pathian a zum, khamh aa fiang i zumhnak he a kal mi pa/nu cu mi van ţha asi. Khrihfa mi nih cun mivantha le mivanchia kan tah nak zong hi bible a kan cawmpiak ning in kan tah awk a si. Lai khuate lei um mi internet le computer zong thei lo mi, Pathian a zum i aa bochan tuk mi, zumhnak he a kal mi pa kha, “mivanchia” kan ti kho lai maw? Ti kho hlah! khuapi le ram thangcho i um mi – motor, phone, internet tbt..in um i rian tuan peng, Pathian thang ţhat le pumh zong ngei kho ti lo, thei ti lo in um kha teh mivantha kan ti lai maw? A si hoi lo!

Voikhat ah mirumpa nih a fapa kha misifak hna um nak lei ah a kal pi i, ‘mirum innchungkhar in a rak chuah hi zeitluk dah mi van ţha a si nak’ kha theihter le piah a duh. Misifak um nak lei cu an phan i, a pa nih cun a fapa cu bia a hal:

Apa: : ka fapa, zeitindah, na hmuh ton ning (lesson na ngah mi) rak ka chim tuah.

Afapa: : uico pakhat kan ngei, an nih pali an ngei.

Tikholhnak tili (swimming pool) kan ngei, an nih tiva tampi an ngei.

Meiinn (lanterns) kan ngei, an nih arfi le thlapa an ngei.

Kan nih rawl kan cawk, an nih an cin mi te an ei (cawk hau lo)

Kan inn himnakah hruang kan kulh, an nih hawikom nih an kulh hna

Encyclopedia kan ngei, an nih Bible long an ngei an rel i an hna a ngam tuk

a ti, ti si. Apa nih aa ruahchan mi bantuk in a rak hmu ti lo. Nihin ah hi fapa te nih thil a hmunh ban tukin hmuh thiam kan herh ngaingai.

Kan ngeih lo mi longte kan zoh ah cun kan hna a ngam kho hrim lai lo. Mi kan hngar lai i, kan lungre a thei lai. Ngeih mi thil zong hi hmuh thiam i Pathian tu kha kan thangthat peng awk a si. Cucaah, khuate um mi si uh sih, khuapi um mi si uh sih kan vanchiatnak le kan vanthatnak kha kan umnak hmunhma, kan tuahtuan mi le kan ngeih mi kan hman mi thil ri in tah hrim hna hlah uh sih. Pathian kan thei lo i, kan zum lo, a bia kan nunpi lo ah cun khuate zong ah, khuapi le ramthangcho zong ah mivanchia cu kan si ko lai. A hohmanh nih a hopaoh kha a zawmhtlaih awk asi lo, Pathian nih a kan dawt dih! Pathian tu kha dawt le, a bia nunpi i tinh peng i ngeih mi thil hmuh thiam le lungsi hnangam tein um kha a kan duh piak mi asi i, mivantha cu kan si.

Philipi 4:12 “Herhbau in um kha zeidah a lawh ti ka hngalh, cun a hlei a hluat in ngeih kha zeidah a lawh ti zong kha ka hngalh. Cucaah khuazeika hmanh ah, zeitik caan paoh ah, ka paw a khim ah siseh ka rawl a ṭam ah siseh, tam tuk ka ngeih ah siseh, tlawm tuk ka ngeih ah siseh, lungsi hnangam tein um kha ka thiam cang”

Pastor Hniang Uk

Manila, Philippines

////////////////////////////////

Ralvennak ah Dir

Habakkuk 2:1 “Ralvennak innsang ah, khan ka va dir lai i, kulhnak vampang ah khan, ka va um lai; Ka sinah zeidah a chim lai ti kha ka va hngak lai”

Titanic movie cu kan zoh bal cio ko lai dah! A movie um tu ning ah, tilawng hmailei lam a cuanh tupa a mawngtu (watchman) nih a hmailei kha ţha ten zoh lo in, fidi le fitlaw an i hnamh mi (vawlei sualnak) kha a zoh nakah tikhalpi (iceberg) a hmu manh ti lo i, tilawng nih cun mah tikhalpi cu a pah (taingh) i tilawng a rawknak le a pil nak cu si. Hmailei lam cuanhtu nih cun a hmailei kha ţha tein a zoh ding si ko.

Jesuh cu kan lam asi i, kan hmai lei a kal chung mi zong asi, kan hmaiah a dir mi zong a si i, kan hmai in a kan hruaitu zong asi. Amah long kha zoh peng ding asi. Peter cu Jesuh a zoh lio long ah ti cung ah a kal kho i, kehlei vorhlei thlichia le tilet a zoh lio ah cun ti chung ah a pil thluahmah ko (Mathai 14:29-30). Jesuh zoh bu long in Thlarau leiah hmai kal khawh a si.

“The watchman’s job is vital” an ti i, ralvengtu hna rian cu thihnak le nunnak he aa pehtlai ti asi. A hman ngaingai! Ralvengtu pakhat nih ţha tein a ven lo i, a daithlang, a ngut ,aa hngilhtak asi ah cun a ral pawl an rat zong a thei ti lai lo i a ralkap hoi hna sin ah ralrinnak zeithawnghmanh a thanh kho ti hna lai lo caah an ral pawl nih fawi tein an tei hna lai, an thi dih ko lai.

Ralvengtu nih a rian kha ţha tein a tuah hau, a tuah lo ah cun Ezk. 33:6 chung ban tuk a si lai. “Sihmanhsehlaw ralvengtu nih ral an rat a hmu nain a muko kha tum lo in zapi kha ralrinnak a pek hna lo ahcun, thahmi paoh kha an sualnak pi he thah chih an si ko lai; sihmanhsehlaw kha hna an thih ruangah khan ralvengtu kha mawhchiat a si lai, a ti.”

Kan nih khrihfa hna zong ralvengtu kan si (Ezk. 3:16). Kan pum, kan nunnak caah ţha tein ral kan ni ven a hau. Ţha tein kan ni ven lo ah cun kan ralpa satan nih a rak kan luhhnawh lengmang ko lai. Ralvennak ah dir uhsih, ţha tein ral veng hna uhsih! Cu ralvennak i kan um tikah Bawipa nih bia a kan ruah ve lai (Habakkuk 2:1)

Pa Hniang

Manila, Philippines

//////////////////////////////

Toidor nun phunkhat

I Peter 5:5 “toidornak puan kha i aih u……… mitoidor cu a vel kha a pek hna,”

Feb. 16, 2011 ah ka hawipa Bro. Dick nih Bible study kan ngei lai, na thil ţha deuh mi te rak i hruk te a ka ti. Na thil ţha deuh mi te rak i hruk te a ka ti tikah ka khuaruah har pah. Ka va kal ah cun, Bible study kan tuah ţi mi hna cu a tu Philippines ram president i spokesman ( president awiawh in biachimtu, chimhnak nawl zong ngei tu) le khuapi uktu (mayor) pa hnih, biaceihtuk (lawyer) le adangdang ram uk tu lei in rengsang mi pawl an si. Kan tuahnak a hmun zong hi a tu Philippines president pa i a chung le (a nu nau fa le inn) inn ah a si. Ka khuaruahhar ngai mi pakhat cu mahtluk upa le bawi an si ko nain, kilvengtu (guard) ho hmanh an ni ken bak lo. An mah te cio in driver pakhat te he an ra cio ko (kawlram hna ah siseh law, an thawngvang a than lai ning hi, a mak lai dah). Mi an kan zoh ning, an kan biak ning, an kan chawnh ning, mi an upat ning, a ho poh kha aa rual tein a kan chawnh ning hna ka zoh tikah an fim bak. Toidor nun an ngei. Cucaah pei ram zong an hruai khawh hi ti kha ka lung ah a rak chuak ngaingai.

Mathai 8 chung i ralbawipa toidor nun a ngeih ning le a thinlung put hi zoh tuah uh sih, ⁶“Bawipa, ka sinumpa cu a zaw i inn ah a ril ko, a cawl zong a cawlcang kho lo i a zual ngaingai ko,” tiah a ti. ⁷Jesuh nih cun, “Ka ra lai i ka damter lai,” tiah a ti. ⁸Ralbawipa nih cun, “Aa, bawipa, si hlah! Nang ka inn i rat dingah hin kaa tlak lo. Nawl hei pe law ka sinumpa cu a dam ko lai. ⁹Kei zong ka cunglei bawi nawl tang i a ummi ka si i ka tang zongah ralkap an um ve. Pakhat cu, ‘Kal,’ ka ti i a kal ve ko, cun a dang pakhat cu, ‘Ra,’ ka ti i a ra ve ko; cun ka sal cu, ‘Hihi tuah,’ ka ti i a tuah ve ko,” tiah a leh. ¹⁰Cu bia cu Jesuh nih a theih tikah a khuaruah a har i a zulmi mizapi hna cu, Hi pa bantukin zumhnak a ngeimi Israel mi hna lakah ahohmanh ka hmu rih hna lo. ¹¹Hihi va philh hlah u: Nichuahlei le nitlaklei in mi tampi an ra te lai i Vancung Pennak chungah cun rawldanghnak cabuai ah Abraham le Isak le Jakob hna he tiah an ṭhu ṭi lai” tiah a ti.

Ralbawipa nih cun sinum cu tampi a ngei ko hnga lo maw? A thih zong ah a dang pei an tampi rih ko cu! A sinum pa ca tham ah cun a kut tangah mi fial ding an tampi ko tung? Cun sinum hna cu ti sawh lo in, amah thengtheng nih Jesuh sin va kal in a va nawl piak mi lungput hi na ruat bal maw? A bia chim dan zong hi zoh rih uh sih, zeitluk in dah aa toidor ti cu kan hmuh khawh.

Job nih a ti bangin, chuahpi mi zeihmanh kan ngei lo, kan kal pi khawh ding zong a um hlei lo. Zei dah kan ni uah pi awk, pawrhlawrh pi awk cu a um hnga? Kan nawlngeihnak (power), kan degree, kan thil ti khawhnak, kan motor, kan phone, kan computer, kan thilri hna kan ni uah pi sual maw? Hi hna ruang ah mi nih chawnh khawh lo tiang hna in kan um sual maw? A nei lo mi hna kha kan nek sual hna maw? Cu ti kan um sual a si ah cun zangfah kan va si dah! Zeicahtiah, “Pathian nih milungpuam le mipawrhlawr cu a doh hna i mitoidor cu a vel kha a pek hna,” a ti.

Kan ni uah pi awk cu pakhat longlong a um. Cucu Khrih Jesuh kha a si i, cu Khrih aa uah pi mi nih cun toidor nun a ngei.

Pastor Hniang Uk

Manila, Philippines

..............

Ka nawl I cawng uh

I Cor. 4:16 “ka zia ka cawng u tiah kan nawl hna”

Voikhat ah khrihfa upa pakhat nih rawl ulh nak ding kong, rawl ulh ţhatnak kong le thaizing rawl kan ulh hna lai tiah thawng a thanh ti si. Asinain, a thaizing ahcun a mah cu a ra lo an ti.

Voikhat ah pastor pa cu pulpit cung in dawtnak kong a chim i a thiam tuk nak ah, a nupi cu phungchim dih bak ah a ihphah tom he pulpit ah a rak ra an ti. Ziah tiah an hal tikah, “ka va pa hi pulpit ah cun a ţha tuk, pulpit longlong ah um ka duh cang, inn ţin cu ka duh ti lo a ti an ti.

Khrihfabu pakhat ah mino upa nih mino pawl kha ‘hla nan cawng lo, nan chuak lo ee, tiah a sik hna’ nain, a fa le nungak tlangval pawl zeitik hmanhah biakinn ah a rak hruai kho bal hna lo an ti!

Feb. 13, 2011 Philippine Myanmar Christian Fellowship ah ka nau pa Panun (Van Nun Thang) nih thawngţha chim ding asi i, kan hawi le he motor in kan kal ţi hna. Motor chung ah kan hoi pa pakhat nih nihin thawngţha chimtu hodah si lai ti kha theih a duh. Zeitindah a hal tiah cun, “mah hmanh tuah duh tung loin mi tuah fial tu ding hodah si lai” tiah a ti (capo pah in).

Hi kan chimh mi pawl hi capo biatak ban tuk an si i, nihin khrihfa kan si nak kha fiang tein a langh ter ngaingai caah, kan ruah awk a herh hrimhrim ko ti hi ka langhter duh mi asi.

Mahatma Gandhi sin ah nu pakhat nih ‘ka fapa hi cini thanthling rang (sugar) a ei tuk caah a ha zong rawk dih cang lai, rak ka chimhhrinh piah’ tiah a rat pi ti si. Gandhi nih zarhhnih hnu ah ra ţhan te uh a ti hna. Cun zarhhnih hnu cun an ra ţhan. Gandhi nih cun ‘ka fapa, cini ei tuk ti hlah’ tiah a ti. Nuhmei nu nih cun ‘ziah, ka fapa cini ei tuk ti hlah ti tham cu a voikhatnak kan rat ah khan na chim ko lo?’ tiah a ti. Gandhi nih a leh mi cu, “mah lio ah khan kei zong cini ka rak duh tuk i, keimah kaa phiat ta hnu long ah ka chim ngam i, ka cawnpiak ngam ee” tiah a leh.

Khrihfa kan i cawnpiak nak zong ah hin hibantuk in a si awk a si ko lo maw? Jesuh nih “ka nawl hi i cawn ve uh” a ti (Matt. 11:29) Pual zong nih “ka zia ka cawng u” a ti (I Cor. 4:16). Devotion ngeih nak ding kong kan chimh ah cun kan tuah hmasa hau; thlacamnak kong kan chim ah cun thlacam nun kan ngeih a hau; rawl ulh nak kong kan chim ah cun kan ulh pi hna hau; tlang rian kong kan chim ah cun kan i thawh ve hau; kuak zuu hlah, zuu ding hlah kan ti hna ah cun kan mah kha kan i sum (kan tuah lo) hmasa ahau.

Ahopaoh kan umnak paoh ah cawnpiaktu kan si ti mi thinlung put ngei uhsih (kan umnak paoh i saya va tuan ciammam kha ka chim duh mi si lo). Inchungkhar ah pa bik nih fale cawnpiaktu a si, fa upa nih a nau le cawnpiaktu a si, ngakchia zong nih amahnak in a hngakchia deuh mi kha cawnpiaktu a si thiamthiam. Cawnpiaktu dir hmun na si cang tik ah, na fa le na nau le nih an in zulh cang lai, zeitindah na um lai?

Nun a kan chimtu le Thlarau lei ah a kan ţhan tertu si hram ko seh!

Pastor Hniang Uk

///////////////