Kan rum tuk sual maw?

Luke 18:22-23“Pakhat te na bau kun. Na ngeihmi vialte kha va zuar law tangka cu sifakmi kha va ṭhen hna, cun vancung khua ah chawva na ngei lai; cun ra law ka zul,” tiah a ti. Sihmanhsehlaw hi bia cu mipa nih khan a theih tikah a ngaih a chia ngaingai, zeicahtiah amah cu mirum ngaingai a si.

Mah bible cacang hi kan zoh tikah mirum pawl caah hin vanram kai hi a har khun bik ding khi a lo. Kan bible hi, kha lio caan ah khan zeidah a rak ti duh (what did it mean for that day?) ti mi le nihin ah teh zeidah a kan cawnpiak duh (what does it mean for today?) ti mi kan kawl piak lengmang a hau ngaingai. What did it mean for that day ti mi long hi kan kawl ah cun kan bible cu Israel tuanbia sawhsawh ah aa cang ko lai. What does it mean for today ti mi kan vun kawl chih longah hin nifatin kan nunnak ah a kan hruaitu le thazang a kan pe tu asi lai.

Jesuh nih bia a ruah mi pa hi mirum taktak cu a rak si ko. Cuti asiah, nihin i mirum paohpaoh hi cu tin maw an thil pawl va zuar dih ding in kan fial hna lai? Misifak pawl teh Jesuh an zulh ding ah a fawi khun tiah maw kan ruah sual? Mirum pawl Pathian a thei taktak mi, Pathian rian a tuan tuk mi an tam pi ve ko tung! Nihin caah zeidah a kan chim duh kun?

Nihin ah hi bible cacang nih a kan cawnpiak duh mi cu misifak le mirum zong nih kan ngei dih mi thinlung rumnak tu kha asi cang. Hohmanh kan luat hlei loh. Minung kan thinlung kan ruah nak hi sekant pakhat ah voi hnih aa thleng kho manh ti asi. Cu tlukin lung a tam mi, duhnak aa thleng kho mi le duhnak a tam mi kan si. Kan thinlung, kan ruahnak, vawlei cung thil le ri kan duh mi hi a tam tuk cio i a ho paoh kan thinlung a rum ngaingai hna. Kal tak le zuar tak kan duh lo, cu ning pi cun Jesuh cu zulh kan duh tikah kan thil a rit tuk i kan zulh kho ti lo. Kan thinlung kan rum tuk, Pathian a duh lo mi longte kan ngei. A ngaingai ah, kan thinlung chungah Jesuh zong hmunhman hmanh kan pe duh ton lo. Thil dang kan ruah mi le kan duh mi a tam tuk tikah thinlung in a rum taktak mi kan si. Pathian nih a kan duh piak mi cu, thinlung rum tuk si loin, Jesuh pakhat te long kha ngeih i, cu Jesuh ah zeizong vial te a tling dih ko ti mi tu hi theih le zulhter a kan duh. Kolos 3:2 ah, nan thinlung kha hi vawlei thil le ri ah si lo in cunglei thil tu ah khan um seh, a kan ti.

Jesuh nih na cungah hlawnh awk, kal tak awk a har ngai mi thil an chim bal maw? Jesuh a chim mi bia hna hi Amah Thlarau a ngei lo mi caah cun a har tuk mi thil an si ton, asinan, Amah Thlarau a ngei mi caah cun a fawi te ko. Jesuh nih ka herh loh a ti mi kan zia, kan nun, kan ruahnak vial te kha va zuar dih ding le kal tak ding kha a kan duh piak mi cu asi. Cu ti kan ti tikah, tangka herh ti lo, riantuan herh ti lo, zeihmanh herh ti lo kan ti duh nak asi lo. Pathian kha kan thinlung dih lak in apakhatnak ah chiah i thil dang vial te kha a hnu ah chiah tu kha asi. Rian kan tuannak ah, zei kan tuah poah ah Pathian he tuah tti, tuan tti ding tu kha asi. Cu tikah Amah min thangthat loin kan um kho ti lai lo i, Amah longlong nih sunparnak a hmu cang lai. Nifatin kan nun a nuam peng lai, Jesuh tu kha kan rumnak a si cang! Kan thinlung hi vawlei duhnak phunzakip in a khat mi si ti lo in, Khrih longlong kha kan khat ter khawh nak hnga Pathian nih thluachuah kan pe cio ko seh!

Pastor Hniang Uk

Manila, Philippines

/////////////////////////////

Pathian Thawng longlong in a si ko

Rom. 11:36 zeizong vialte hi amah nih a sermi an si i…. amah thawngin…. amah caah an si dih. Pathian cungah sunparnak cu zungzal in um ko seh! Amen.

Hmasabikah Pathian min cu thangthat in um ko seh! Nihin hi Zarhtin Thlarau Rawl tiah ka rak thlahnak kumkhat tlinnak ni asi. Pathian min ka thangthat tuk! Sermon a rel tontu nan dih lak cungah Pathian nih thluachuah in pe chinchin hram ko hnaseh. Kumkhat chung pehtonh tein thlah khawhnak caantha a ka pe tu Pathian min thangthat loin ka um kho lo. Paul nih a chim bang in, zeizong vialte hi amah thawngin, a mahcaah le amah sunparnak caah ah an si dih a ti bangin Pathian nih sunparnak co chinchin ko seh!

Zarhtin Thlarau Rawl tiin kumkhat chung ka thlah lai tiah ka hawipa ka sawm i thlacamnak ka tinpiah lio ah, ka hawipa nih cun, sianginn na kai lio ah na ca he, asi kho lo, na duh cun thlakhat voikhat hrawng thlah te ko a ka ti i hna a ka tlak pi lo. Nihin ahcun Pathian thawngin kumkhat a tling cang. A karlak tete ah khual zong ka tlawngpah ton nain asikhawh chungin pehtonh tein thlah khawh ka rak i zuam peng. Ka room in internet a ngah lo can hna zongah ka hawi le room in asi khawh chungin thlah khawh dingin kaa zuam peng. Ka rian pakhat ah ka rak ruah i, ka ministry pakhat ah ka rak ruah. Cucaah, thla rak ka cam piak peng ve uh ti kha nan dih lak sinah sawm le nawl kan duh hna. Voikhat cu ka hawi Chinese pa he Luzon (Philippines ram chung) lei ah khual kan tlawng i kan riahnak ah internet um ti lo, sundayzing le asi cang. Sermon thlah ka hauh cang nak kong kha ka hawipa cu ka chim i a rannak in a motor he internet umnak lei ah kan va tli colh. Hi hna hi keimah nih ka tuah khawh mi si lo, Pathian nih khua a khan dih mi tu kha asi. Minung nih kan tuah khawh, kan ti khawh kan ti mi hi a rak si hrimhrim lo. Jesuh nih Johan 15:5 chungah, keimah loin nan tuah khawh mi zeihmanh a um lo ati bantukin, zeizongvialte hi Amah thawng longlongin asi ko.

Cucaah, Pathian sinah duhnak taktak he kan i timh asi ahcun, Amah nih zeizong vialte tlam a tlin ter dih ko lai. Pathian nih a zoh mi cu thil dang si lo, kan thinlung Amah caah si maw, kan pek maw, ti mi longlong kha asi. Pathian he ahman mi thlarau lei i pehtlaihnak ngeih ding tluk in a herh mi vawlei cungah zeihmanh a um lo. Cu nun cu ahopaoh ngei hna seh ti a kan duh. Asinan, kan minung sinak, derthawmnak nih a kan tei lengmang i keimah ka ti khawh, ka tuah khawh, ka kawl khawh, ka thiam, ka sang kan i ti sual lengmang. Cu tikah, kan tla than lengmang.

Cucaah, Paul nih a kan cawnpiak mi, zeizong vial te hi Pathian thawng longlong in asi ko ti mi hi kan nun ah i tlaih peng uh sih law, Amah tu kha sunparnak pe lengmang ko uh sih tiah sermon tawite kumkhat tlin nak lawmhnak bia chim bu he thazang lak pah ding in kan sawm hna.

Sermon rel ton tu, thla a ka cam piak tu nan dih lak sinah lawmhnak tampi ka ngei, Pathian nih thluachuah in pe chinchin ko hna seh!

Pahniang

Manila, Philippines

///////////////////

A sannak phanh hnu thlacam

Mark 6:46 A zultu kha a kalter dih hna hnuah anih cu thlacam awkah tlang cungah a kai

Teinak kan hmuh tikah, onnak kan hmuh tikah, minthannak kan hmuh tikah, sermon hna crusade hna camping hna kan tuah dih tikah, thil pipa kan tuah dih tikah khoi ka ah kan kal ton? Minih thangthat awkah an ra lai, lawmhnak bia chimawkah an ra lai, zei thinlung dah kan ngei cang? Lawmhnak bia a chim tu ding hna kha a bawh in kan bawh sual hna maw? hihi, sualnak ah a kan luhpi kho tu an si, kan i ralring ngaingai a hau. A sang pi kan phan cang kan ti lio ah, a kan tlak ter tu le tlak fawi taktak mi si. Hi ban tuk tukforhnak hi a hopaoh nih kan ton lengmang mi thil a si.

Mark 6:46 i a cung lei kan zoh ah cun, Jesuh nih nga pahnih le chang panga in minung thongnga rawl a danghnak kong asi. Thil lianngan a tuah dih hnu bak asi. Zeitindah a si khawh tiin zultu hna he pakhat le pakhat i ceihnak, discuss tuahnak can hmanh a pe hna lo. A dih bak in a zultu hna kha lawng chungah a luhter hna, cun Bethsaida lei a kal ter cawlh chung hna i, anih tu cu thlacam awkah tlang cungah a kai. Jesuh nih amah nawl in a tuah mi zeihmanh a um lo. A Pa thawng longlong in a tuah mi si i APa kha thangthatnak le sunparnak a pek hmasa peng. Cutikah Satan tukforhnak zong a tei dih peng. Jesuh hmanh thla a cam lengmang asi ahcun kan nih teh zeitluk in dah thlacam kan herh chinchin lai ti hi kan ruat bal maw!

Voikhat ah, kan khua (tlang hram lei) ah crusade an tuah i, adonghnak zanlei sang ah, saya pakhat nih a piang thar mi nan kut thlir uh, a ti. Cun, milu a rel hna i, khah, cuzat thlarau tlau ka tlaih hna tiah list a lak i khrihfa upa pawl a pek ta hna. Program dang ka ngei rih a ti i a kan tlun tak. Khua ka ruat ngaingai mi cu, Thlarau tlau mi tlaih khawhnak hi minung tuah khawh mi si hnga maw? David nih milu a rel ban tuk asi i, mah pumpak thangthat duhnak thinlung a chuak cang tikah Pathian a lang kho ti lo, kan i ralrin awk a herh ngaingai. Cucaah, thluachuah kan hmuh ding tluk in kan hmu ton lo lengmang nak cu asi. Jesuh nih a kan hmuhsak mi lamtu hi zulh khawh i zuam hna uh sih.

Cucaah, Pathian thawngin khuaruahhar in thil kan tuah khawh mi, teinak kan hmuh mi hna a um tikah arannak in Pathian sinah kal i kanmah te longin caan lak in thlacam hi a herh ngaingai. Cutikah Satan pa zong nih kan nun ah hmunhma a la kho ti lai lo. Kan nih unau rawl kan dih lak hihi i ralring cio hna uh sih, Pathian longlong kha panh lengmang ko uh sih, zeitik hmanhah philh hlah uh sih. A mah longlong sunparnak kan pek peng a siahcun a ra lai mi thlichia le tilet zong kan tei dih ko lai.

Nan cungah Pathian thluachuahnak um ko seh!

Pahniang

Manila, Philippines

//////////////////////////

Pathian he naih le hlat

Jeim 4:8 Pathian cu naih u law an naih ve hna lai

Immanence = Pathian cu kan pong ah naih tein a kan um pi nak
Transcendence = Pathian cu kan sinin aa hlat tuk nak in a kan zoh nak

Pathian cu van le vawlei ser tu a si i khoika poah ah a um mi si. Pathian he naih le hlat kan ti tikah hin lenglei i hlat le naih kha si lo in, Pathian thinlung chung in, kan thinlung chungin naih le hlat tu kha a sawh duh deuh mi asi lai.
ZTC, Falam ah siangin ka kai lio ah, nikhat cu class chungah saya. Dr. Do Sian Thang nih blank paper cheu li ah cheu khat cio khi a kan phawt i, Immanence le Transcendence ti mi hi tial uh a kan ti. Ca tlap ka zoh tikah a faate long si fawn, ka tial duh mi le tam ngai, Immanence long ka tial hmanh ah a khat cang. A hnu lei he a hmai lei he khat dih lak in ka tial. Grade point 1.75 long ka ngah. Ka hawi pa Zawzaw (Zaw Lat Aung) cu
Immanence = daily bread
Transcendence = over drinking
ti mi te long hi a tial i full mark bak a ngah. A idea um tu ning cu, immanence nih hin Pathian nih kan sinah naihtein a kan um pi i, kan i fenhaih awk, kan ei din awk vial te zong a kan zoh khenh, a kan um pi, a kan tuarpi, a kan lawmhpi, a kan hnemh i a kan hruai ti kha theih i Pathian ttihzah bu tein nun kha asi. Ka hawipa nih transcendence hi over drinking tiin a langhter tikah, Pathian cu ka pong ah um loh, hlat tuk nak in a um, ka duh poh in ka um lai, ka ding lai ti kha asi. Pathian kan pongah mithmuh in um sehlaw kan tuah ngam lo dingmi thil kha, kan tuah tikah Pathian cu kan pongah a um lo ti kha kan tuah sernak nih a langhter ko. Bawi le kan saya te hmai ah kan duh paoh kan tuah ngam lo, kan um ngam lo.
Nihin ah ka chim duh mi cu, Pathian nih Thlarau Thianghlim in a kan um pi peng ko ti hi cu hopoah nih kan chim dih mi asi ko lai nain, kan tuahser nak nih hin Pathian cu kan sinah a um lo bantukin, hlat pi ah a um ban tukin le kan tuah mi thil hi a kan hmu kho deuh lai lo bantukin kan um sual mi tu kha asi. Khrihfa nun hi theih le chimh thiam kha asi lo, nunpi tu kha asi. Sermon hna thiam tuk, chimh le rel hna thiam tuk ttung i a nunpi huam lo mi nihin ah tampi hmuh asi. Zeibantukin Pathian nih a ka umpi ko kan ti len kan chim len zongah ningcang loin kan nun, kan ei, kan ding, mi kan hleng hna asiah cun, cu kan tuahsernak nih cun Pathian nih a umpi lo mi, Pathian he aa hlat tuk mi kan si ti kha a langhter ko. Pathian cu naih uh law an naih ve hna lai tiah a kan cawnpiak bantukin, Pathian he naih tein um hi kan mah cungah aahngatchan (a mutti) hmasa mi asi, khrihfa nun ahcun kanmah nih va naihhmasa le va tlaihchan hmasa le va bochan hmasa a herh mi si. Cuticun, Pathian nih tawin a kan lak dih ve lai. Pathian nih thluachuah in pe cio ko hna seh!
Pahniang
Manila, Philippines