Mi nih a tuh ning in a zuun ko lai

Gal. 6:7-9

Minung nih phunglam a ser hlan in Pathian nih phunglam a rak ser cang. Vulei lei phunglam le thlarau lei phunglam in tthen khawh a si. Lung cu van lei ah na hlerh ah cun na tha chuah mi a dih cun tanglei ah a tla tthan ko lai. Zeicatiah vulei tang I hnuh tu phunglam (law of gravity) a rak um. Mah phunglam hi Pathian nih a rak ser mi a rak si I a tu tiang ai leet lo. A um peng i a hman peng ko. Hi phunglam bantuk in leet khawh lo mi thlarau lei phung lam a um ve. Kan tuh mi hi kan zuun lai. Ahohmanh kan luat lai lo. Pathian nih a ser cang mi a si. Pathian bia nih, nanmah le nanmah i hleng hlah uh” a hohmanh nih Pathian cu an deh kho lo, mi nih a tuh mi cu a zuun ko lai a ti. (Gal. 6:7).

Kanaan mi hna cu Judahmi hnih an tei hna, Bezek khua an siangpahrang Adonibezek zong an tlaih i Judahmi nih an siapi hna le an kepi hna an tan. Cun cu chung i Adonibezek i a chim mi cu “an cabuai tawi ah rawl ttilttawt an hcar tawn: ka rak tuh bangin Pathian nih a ka rulh ve cang (Biaceihtu 1:7). Mah hihi, a hman tuk mi bia a si. Mi nih an tuhmi an zuun ko lai ti a fiangter. Kan tuh mi kan zuun lai kong hi i fiang taktak usihlaw Pathian zong kan ttih deuh hnga i sual tuah zong kan I suum deuh dieh hnga.

1. Na tuh mi na zuun lai:

Jacob nih a tuh bangin a zuunnak kan zoh hmasa lai. Isaac nih a tar nawn I khua tthate i a hmuh set lo hnuah a fapa u pa deu kha ramsa va kap law rawl thawten ka chuan piak law ka ei lai i cu thlu cun thluachuah kan pek lai a ti. Cu bia cu a nu Rebekah nih a theih tikah a nau Jacob kha a kawh i meheh that law kan chuan lai i na pa na va pek lai i thluachauh an pek lai a ti. Jacob nih a ngamh lem lo nain a nu nih a hnek caah meheh pahnih cu a thah i a nu nih a chuan hnuah Esau angki kha aa hruk. Cun a langhnak ah Esau lo ning tiin meheh phaw in a nu nih a tuam. Cu hnuah Esau ka si a ti i a pa cu rawl cu a va pek. Isaac nih a hal leen nain a hlen caah Esau ah a rel i rawl a ei dih in thluachuah tthattha cu a pek. (Gen. 27)

Sihmanhsehlaw kum tam nawn a rauh hnuah Jacob nih a tuh mi cu a zuun. A tar lei sang ah a fapa dawt Joshep cu a u le zoh ah a fial i a va kal. Joshep cu an rem lo mi le an hnachuah mi a si caah thah an timh. Reuben an u pa cem nih a nawl hna ruang ah that tthan loin chawlet pawl sinah an zuar i Igypt ram ah sal ah a cang. A u le nih meheh an thah zau I Joshep angkileng kha an phoih I thi cu an neh i an pa sinah an kal pi. Cucu a hmuh tikah Jacob cu a ttap leen. A tuar in a tuar kho lo. Hlan deuh ah a pa kha meheh a thah I a rak hlen bantukin a tar lei sang ah a fa le nih meheh an thah ve I an hlen ve. Jacob nih a tuh mi a zuun. (Gen. 37)

Esther cauk kan zoh tikah Haman zong nih a tuh mi a zuun ve. Esther a pu Mordekai nih midang bantuk in a kun piak lo ruangah a thin a hung i siangpahrang kha tthate in a chimh ruang ah Judah mi an dihlak thah dih ding in nawl a chuah. Chun tlawmpal ah Mordedai tlaihnak dingah thing dong sawmnga a sau mi an saih ter hna. Sihmanhsehlaw Judah mi hna le esther bawinu an thlacamnak Bawipa nih a leh hna i Haman tthat lo le hnachuah bia a si kha an phuan tthan. Cucaah Haman nih Mordekai tlaihnak ca i a rak timh mi thing cungah khan a mah leh lam tu kha an tlaih. (Esther 7:10). Phungthluk nih “midang thlaknak caah khur a co mi cu cuka ah cun a mah a tla lai. Midang nenhnak caah lung a hriltu cu cu lung nih cun a mah a nenh lai” a ti mi kha a hman tuk. Pathian bia nih a kan chimhning in a si cang i a si peng fawn rih ko lai. (Phungthlukbia 26:27). Cucaah kan philh lo awk cu, “Na tuh mi na zuun lai” ti mi hi a si ko.

Tuhmi hi zuun colh a um tuk lem lo. A tuan le a tlai cu Bawipa nawl a si. Kan cathiang tthate kan rel tikah a fiang tuk mi a si. Kan zoh hmanh lai, Siangpahrang pakhatnak kan rel tikah Ahab le a nupi Jezebel nih Naboth kha a mi sur dum an chuh duh ruangah a thah i a dum zong cu an i lak beh. Chikkhat te ah an tuhmi a zun ter colh hna lo. Kum thum a rauh hnuah Ahab nih a zuun. Syria ral a va dohnak ah fei nih a hliam i lampi ah a thi. Rangleng cung i a thi kha, hlan i Ahab an thahnak hmun ah rangleng mawngtupa nih a va ttawl. A thi kha uico nih a liah ti kan hmuh. A nupi Jezebel zong Naboth an thah ter hna hnu kum hleithum hnuah thlalangawng in a tla i vui awk hmanh ttha loin uico nih a sa an ei ti kan hmu ve. (1 Siang. 23; II Siang. 9). Ahab le Jezebel nih an tuh mi kha hnu deuh ah an zuun bantuk in kannih cio zong thil ttha lo kan tuah mi hi a can a cut tikah kan zuun hrimhrim lai.

Pastor Za Thio nih a chim mi: U Lian Nawn (tlangpi) nih a chim a ti, “kan hnu lei deuh ah khan Tahan ah a pem mi kan mah lei pa nih vokfa a cawk i a zuat. Sau a zuat zong ah a tthang hlei lo i an pa nih cun a hmul a meh a meh zau i ttumtting a huh hnuah sathau a thuh i Tahan bazaar ah a va zuar. Mizopa mit a hlan dom i a va cawk. A zuat ve hnik cu a tthang duh ti lo. Cu tikah a hao a check i vok tthang kho lo mi a si kha a hngalh. Cucaah an tuah bantuk te in a hmul cu an meh i ttumtting a nalh hnuah sathau cu a thuh ve i Tahan bazaar ah cun a va zuar ve. Kha hlan i a rak ngeitupa nih khan vokfa ka caw tthan lai tiin a va kal i zei thei lo in ka mit a ka hlang ai ti in cu vok cu a cawk. A zuat hnik cu bei dong a si ko. Tthan ruam ai tim ti lo. Kannih chung vokfa cawkmi poh ziah hi ti an si a ti i a vun check taktak cun a hlan i mi a hlen hna i a rak zuar mi vokfa kha a rak si.”

Cheukhat cu an fa le nih an zuun tawn. Dr. Steven Hre Kio nih a chim mi cu, “hi dir hmun ka phak khawh hi, Ka pa a rak tuh mi ka zuun mi a si” a ti. Tthatnak na tuah maw, na zuun hrimhrim lai; chiatnak na tuah maw, na zuun hrimhrim lai. Na fapa le na fanu le na tule ding tiang na dawt hna ah cun sual hi ttih ko.

“Mi nih a tuh ning in a zuun ko lai”