Harnak Chungah Hnangamnak

Theihternak: : Pathian lam hruainak thawngin zarhpizing fatin zarhkhathmanh bau lo tein sermon toite ka rak thlah nak hi kumkhat le thla thum asi cang. Pathian thawngin ka sianginn kai zong a dih cang caah hmaizarh in cun ka tlung cang lai. A can hman tein le zarhfatin punghman tein cun ka rak thlah kho ti lai lo, a ruang cu, ka room ah internet um ti lai lo, cun kawlram cu theih bang in electric punghman ngah lo tikah kan duh can ah computer kan hmang kho ti lo, cun, internet a man in va hman a hau cang lai, lai lei ah cun Sunday ni hi cu i manh lo ngaingai a si fawn tikah, nihin hi punghman tein le caan hman tein ka rak thlah ton mi ah cun a donghnak si ko lai. Thlacamnak tu in i bom hna uh sih law, Pathian nih a herh a ti ah cun punghman tein, pehzulh tein thlah khawhnak lam zong a tuah te ko lai! Sermon toite a rel ton tu, a rel tu nan dih lak cungah a Bia Thiang hi nun ter seh law, a thluachuah phuntling he in um pi ko hna seh!

Harnak Chungah Hnangamnak

John 16:33 "daihnak nan hmuh nak hnga,……….. vawlei nih hin har nak an pek hna lai, sihmanhselaw ttih hlah uh, vawlei cu ka tei cang" tiah a ti.

Hmasa bik ah Daniel 3 hi kan dih lak in rel ta hna uh sih. Cu longlong ah a tanglei kan chim mi hi kan i fiang kho deuh lai.

Hi Judah tlangval hna pathum Shadrak, Meshak, le Abednego hna an tuan bia chung in, ni hin kan khrihfa si nak ah i zoh chunh ding tam pi hna lak ah :Pathum in langhter ka duh:

Pakhatnak ah: An Zumhnak

Pathian an zumh nak hi khuaruah har asi. Zeicatiah cun, Pathian nih "Nebukkhadnezzer Siangpahrang nih meiphu chung ah an paih hna lai i, kan khamh te hna lai" tiah bia a kamh ta hna lo ti cu a fiang. Zeicahtiah cun, an leh nak bia fang kan zoh tikah, " a kan khamh khawh ah cun a kan khamh ko lai, a kan khamh lo hmanh ah" an ti. Cu caah Pathian nih bia a kamh ta hna lo ti cu a fiang, asinain, an zumhnak cu khuaruah har a si ko. Ni hin ah kan nih zum tu hna cu, Pathian nih bia tam pi a kan kamh. Cathiang chung ah Pathian nih bia a kan kamh mi tam pi a um. Asinain, kan zum ngam lo. Shadrak, Meshak, le Abednego hi zoh hna hmanh, Pathian nih zeihmanh bia a kamh cia hna lo nain, an zumh nak a ṭhawng tuk. An zumh nak hi, i zoh chunh awktlak hrimhrim a si.

Pahnihnak ah: Zumh Awk Tlak an si nak

Hi tuan bia ah hin kan theih awk pakhat cu, Siangpahrang nih milem hmai ah a kun ter mi hna hi, ni fa tin a si lo, zarhkhat voi khat zong a si lo i, thlakhat voi khat zong a si lo. Milem dedication tuah ni (phuntpuai kan ti lai cu) long ah a biak ter mi hna a si. Asinain, Shadrak, Meshak, le Abednego hna cu, cu voi khat te biak ding, kun ding zong an duh lo. Mi nung hmai le Pathian hmai ah zumh awk tlak in an nung. Pathian hi khoika poah ah a um ti mi le, zei kan tuah poah ah a kan hmuh, a kan theih ti mi hi cu kan theih cio ko lai dah! Kan rian tuan nak ah, kan hawi le sin ah, kan mah long kan um lio ah, tangka hna kan tlaih nak ah, thil hme te ah si seh, thil ngan pi ah si seh, Pathian hmai le mi nung hmai ah zumh awk tlak in kan nung maw? Milem hmai ah ka kun lo kan ti ko lai, zuu hmai hna ah kan kun maw, thatlo nak a phunphun hmai ah kan kun maw? voi khat te kan ti mi zong hi a poi ngai lai dakaw? A ho hmanh nih an ka hmuh lai lo kan ti maw? Shadrak, Meshak, le Abednego cu voi khat te zong an ti lo., Pathian hmai ah zumhawktlak te in an nung peng. Hi Judah tlangval pathum hna "zumhawktlak an si nak:" hi i zoh chunh hna uh si. Tlangval te dakaw an si rih. Na fel ahcun na fel man cu na hmuh hrim hrim lai.

Pathumnak ah: Harnak Chung ah Hnangamnak

Meiphu chung paih an si hlan ah cun, hri in an ṭem hna i, zalonnak an ngah kho lo. A sinain, meiphu chung an paih hna hnu ahcun, zalonnak an hmu. An ṭem nak hri te long a kang. Zalong te in meiphu cung ah an tlawngleng kho. Khat lei in chim ah cun meiphu chung ah hnangam nak an hmu. Nihin ah, Satan nih a kan ṭem ton nak hri vial te Zisuh nih a kan chah piak dih cang i, hi vawlei cung kan nun chung har nak phun za kip chung ah um ko hna hmanh uh sih law, Zisuh he cun, hnangamnak, daihnak le lomhnak he kan leng ti peng kho cang. Cu hnangam nak cu kan ngei maw?

Vawlei cung hi har nak long te in a khat hrimhrim ko. "Duh tlin lo nak ram" an ti i a hman taktak ko. Mi rum nih rum chin lengmang a duh. Fimnak a cawng mi zong nih sang deuh chin lengmang duh asi. Khrihfa a si lo mi caah ka vun tuak tikah hin hnangamnak hrimhrim a um lo. Mi rum pawl khi an hna a ngam lai tiah na ruah ko lai, an rum deuhdeuh an lung re a thei deuhdeuh. Ṭhat lo nak in a khat mi vawlei: zerngeihnak, mi zawmhtlaih nak, kei mah ti mi thin lung ngeih nak, mi ṭhan chonak phih ti ban tuk hna hi, Zisuh kan chung ah a um lo ah cun kan tei kho lai lo i, hnangam nak zong kan ngei kho lai lo.

Har nak na ton tikah na ngeih chia hlah, zeicatiah, Zisuh nih pei, Vawlei nih har nak an pek hna lai a si cu. A lomh hmanh kan ni lawmh deuh ding a si ka ti. Zeicatiah cun , Pathian fa pa Zisuh nih a rak chim ta mi bia kha kan cung ah a tlun ve tik ah, a fa kan si nak tehte (witness) a langhter deuh tu khi asi.

A dongh nak ah Zisuh nih "ṭih hlah uh, vawlei cu ka tei cang" a ti. Zeithil kan ton poah ah, zei ban tuk har nak kan ton poah ah, Zisuh i bo chan in hnangam te in um kha vawlei tei cu a si. Cu cu "Har nak chung i hnangamnak" cu a si.

Pahniang

Manila, philippines

/////////////////

Abraham Pathian, Isak Pathian, Jakob Pathian

Exo. 3:6 Kei cu na pa i a Pathian, Abraham Pathian, Isak Pathian, Jakob Pathian kha ka si,”

Kei hi Ciainn khua ah ka chuak. Ka nu le ka pa khua asi mi Dongva le Phaipha le an rak tthan nak khua Hmawngtlang khua hna ka phan tikah: na pa he (or) na nu he hawi kom tuk kan rak si, na pa he bawlung chuih tti mi kan rak si, na pa he kan i kom tuk, kan rak i daw tuk tiah a ka ti mi hna sin ahcun, ka pa a hawi ttha le an rak sinak nih khan ka hna an ka ngamh ter i keimah inn um bantuk tein ka um i, ka ngamh hna, ka tlaihchan deuh colh ve hna. Ka phanh ballonak khua hna i: na pa a hawi ka si, na pa he kan rak i kom ngaingai tiah an ka ti ahcun ka hna a ngam ngaingai i ka ngamh deuh colh ko hna.

Exo. 3 chung ah Pathian nih Moses cu ruah lo piin (Moses nih aa tinh lo mi, aa theih lo piin) a rak chawnh tikah, Pathian nih amah tein theih hngalhnak a tuah colh mi cu: Kei cu na pa i a Pathian, Abraham Pathian, Isak Pathian, Jakob Pathian kha ka si,” ti hi asi. Pathian nih Abraham, Isak le Jakop hna sinah khuaruah harnak phunphun a rak tuah, a rak zoh khenh hna, thluachuah a rak pek hna i, biakamnak zong a rak pek hna. Cu hna i an Pathian cu Moses a pa zong nih a rak biak, cucaah Pathian nih na pa i a Pathian ka si, a ti nak zong kha asi. Moses caah a hna ngam deuh ngai lai, asinpi deuh ngai lai i a tlaihchan colh deuh lai! Pathian nih kan pipu hna, kan hmai i a kal chung mi hna nun in a kan cawnpiak, a kan chawnh lengmang ton.

Cu hna i Pathian cu nihin ah kan biak mi Pathian hi asi ve! Aa thleng bal lo mi Pathian asi: Abraham, Isak, Jakob hna i Pathian, David thluachuah pe tu Pathian, Moses hruaitu Pathian, profet (Elijah, Elisha) hna hmangin riantuantu Pathian, ca thar chung i lamkaltu hna hmangin khuaruah harnak le thawngtha karh tertu Pathian cu nihin ah nang le kei nih kan biak mi Pathian cu asi ve. Cu tlukin a Lianngan mi Pathian, huham ngei mi Pathian, sunpar lianngannak he a khat mi Pathian cu kan nih kan nunnak ah teh kan hmai i a kal cang mi kan pipu hna bantukin a sunparnak cu kan langh ter kho ve maw? zeite hmanh kan langhter kho ve lo ahcun Pathian kan zumhnak hi kan i check tthan a hau ngai lai. Hlan lio i kan pipu hna sinah a rak tuah mi bantuk bak kha a tuah tthan ve lai kan tinak cu a si lo nain, zumhnak in kal nak lam thluan ahcun khuaruahhar nak, Pathian sunparnak le tehte khan ding tete cu ngeih lengmang ding le hmuh lengmang ding kan si. Pathian nih a hruai mi le a um pi mi kan si ahcun kanmah kan sining le thil kan tuah kho mi nakin thil lianngan deuh a tuah kho lengmang ding mi kan si.

Cucaah, Abraham Pathian, Isak Pathian, Jakop Pathian ti mi nih a kan hmuh sak mi cu: zumnak lei in kan pa, kan pi, kan pu hna nih an kan hmuh ter mi Pathian lianngannak kha nihin ah nangmah ca zong ah asi ve, na langhter kho ve, zeicahtiah cun kan biak mi Pathian hi aa khat mi asi i aa thleng ballo mi Pathian zong asi. A toinak in chim ahcun, an mah sinah cutin ka rak tuah, nang zong zeihmanh phang hlah, ti hi asi ko. A tuah lo belte ahcun kan mah lei chambau ruangah le an mah bantukin Pathian kan rak tlaihchan lo, bochan lo ruangah asi ko hnga!

Pahniang

//////////

Awl zannak lam kawl hlah uh sih

1 Samuel 26:10, Bawipa nih a thah te ko lai; a si lo ah a thih ni cu a phan te ko lai; a si lo ah raltuknak hmun ah a kal lai i a lo tlau te ko lai

Thintoi le lungran ruangah hin thil tuah sual mi le palh sual mi a tam khun ton. Pathian nih a caan a khiah mi (timing) kan hngak khawh ti lo ahcun palhnak le thil tuah sual nak a chuak lengmang ko. Kan bible chungah Pathian (timing) a hngak kho mi le a hngak kho lo mi tiah kan hmuh hna.

Pakhatnak ah, 1 Samuel 13:7-14 chungah, Saul cu Pathian timing ningin a ra mi Samuel kha a hngak khawh ti lo caah amah rian a si lo mi khanghthawinak kha a tuah. Cutikah Pathian aa lawm lo, Saul cungah Pathian thinhunnak a tlung.

Pahnihnak ah Pathian timing a hngak mi David cu 1 Samuel 26:6-11 ah kan hmuh khawh. Saul nih hin David hi zer a ngeih caah thah ding in a kawl. David cu a nunnak caah a tli lio mi asi. Cu lio ah cun, a ral si mi Saul cu a ral kap pawl he an i hngilh cuahmah lio ah that ding in Abishai nih “Pathian nih nihin ah hin na ral cu na kut chungah an pek ko; cucaah fei in voi khat chunhte ah amah hi vawlei ah bunh chih ko ning, voi hnih ka chun lai lo,” tiah a ti. Sihmanhsehlaw David nih Abishai cu, “Amah kha hrawk hlah; “Bawipa nih a nun bangin, Bawipa nih a thah te ko lai; a si lo ah a thih ni cu a phan te ko lai; a si lo ah raltuknak hmun ah a kal lai i a lo tlau te ko lai” tiah a ti. Angaingai ahcun, David cu prophet Samuel nih Siangpahrang na si lai tiah chiti a thuh mi a rak si cang (1 Samuel 16:12-13) tikah, lawlawse siangpahrang asi mi Saul cu thah sehlaw, a tlik zong hau ti lo i, Pathian nih lam ttha a ka serpiak mi bak si, ka kut chungah Saul nunnak a ka pek tiah ruah awk a fawi tuk ngaingai mi asi. Abishai a chim mi zong hi ruah awk tha le a hman ngaingai mi a si ko nain, Pathian timing tu cu a rak si lo. David cu awl zannak lam a kawl lo i, Pathian khiah piak mi caan (timing) tu kha a hngak!

Kan nih hna zong, rian kan tuan nak ah, thil kan tuah nak ah, a bikin chawleh nak (sipuazii) kan tuah nak ah thil dik lo in tangka tam deuh le fawi ngai in ngah nak ding hna asi ahcun Pathian duh nak asi hnga maw ti zong ruat ti lo in Saul ban tuk in Pathian duh lo nak kha kan tuah sual awk a fawi ngaingai ko. Pathian sin ah ruahnak hal le thlacam zong um ti lo in, kan thinphan ruangah, sungh ding ttih ruangah, tangka ruang hna ah Pathian timing hngak ti lo in thil kan tuah sual ah cun Saul bantuk kan si ko lai. Thil awl zannak (phiat lan = shortcut) in tuah ding ah hneksaknak hna hi kan nunnak ah voi tam pi a ra ton. David nih cun cu hneksaknak cu a tei khawh: siangpahrang sinak ah awl zannak lam a kawl lo, Pathian timing tu a hngak.

Kan nih hna zong zei kan tuah poah ah awl zannak lam nak in, David bantukin kan i ruahchan tuk mi thil pakhat a rak si zongah Pathian timing tu kha a hngak mi kan si khawh nak hnga Pathian nih thluachuah rak kan pe cio ko seh!

Pahniang

Bawipa bochan, Nun I zoh than

Sam. 37:4-5 Bawipa kha i bochan uh law nan lungthli tum kha an pek hna lai. Na nunnak kha Bawipa pe law, amah kha i bochan law amah nih an bomh lai

Bawipa kan i bochan ahcun kan lungthli tum kha a kan pek hlei ah, amah nih zei kan tuah mi poah ah a kan bom rih lai. Nithaizing ah kan dih lak Sam 37 dih lak hi rel hrimhrim hna uh sihlaw, kan nun i zoh than hna uh sih. Bawipa kan i bochan taktak maw, a kan timh piak mi lam ah teh kan kal maw ti hi kan nun i zoh than hna uh sih.

Parpar hi abu te in an um tikah, asi lo le, pangpar um in ningcang tein chiahtikah zoh aa dawh hringhran. A hmu tu hna thinlung a nuam i mi thinlung adam ter. Khi pangpar khi pakhat tete, phunkhat tete in ram chung ah an um cio tikah zoh aa dawh tuk lem lo. Asinain, abu tein an vun chiah i an vun ţamhmawih tik ah aa dawh khun i a hmutu, a zohtu caah zoh aa dawh i thinlung zong a nuam. Mirang phungthluk ah ‘Hnawm ti mi hi a um lo, a mah a umnak ding hmun le zawn te i a um lo mi lawng khi hnawm an si,’an ti. Pangpar pakhat hi zeltluang hna ah rak um sehlaw a um nak ding hmun a si ti lo caah hnawm ah aa cang ko. Cucaah, kan um nak ding hmun i kan um lo tik ah midang caah hnawm si sual a fawi te, cucaah kan um nak hmun le kan tuah mi pawl hi i zoh than lengmang ding hi a herh ngaingai.

Mifim Socrates nih cun, Un-examining life is not worth to live (nun i zoh/ i check than lengmang nak a um lo mi cu nun a phu lo) a rak ti. Ho dah ka si, zeidah ka tuah, zeidah ka tuah awk asi ti mi hi i theih ngaingai a hau. Khrihfa mi nih kan um lo nak ding hmun ah kan um awk asi lo. Bible ca Pathian Bia in kan nun kan i zohthan lengmang a hau. Keimah hmuh ton mi ah: Philippines ah hin sianginn kai ding in kan ra cio hna i, siang hngakchia asi mi nih cun, ca kha a pakhatnak ah a tuah, a zoh, aa zuam chih ding asi ko. Zeicahtiah, kan rat mi hrimhrim hi sianginn kai dingin kan ra mi asi. Micheu cu, sianghngakchia an si le si lo hmanh theih khawh an har ngaingai cang. Dih ding caan ah dih ti lo, ca zong tuah ti lo, tangka harsa ruang ah le si fawn lo tibantuk kan um pah len. Cu bantuk cu un-examining life zeidah ka rak tuah ti zong a tuak ti lo mi a si cang i, hnawm bantuk asi cang caah, mi caah retheih a si cang. Kan lam kan i palh lo ding hi a herh ngaingai ko. Cucu, sianghngakchia lei kap in tahchunhnak va siseh law, thil dang, rian dang lei zong in kan um nak hmun le kan tuah mi thil hi a dik maw ti kha i zoh than lengmang kan hau.

Khrihfa a si mi nih cun, ka nun hi Pathian ka bochan i ka zumh tak maw, hmurka longin dah ka chim, keimah tuah khawh mi ah cun keimah duh ning longin dah ka kal ton ti mi hi i zoh than lengmang kan herh ngaingai mi asi. Pathian kan zumh ngam tak lo i, kan i bochan lo poah ahcun hnawm kan si ko, cu tikah Pathian nih cu hnawm cu nidongh ni ah hell ah a hlawnh te ko hnga. Cucaah, kan khrihfa nun hi nifatin Bible ca he i zoh than lengmang hna uh sih. Sam 37 cu rel dih hrimhrim hna uh sih. Bawipa nih thluachuah in pe ko hna seh!

Pastor Hniang Uk

Manila, Philippines

/////////////////////////////

Khrihfa nun

1 Peter 4:2, hi vawlei cung i nan nun chung cu, minung duhnak kha si ti loin Pathian duhnak tu kha i ukter cang u

Philippine-Chinese ka hawipa nih, ‘kawlram ah ka kal i, khrihfa nak in pei kawl pawl an ttha deuh cu’ a ka ti. Ziah, ka ti i, ‘kawlpawl cu an inn hmai lampong ah pei mizapi nih din awk ti hna an chiah, ke ttawl nak ti hna an chiah si’ a ka ti. ‘Kawl mi pawl khrihfa an si duh lo mi hi an mawh lo, an mah nak in thil ttha nan tuah khawh lo poah ahcun khrihfa an i cang duh bal lai lo’ a ka ti. Khua a ka ruah ter ngaingai. ‘Tthatnak tuah cu vanram kai nak asi lo’ kan ti hoi hnga maw? tthatnak tuah cu vanram kai nak cu asi lo, a hman ko! Asinan, Khrih kan zumh i kan zulh hnu ah cun tthatnak tuah le mibomh hna longlong in kan nun ah a khat ding asi cang, Jesuh nih a kan cawnpiak mi le a nunnak in a kan hmuhsak mi vial te hi thil ttha tuah le mi caah nun tthat hnem va si nak ding kong longlong asi. A ngaingai ah cun, mi va bomh, tthatnak va tuah le mi bomhtu dir hmun i um khawh te hna hi, Pathian thluachuah a si hlei ah, kan nun a nuam, kan hna a ngam, thluachuah hmuh nak zong asi. Asiah, ziah, kan tuah duh lo can hi a tam deuh ton? Zeicaah dah a si hnga? “keimah, keimah ca” ti mi lungput kan ngei tuk caah asi ko. Tlangcung cawnpiaknak Mathai 5-7 hi a tu le tu rel khawh lengmang i zuam hna uh sih. Cuticun, kan nun ah a kan ciah lai i Pathian duhnak nih khan kan nun cu a uk lai.

Khrihfa nun ti mi hi a ngaingai ah cun mi nih cawn piak ding nak in, mah tein le mah nun in Pathian kha hmuh ton ding tu kha asi deuh. Zeicah tiah cun, Pathian nih kan mah le kan sining cio le kan theih khawh nak cio in pehtlaihna a kan tuah tikah, pakhat pa nih Pathian a hmuhton ning a chimh mi kha, nangmah cungah kha ning theng tein na hmuh ton ve te lai tinak a si lem lo. Pakhat le pakhat thazang i pek kan herh lo ka ti nak si lo. Pathian nih a thin lung duhnak a kan hmuh sak nak Bible kha nifatin rel i cu chung in a Thlarau Thiang nih a kan hrilhfiah nak kha kan zulh ding tu kha asi ko. Nihin ah zeicahdah cawnpiak kan herh tiah cun, nifatin Bible ca rel kan huam lo, can zong kan pe huam lo, thlacam zong kan daithlang chincap tikah Pathian thinlung kan tong kho ti lo i, Pathian duhnak zong kan thei kho ti lo. Pathian duhnak kan theih lo tikah, kan tuah mi kha zei asi ti zong kan i fiang ti lo. Cu tikah kan hmuh kan ton mi a um ti lo i, mi nih an hmuh ton mi longlong kha theih le ngaih kan duh cang. Pulpit cungin chim mi thawngtha longlong rinh kan i timh i, mah tein bible carel le Pathian hmuh ton ding kha kan i thimh lem lo.

Khrihfa nun hi a har tuk mi le siikan a tam tuk mi ah kan ruah. Piangthar kaa te ah cucu na tuah lai lo, khakha na tuah lai lo an rak ti mi hna a tam tuk i asi rua. A ngaingai ah cun Khrih Thlarau ngeih i nifatin Khrih he nun tti, kal tti, um tti, thut dir tti hi zeitluk in dah a nuam ti mi hi hmur le kaa in chimh khawh mi asi lo. Nihin ah Pathian nih siter a kan duh mi le a kan tuah ter mi hi a har tuk mi asi lo. Kan tuah khawh mi te kha a si ko. Deu. 30:11 chung ah ‘Zeitintiah nihin ah kan pekmi hna nawlbia hi nan caah a har tukmi le nan phak leng a si lo’ a kan ti.

Pathian duhnak a tuah peng mi Khrih Thlarau kha kan ngei i kan chungah a nung (Kala. 2:20), cu kan ngeih mi cu kan chung ah a nun tikah a kan cawnpiak i Biatak le lam dik lam hman ah a kan hruai peng tu asi (Johan 16:13). Cucu, kan ngei lo i kan chung ah a nun lo ahcun khrihfa nun cu kan ngei lo tinak a si ko.

Pahniang

Manila, Philippines

////////////////////////////////

A ram le dinnak kawl hmasa

Mathai 6:33 zei dang vialte nakin Pathian Pennak le zeidah tuah hna seh ti a kan duh timi kha biapi deuh in ruat u law thil dang vialte hna zong hi an pek ṭhiamṭhiam ko hna lai

Nifatin kan phan bik ton mi hi a hram pi in cun: ei awk, hnipuan fenhaih le inn le lo kongah a si bik ton. Khatlei in chim ah cun vawlei cung thil le ri kan ti khawh. Kan pumsa nun him nak caah kan kawl dih. Asinain, thlarau zungzal nunnak caah hin (seriously in) zei kan tuak theng lo. Pathian nih biapi deuh in a chiah mi kha kan mah nih biapi ah kan chiah lo i, Pathian nih biapi lo deuh in a chiah mi tu kha biapi bik ah kan chiah. A ngaingai tiah cun, nifatin kan herh mi vawlei cung thil le ri hi afapa Jesuh thih hau lo in fawi tein a kan pek khawh mi le a kan tuah piak mi asi. Zungzal nunnak tu hi cu, fapa ngeih chunh thisen le nunnak liam tiangin pek mi man sunglawi bik mi asi. Nihin ah fawi tuk in vanram ka kai lai tiah kan chim dih! Asinain, nifatin kan nunnak i a herh mi vawlei cung thil le ri, fapa ngeih chuih zong thih hau lo in fawi tuk in pek khawh ko mi tu kha cu, Pathian nih a ka pek ko lai tiah kan chim ngam lo. Zungzal nunnak ca i zumh (ngam) nak le nifatin kan herh mi ei din awk, fenhaih awk a ka pek ko lai ti mi zumh (ngam) nak hi aa khat ko hnga lo maw? ziah kan chim ngam kun lo?

- Pathian caah fawi mi: pumsa nih herh mi vawlei cung thil le ri (afapa zong thih hau lo)

- A har deuh mi: zungzal nunnak (fapa ngeihchunh i thisen le nunnak liam in)

- Minung nih fawituk in kan chim nan, kan nun zong ah kan langhter set lo mi zumhnak: vanram ka kai lai (kan nun nih a chim taktak maw?)

- Pathian caah a fawi deuh ngai ko nain, minung nih kan ngamh set lo mi zumhnak: pumsa nih herh mi vawlei cung thil le ri Pathian nih a ka pek ko lai ti mi.

- Minung nih biapi deuh (oosape) ah kan chiah mi: pumsa duhnak vawlei cung thil le ri.

- Pathian nih biapi deuh (oosape) chiah ding a duh mi: a ram le a din nak.

- Hal hmanh hau loin a kan pek ding mi: pumsa nih herh mi thil le ri le ei-din awk.

- Voi tam deuh kan hal peng mi: pumsa nih herh mi thil le ri le ei-din awk

Keimah thawk in asi ko, Pathian nih biapi deuh in a chiah mi hi chia ve uhsih. Pathian duh ning he lettalam in kan um tik ah phan lo ding kha kan phang, ttih lo ding zong kan ttih, thil dang vial te pek nan si lai a kan ti mi zong kan hmu ti lo.

Voikhat cu Chinese ka hawi pa Bro. Dick nih a ram le dinnak kawl hmasa ti hi zeitindah na hmuh ning si tiah a ka hal. ‘Bible siangin ka kai, ka can ka pek dih, pastor ka tuan’ tiah ruah set lo khin ka hei leh. ‘Cu ti a siah, Bible sianginn kai lo, pastor, evangelist si lo mi pawl teh’ a ka ti. A ka ti mi cu, ‘A ram le din nak kawl hmasa’ ti mi cu zumtu vial te caah a si i, nifatin, zingfatin in zei rian kan tuan hlan ah amah he bia i ruah hmasa, thlacam hmasa, A Bia Thiang rel hmasa, i hoikomh hmasa lengmang tu kha a si. Jesuh zong zingka tein a tho i A Pa he bia aa ruah hmasa lengmang. David, Moses le profet te pawl zong pei zingka tein Pathian mithmai an kawl hmasa lengmang cu. Bible siangin ka kai si, pastor ka tuan si, evangelist ka si si tibantuk in a silo’ tiah a ka ti. Cucaah, a ram le dinnak kawl hmasa ti mi cu cucu ka tuah cang tiah thih tiang a daih mi phun si lo in, zumtu poah nih nifatin Amah kha kawl hmasa, amit hmai kawl hmasa lengmang tu kha asi deuh.Cun, thil dang vial te cu a herh ning in pek kan si ko lai.

Pathian nih, Aram le dinnak a kawlpeng hmasa tu kan si peng nak hnga thluachuah rak kan pek cio ko seh!

Pahniang

Manila, Philippines

////////////////////////

A nung mi pek chan nak

Rom. 12:1 Pathian sinah a nung in pekchanhmi raithawinak bantukin i pe tuah u

Voi khat cu, class chungah kan professor pa nih ‘Pathian biak ti mi cu zeitin dah, zeikhi dah asi; thlacam lio kha maw, phungchim lio kha maw, hlasak thangthat lio long hna kha maw Pathian biak cu asi hnga tiah, a kan hal. Kan class dih lak in kan i ceih tti hna. A donghnak a phi chuak le kan dih lak kan lung a tling ngai mi cu, ‘way of daily life’, ‘nifatin kan nuncan ziaza’ hi asi awk asi, kan ti dih. ‘asi’ tiah kan ti ngam hna lo, ‘asi awk asi’ ti long in kan ti ngam hna. Zeicahtiah, kan nuncan ziaza kan i zoh cio than tikah ‘nifatin ka nuncan ziaza bak hi asi’ tiah kan ti ngam cio ti hna lo. Cu nih a langhter mi cu, Khrih zultu hmasa hna i an nuncan ziaza kha kan thlau thluahmah cang tinak asi. Pual nih cun ‘ka zia ka cawng u’ a ti (I Cor. 4:16), ka nun dan bak hi rak ka zoh uh law, ka palh nak um cun rak ka sawh chih uh ti nak kha asi ko!

Bia ka theih ton mi ah, pastor pipi nih (asilo le) pastor fale nih, evangelist fale nih, cu ti an um ding si tung lo, tibantuk hi ka theih ton. Minung cu kan theih mi, kan ruah mi le kan pom mi ning in khan kan nun (action) ah a lang ton caah, kan ruah nak le kan pom nak hna hi ahman mi le Thlarau lei mersannak asi dingmi tu ah khan kan thlen a hau ngaingai. Zangfahnak chan, khrihfa kan si nak ah pastor caah, evangelist caah, pastor fale caah, mibu pi (member) caah tiin nuncan ziaza he pehtlai in a dangdang in Jeush nih ri a kan khiah piak mi a um lo. Minung nih khiah piak mi cu a um kho men! Khrih zultu kan sinak ah siter a kan duh mi hi ahopoah kan i khat dih, a nih kha dingfel deuh seh, anih kha cu a sual deuh zongah a poi loh tibantuk a um hlei lo. Pastor pawl cu an dingfel deuh ding asi tiah ruahnak kan ngei mi nih zeidah a chuah ter tiah cun mibu pi (member sawhsawh) cu zeiti poah kan va um zongah apoi lem lo ti mi ruahnak a chuak i, cu nih cun i sum duh nak um ti loin kan nuncan ziaza hrawhral nak tu ah a chuah ter ton. Nihin zangfahnak chan ah Pathian rian a sang deuh mi le a niam deuh mi tiin a um ti lo. Kan dih lak Pathian rian tuan tu kan si dih ko (kan hnuzarh ah kan chim mi he peh zulh in rel ah cun a fiang deuh lai).

Pastor te cu hmai lei in mipi hruai tu an si caah zohchunh awktlak deuh in um ding asi ko ti cu a hman ko ee, asinain, hibantuk thinlung kan ngeih mi nihhin mipi (members) thinlung ah, kan nih tham cu a va ning deuh ti phun in nuncan ziaza le dingfelnak lei ah zuam duh nak um loin, daithlangnak tu a chuah ter lengmang sual lai ti mi tu kha kan chim duh deuh mi cu asi.

Lev. 1:13-17 chungah rim a thaw i Pathian sin a phan mi khanghthawi pekchanh nak cu Pathian nih zeitin tuahdan ti kha fiangtein a chim hna. Pathian sinah pek cang mi khanghthawinak hi kanmah ta a si ti lo, Pathian ta asi cang. Pathian nih cun, an ngeih mi lakah a ttha bik mi le do a tla mi long kha a cohlang ton hna. Pathian nih minung a kan khamh tik zong ah, minung hna lakah minung sinak tlamtling tein a ngei ve tung i sualnak a ngei lo mi, do a tla mi Jesuh kha minung vialte kan sual ngaihthiamnak ca ding ah khanghthawinak a tuah ve.

Nihin ah kan nih hna zong, biaktheng cungah kan nunnak kha a nungmi pek chanhnak bantukin i pe uh tiah fial kan si ve cang. A nungmi pekchanhnak ti mi hi pastor, evengeslist, CCOC a rak kal mi hna, CMC kal mi hna, missionary a kal mi hna ca long ah asi lo. Zumtu Khrih zultu kan dih caah asi. Ca hlun chung bantukin Pathian sinah pek cang mi cu lak than khawh asi ti lo, kan mah ta zong asi ti lo i, a cheu bang long zong in pek khawh asi fawn lo. A cheu bang longin kan pek ah cun a tling lo mi pekchanhnak asi lai i cohlang lo mi raithawinak a si hnga. Cucaah, Khrih zultu nih cun a nun kha a mah ta asi ti lo. Nifatin a nun kha pekchanh peng asi cang lai. Can lawn kar teah Amah pek si ti loin, nuncan ziaza dih lak tu kha asi awk asi cang (way of daily life). Cucu, a nungmi pek chanh nak ti mi cu asi.

Pahniang

////////////