A ngan deuh mi sunpar nak

Theihthiam ding ah nawl nak: ka sermon pawl hi tam deuh cu, ka nun i ka ton mi (life experience sharing) deuh an si i, atanglei ka sermon zong hi keimah pumpak pawrhlawt duhnak pakhat hmanh um hrim lo, ka nun i Pathian nih rian a tuan mi Amah Sunparnak langhter ka duh mi tu kha si i, na caah thazang laknak si ve hnga maw ti saduhthahnak he si.. Kaalawm

Johan 11:6 “Lazaruh a zaw ti thawng a thei nain a umnak hmun ah ni hnih a caam rih”

Jesuh nih Lazaruh a dawt ti cu Bible ah kan hmuh kho (Johan 11:3). Lazaruh a zaw tiah an chim tik ah minung lei ruah nak in cun, “khulrang in a ra lai i a dam ter colh lai” ti hi ruah cio a si ko hnga, zeica’h tiah,mizaw dang pawl hmanh zong pei a dam ter cuahmah ko hna cu, a tu hi cu a dawt mi a hoi pei asi cu! Sihmanhsehlaw, Jesuh nih, cu thawng a thei nain a umnak hmun ah khan ni hnih a caam rih ti a si. Minung lei in cun Pathian duhnak hi zei dah si hnga, kan i fiang kho ti lo. Jesuh a rat tik ah cun a thi cang i Jesuh cu Lazaruh a far le nih an mawtchiat: “Bawipa, hika ah hin rak um law cu, ka ṭa hi a thi hnga lo,” (John. 11:20, 32) tiah an ti veve. A thihhnu nili si zongah a thoţhan te lai ti kha Marry le Martha nih an hmu chung kho bak lo mi si.

March 26, 2004 ah kan inn a rak kangh lio ah hin Pathian ka rak mawtchiat ngaingai! Ka nunnak ah Pathian ka mawtchiat caan hi a tam ngaingai. 2006 ah Philippine ka phan, Asian Theological Seminary ah Master of Divinity kai ka duh i luhnak camipuai (entrance exam) ka phi, ka ong. Asinan, thlakhat $ 300 na dih peng lai an ka ti; ka u le nih thlakhat ah cu zatzat cu kan in kua kho lai lo an ka ti caah ka kai kho lo, ka lung fak ngai. Pathian ka mawtchiat. Manila Theological College and Graduate School tu ah ka kai; principal pa nih Yangon i ka dih mi 1^st yr le 2^nd yr ahmat cazin (transcript) kha a leh khan caah a kum 3 nak (3^rd year) in ka lut i 2007 March ah M.Div ka dih colh; M.Th kum hnih ka peh than i 2009 March ah ka dih than, Pathian thawng in. ATS ah khan rak kai kho ning law cu 2009 October long ah M.Div dih ding ka si, ziah tiah cun ATS nih cun Yangon i ka dih mi 1^st yr le 2^nd yr ahmat cazin (ka transcript) kha an leh khan lo caah a thawk in ka kai than hau hnga, cun kum 3 le cheu hi an kai ton cio hna. Asinan, 2009 June thla ah Doctor of Ministry cu Philippine Christian Universtiy – Union Theological Seminary ah Pathian thawngin le miphun dawtu chungkhat, rualchan, hoikom hna dirpi nak thawngin ka thawk cang. Philippines ka phak ka ah hin D.Min tiang ka kai te lai ti hi ka hmu chung kho bak lo mi si.

A zaw mi kha a dam ter ti mi nak in, a thih hnu nili ah a thawh ter ţhan ti hi sunparnak a ngan deuh. 2009 October ah M.Div a dih ti mi nak in, 2009 June thla ah cun M.Div, M.Th a dih hnu ah D.Min a kai lio cang ti hi ka nunnak ah Khrih sunparnak a ngan deuh in a langh nak si ko lo maw! Pathian min thangthat in um ko seh! Nihin ah zeidah na lungrethei, Pathian thil ti ning zeidah na lungtlin lo nak um sual maw, na mawtchiat sual maw? Na hmu chung kho rih lo mi, a ngan deuh mi sunparnak lei ah dakaw Pathian nih an tinh piak i an hruai lengmang cu! Khrih fa vial te hna Pathian thangţhat peng ko uh sih! Zei can poh ah Bawipa a ţha ti peng ko uh sih, zeicahtiah, a ngan deuh mi sunparnak ah an hruai peng ko.

Pastor Hniang Uk

Manila, Philippines

/////////////////////////////

Pathian Duh Nak

1 Thess. 4:3 “Pathian nih nan nih cu a thiang mi ………….si hna seh ti kha an duh hna”

Ka kai nak sianginn Philippines Christian University – Union Theological Seminary (taff) hi ruah a sur deuh poh ah ti a dil lengmang. 2009 Oct. thla i ruah sur mi hna cu sianginn ground floor i UTS caah ti in library fate an tuah nak tiang ti a kai i, ca uk zong tam non pi a rawk. Voikhat cu ruah fak ngaiin a sur i ti nih lam vial te a khuh dih, ka kedan kaa phoih, ka bongbi ka hlimh dih zong ah a ngah hlei lo, phei can in ka tan. A kuarhnak zong ka lamh sual, platform zong ka pahdih, motor lam a kal lei le a kir lei an dan nak a lai i pe khat hrawng tein tlakrawh an tuah mi zong kaa suk hawi, asinain motor lam chungah ka um ko ti cu ka thei ko, zeicahtiah cun Motor lam cu keh lei le vorh lei in hruang (fences) an kulh i, cu hruangte cu zoh in motor lam chungah ka um ko ti cu ka theih khawh. Hruang cu um hlah sehlaw motor lam chungah ka um le um lo zong kaa thei kho ti hnga lo i, tiva chungzong ah ka tla ko hnga.

Nifatin kan nunnak ah a nekcok tiang (ateseih) in hihi Pathian duh nak bak a si ti hi kan thei kho lo hmanh ah, kan keh lei le kan vorh lei in Bible ca nih Pathian duhnak chung ah kan um maw um lo ti kha hruang kulh mi ban tuk in a kan theih ter ko. Pathian duh lo mi kan tuah lo ruangah harnak kan tong lai lo ti nak si lo. Harnak tete na ton lio can ah Pathian na naih deuh lengmang si cun, harnak tete cu na tong lengmang ko lai (a kuarhnak zong na lamh sual ko lai, platform zong naa pah sual ko hnga). A can ah cun, zei dah ka tuah hnga, Pathian duh nak hi zei deuh khi dah a si hnga ti mi kha a nekcok tiang in cun kan i fiang cio lo. Tahchunhnak ah, ca maw ka tuah lai, Pathian hla maw ka ngai lai, tbt…sizung ah maw mizaw ka zoh lai, mithi inn ah maw ka kal lai, tbt… khakha cu thil ţha veve a si ko caah zei poh kha tuah ko. Lam pi chung ah na um ko. Amahbelte, Ţhat lo nak (zu dawr ah va luh i, zohchia ngai in) kan tuah belte ah cun lam chungah kan um ti lo, hruang leng ah kan um ti kha a fiang ngaingai cang ko i muihnak (tiva) chungah kan tla cang.

Pathian duh nak (the will of God) cu zeidah si ti mi biahal nak hi a tam ngai ton. Pathian duh nak hi a nekcok (detail - ateseih) in cun chimh le theih ding cu a har ngaingai, theihkhawh dih zong a si lo i, kan theih dih ah cun Pathian tluk kan si ve ti nak a si hnga. Asinain, buaktlak piin Pathian nih minung vial te siter a kan duh piak mi a um ve hna. Khrihfa kan si hnu ah siter akan duh mi tampi lak ah nihin i pakhat te chim ka duh mi cu, “nun thian nak ngei hnaseh” ti a kan duh piak mi hi asi.

Pathian kan i bochan, ţhatlonak khua kan khang lo kan tuah lo, lih bia kan chim lo i lungthiang tein kan um ding hi Pathian nih a kan duh piak mi cu asi. Pathian duhnak zeidah si tiah hal lengmang nak in, kan ton mi thil tu ah khan Amah Pathian kutcak kan hmuh khawh ding le a sunparnak kan langhter khawh ding tu kha kan kal pi awk cu asi.

Pathian nih a kan duh piak mi “nun thian nak” lei ah rak kan hruai chinchin ko seh!

Nifatin zeidah kan tuh ton cio hna?

Phungthlukbia 11:18 “ṭhatnak a tuhtu nih cun laksawng taktak cu a hmuh lai”

Dinfelnak kong hi minung nih chimding ngaingai ah hin kan i tlak lo, zeicahtiah cun, a dingfelmi hohmanh kan um lo. Kan chimbakah kanmah ten i sawh ve lengmang asi ko. Asinan, Pathian bia cu vainam kaphnih haar nakin haar deuh a ti bang in, Pathian bia a tlak tikah a chimtu ca zong asi i, a chimh mi hna ca zong asi. Cucaah a chimtu nih hin a tuah dih cang, a ong cang tinak a si lo. Bible catial tu pawl zong nih an tuah dih, an zulhdih hnu ah an tial mi le an kuat mi asi lo. Mi thiang Paul kan ti mi zong nih a chambaunak a um rih thiamthiam ko ti cu Bible chungah kan hmuh. Asinain, an chambau cio ko tiah dinfelnak zong i zuam lo kha cu Thiangthlarau nih umpi mi an si ti lo. (1 John 1:6-10)

2011 caah catlang (statement) pakhat kaa tuah mi cu “whatever you do, even the smallest thing, it will effect on your life” ti mi si i, “zei thil na tuah mi poh nih na nunnak ah a ra than lai, na zun ţhan lai” ti asi. Mah cucu Galati 6:7 “mi nih a tuhmi cu a zun ko lai” ti mi he aa khat mi asi ko. Hi catlang te hi ka khan a chung lei in ka innka ah ka tar i, leng ka chuah lai poh ah ka hmuh peng. Cu tikah, hi nih hin a ka theihter ţhan lengmang mi cu: “a tu a lengah ka chuak cang lai, zeidah ka tuah lai, khoika ah dah ka kal lai, ka tuahdingmi pawl hi ţhatnak asiah, chiatnak asiah ka nunnak ah ka zun ţhan ding mi asi” ti hi a si. (amahbelte, nihin ah mi pakhat tangka 500 na ţhen i, thaizing ah tangka 500 ţhenh na si ve lai ti nak ciah cu si lo). Kan theih thiam lo pi zong in kan sin ah a rak kir than lengmang. Mah caah “hi pa te hi cu a fel ngai ko nan ziah mah ti khin a tuar hnga” tiah kan ti ton. Amah tuah mi a zun mi zong si kho, a nu le pa, a pi le pu tuah mi a zun mi zong si kho rih. A hnu lei ah kan theih khawh lo mi tuanbia tampi a um ko. Pathian hi cu kan deh kho lo, a thil tuah mi hi a dik mi a si peng ko.

Cun kan tuah mi a hman ko hmanhah kan thinlung put kha a hman lo kho rih. Cun, thinlung put nih ţhatnak tuah a theih ko hmanh ah a tuah sernak nih a zulh hoi lo ah cun asi ţhan hoi lo. A cheunih, ţhatnak tuah cu kan theih ko si, kan sinak, kan ngeihchiah, kan cawva nih a tlinh tung lo kan ti kho men. Thil ngan piin ruah ding si lo, kan tuah khawhtawkte tu kha kan chim mi si. Tahchunhnak ah, ‘kei cu an rawl einak pakan vial te ka ţawl dih, ziah an nih hi an ţawl ve lo, ei long te pei an theih ko hi’ tiah thinhun bu in na tuah, na ţawl ah cun, thluachuah na hmu ding tluk in na hmu ţhan ti lai lo. Cun, pakan kholh kha bomh a herh mi na theih ko nan, na tuah sernak in na bomh ve hoi lo ah cun asi ţhan hoi lo. Mah caah kan thinlung put zong a hman a hau i kan tuahsernak zong nih a zulh ve hau mi si. Pakhat te kan i ralrin awk cu, thluachuah laksawng hmuh duh ah ţhatnak, dinfelnak tuah si lo in, Khrih Thlarau a ngei mi nih cun a nunak kha thlen dih asi cang caah (II Korin 5:17) a nun pi ding, a tabawa nun (his way of life) tu kha asi awk si.

Hi catlang te kaa tuah mi nih hin Thlarau lei nunnak ah a ka ţhan ter deuh ngaingai. Ţhatnak ka tuah hnik tik zong ah thazang a ka pek, chiatnak ka tuah hnik tik zong ah i sum ţhan nak a ka pek, ka thinlung a remh i ka ruahnak a ka thlen piak lengmang, dinfelnak lei ah a ka hruai. Na ca zongah santlai ţhahnem a si ve ah cun ti saduhthah nak he….

Pastor Hniang Uk

Manila, Philippines

////////////////////////

Na innpa na daw maw?

John 15:17 “pakhat le pakhat i daw u”

Luka 10:25-37 ah Phungbia cawnpiaktu pa nih ka innpa cu hodah si? tiah ahal tik ah, Jesuh nih thideng in an velhmipa bianabia kong a chim. Cutikah kan innpa hi a thideng mi, bomh a herh mi, a zaw mi, a kal kho lo mi longlong ah kan ruah sual lai.

Dec. 23-25, 2010 ah Philippine Myanmar Christian Fellowship hruai nakin minung 80 hrawng Subic beach ti mi ah kan kal hna, cun, Dec. 29-Jan. 1, 2011 ah Philippine Chin Christian Fellowship hruai nakin minung 56 cu Hundred Islands ah kan kal hna. Hibantuk mibupi in khualtlawn, tlun, kal ah hin mi thinlung hi theih khun deuh asi. Mah ca long i ruat nak thinlung a ngei mi cu a lang khun. Bus chungah mino te nih upa caah chiahpiak mi a hmai lei ţhutnak i cuh tbt.., ihnak ţha hmunhma i cuh tbt.., ti kholhnak i cuh tbt.., zuunput i cuh tbt.., hruaitu pawl kha bomh um lo in, san an tlai lo tiah thangchiat rih,,, cun, hibantuk ah hin ruahlopiin ţhutnak ţhial awk, thil ţhial awk, thil ţhawnh awk tibantuk a um thiam ngai, cu tikah fial khawh lo, auh khawh lo hlei ah a tuah tu pawl caah hnahnawh le thilrit in a um mi hna an um rih hoi. Ka hoi pakhat cu “hi ka khan ah hin naa tlum ti lo” tiah an rak ţhawl i a lung fah ning cu, kir ţthan hmanh ka duh, a ka ti. Minung cu kan um kal nak poh ah innpa kan ngai. Cucaah hibantuk ah cun damiah taih mi pa theng long kha na innpa si ti lo. Hi bantuk ah hin na innpa cu ho dah si? Na innpa na daw maw, a zawn na ruat maw?

Hi bantuk ah hin khatlei in Pathian min ka thangţhat ngaingai mi cu: mi ţhutnak an ngah dih hnu ah bus chung ah a lut mi, mi ih nak an ngah dih hnu ah a lon nak poh ah ka it te ko lai a ti mi, mi i kholh dih hmasa ko hna seh ati mi, hruaitu hna an chambau nak a um sual si cun khuh piak awkah a herh mi poh a bom tu an rak um len ve. Cubantuk thinlung cu mah zawn long aa ruat lo mi, ka hoi pa caah, ka innpa caah tiah khua a ruat mi an si i Jesuh nih a kan cawnpiak mi thinlung put a ngei mi cu an si.

Nang zong mibupi in khual na tlawng bal ko lai. A bik in khrihfami cu gospel team tbt., khrihfabu in cawlcanghnak tete kan ngei ton hna. Nang teh a cung lei group ah maw naa tel a tang lei group ah dah? Zankhat hnih te siarem lo in ih zong ah poi lo, ti mi maw kan i thim deuh lai, asiloah, kan chan chung mi nih “amah ca long aa ruat” tiah an kan ceih ding dah? Mah tein i check cio uh sih. Khrihfa kan i ti, Khrih zul tu kan i ti, a sinan, hibantuk ah mah siaremnak long kan ruat, hmunhma kan i cuh, kan thil hna a tlau ahcun - mahzawn long i ruatnak (self-centeredness) keimah ti mi Satan thinlung put kan ngei cang i, Jesuh cawnpiak mi innpa dawtnak thinlung put kha zei a rel ti lo. John 15:13 ah “Mi nih a hawile caah dawtnak ngan bik a ngeih khawhmi cu an ca i a nunnak pek hi a si” ati. A cunglei kan langhter mi hna hi kan zoh ah cun nunnak pek cu chim lo, zankhat zanhnih ih nak ruang hmanh ah kan buai cang!

Hmailei ah nun a kan chimhtu siseh law, Khrih nih a kan cawnpiakmi nunzia dawh, innpa dawt, mi zawn ruahnak thinlung kan ngeih khawhnak hnga Pathian nih thluachuah in pe ko hna seh

Pastor Hniang Uk

Manila, Philippines

///////////////////

Zumhnak in kal

Hebru 11:8

^“Pathian nih Abraham kha a auh tikah,… khuazei ah ka kal ti hngal loin a ram kha a chuahtak”

Abraham cu Pathian nih kan tinhpiakmi ram ah kal, a ti i zeihmanh fian cia mi a ngai lo nain, aa thawh cawlh ko.

Moses nih Israel pawl kha zei tin dah ka hruai hna lai tiah aa fiang cia mi a um lo. Pathian nih chimh chawm mi kha ngeih in a kal pi ko hna.

Joshua le a ralkap hna cu zeiruang ah dah Jericho cu voi 7 cu kan hel lai, zeiruang ah dah, cu ti kan tuah ah cun zeitin dah thil a cang lai ti kha an in fiang cia lo. Pathian nih chimh mi bia tu kha an ngai i an tuah ko.

Cucaah, dawtmi unau hna, 2011 ah hin zeitindah ka um lai, khua ka sak lai, ka nun lai tiah na lungre a thei sual maw? Kan hmailei in a ra ding mi thil pawl hi zeitindah an si te lai ti kan theih lo hmanh ah, fiangtein kan theih khawh mi cu hmailei a ra ding mi thil, caan vial te le zeizong vial te a tlai dih tu kan biak Pathian kha a si. Cucaah, kan hmailei caah hin zeihmanh phannak ngei lo tein, amah Pathian tu kha zumh, i bochan uhsihlaw, zumhnak lei in kan pa asimi hna Abraham, Moses, Joshua hna bantukin zeihmanh thil fiang cia in kan theih lo hmanh ah Amah Pathian tu kha zumhngamnak he 2011 cu kar hlang hna uhsih.

Pathian sinin a ra mi kumkhar thluachuah, daihnak, lawmhnak le hnangamnak hna cu nan dih lak cung ah tlung ko seh!

Pastor Hniang Uk

Manila