Pathian dawtnak, lam hruainak le um pi nak chung ah nan dam lio a si lai tiah zumhnak ka ngei. Pathian bia tlawmpal te forhfial nak le hthangzang pek nak nan sin ah ka rak tial. Cathiang ka thim mi vun rel ta hna uh sih: John 16:33 " Nannih nih kei mah he nan i peh nak thawng in lung daihnak nan hmuh nak hnga, hi hi kan chimh hna, vawlei nih hin har nak an pek hna lai, sihmanhselaw htih hlah uh. vawlei cu ka tei cang" tiah a ti.
Voi khat ah Nebukhadnezzar Siangpahrang nih sui mi lem pakhat, a san pe sawm kua, a ngan pe kua a si mi kha a ser i Babilon ram Dura nelrawn ah cun a dir ter. Cun mangki, zipeng, vuan thok, upadi thiam mi, tangka keng tu, bia ceih tu, ram zohkhenh tu bawi le ram uk bawi vial te hna kha a phun mi milem sunloihnak i tel awk ah cun a cah hna, Cuticun, a cah mi vial te an ra dih i, Nebukhadnezzar Siangpahrang nih aphun mi milem sunloih awk caah cun an i pum , milem hmaiah cun, an dir . Khi tik ah tlangautu nih khan fak pi in a au i, "maw miphun zakip le holh phun zakip hna, nan nih nih muko thawng le ting tang thawng le thonglawi thang le darkhing thawng le tum mi phun kip thawng le hla sak thawng kha nan theih tik ah nan bawk lai i Nebukhadnezzar Siangpahrang nih a phun mi sui milem cu nan biak lai, tiah nawl pek nan si, a bawk lo i, a bia lo mi pauh cu a alh hluahmah mi meiphu chungah paih nan si lai, " tiah a ti, Cu ban tuk cun, Nebukhadnezzar Siangpahrang nih a phun mi milem cu an biak.
Khi tik ah Khaldi mi mi cheukhat cu an ra i Judah mi kha sual an phawt hna. Nebukhadnezzar Siangpahrang cu an chim i, Siangpahrang cu saupi nung ko seh! Siangpahrang nih nawl bia na chuah i, tum mi a phunphun thawng le hla sak thawng a thei mi pauh nih nan bawk lai i, sui milem kha nan biak lai, na ti, Cuban tuk in a tuah lo mi pauh cu a alh hluahmah mi meiphu chung ah paih an si lai, na ti fawn. A si nain, Babilon ram uk nak zoh khenh tu ah na chiah mi Judah mi Shadrak, Meshak, le Abednego hna nih cun bawi pa na nawl bia kha zei ah an rel duh lo i, na phun mi sui milem kha an bia duh lo" tiah an ti. Cutik ah, Siangpahrang pa nih cun, a thinhun le a thin linh in Shadrak, Meshak, le Abednego cu va ko hna u, a ti i annih cu siangpahrang hmai ka ah an hun chuah pi hna. Siangpahrang pa nih cun, a thawh hna i,Shadrak, Meshak, le Abednego nan nih nih ka pathian cu a rian tuan piak nan duh lo i, ka phun mi sui milem cu biak nan duh lo, an ti cu bia tak a si maw? A tu ah tum mi a phunphun le hla sak thawng kha nan theih tik ah, kan bawk lai i, na phun mi milem cukan biaklai , nan ti ah cun a htha ko lai, a sinain nan biak lo ah cun, a alh hluahmah mi meiphu chung ah nannih cu paih nan si colh ko lai; ka hthawnnak chung in an chuah kho tu hna zei pathian tal a um lai , tiah nan ruat maw? tian a ti hna. Shadrak, Meshak, le Abednego nih cun, Siangpahrang pa cu an leh i, "hi kong ah hin kan in leh awk a herh in kan hngal lo; a alh hluahmah mi meiphu chung in kan biak mi Pathian nih a kan khamh khawh ah cun a kan khamh ko lai, a kan khamh lo hmanh ah na pathian cu kan bia hlei lai lo i, na phun mi milem hmai zong ah cun, kan kun hlei lai lo, "tiah an ti.
Khi tik ah, Siangpahrang pa cu a thin a hung tuk i, Meiphu cu voi dang nak in a let sarih in nan linh ter lai tiah nawl a pek hna i, a ral kap bu chung i ral kap thawng bikbik hna kha Shadrak, Meshak, le Abednego cu nan tem hna lai i a alh hluah mah mi meiphu chung ah cun nan paih hna lai, tiah a fial hna. A chim bang cun an tuah: Shadrak, Meshak, le Abednego hna cu htem bu in meiphu alh chung ah cun an thlak hna. Khi ti ah, siangpahrang pa cu a khua ruah a har i therphang ngai in a hung dir. A tlangpi pawl cu a thawh hna i, "meiphu chung i htem bu in kan paih mi hna kha pathum an si lo maw? tiah a ti. "A si" tiah an leh. "A si kun ah cun zeicahdah meiphu chung ah zeihmanh poi lo in aa chok mi mi pali ka hmuh kun hna: cun a palinak cu pathian a lo fawn tiah a leh ve hna. Cun Siangpahrang nih cun a hei auh hna i, "Shadrak, Meshak, le Abednego, Cung Nung Bik Pathian sal hna, hung khuak u law hi ka ah hin ra tuah u" tiah a ti hna. Cun, Shadrak, Meshak, le Abednego cu mei chung cun an hung chuak. An zoh hna tikk ah: an lu cung sam fa fa khat hmanh a kang lo i, an thil thuam kha zeihmanh a kangh lo hlei ah mei rim hman an nam lo. Khitikah, Siangpahrang pa nih cun aa thawh i, Shadrak, Meshak, le Abednego Pathian cu thangthat si ko seh " a ti.
Hi Judah tlangval hna pathum an tuan bia chung in , ni hin kan khrihfa si nak ah i zoh chunh ding tam pi hna lak ah :Pathum in langhter ka duh:
Pakhatnak ah: An Zumhnak(their faith)
Pathian an zum nak hi khuaruah har a si. Zeicatiah cun, Pathian nih "Nebukkhadnezzer Siangpahrang nih meiphu chung ah an paih hna lai i, kan khamh te hna lai" tiah bia a kamh ta hna lo ti cu a fiang. Zeicahtiah cun, an leh nak bia fang kan zoh ah cun, " a kan khamh khawh ah cun a kan khamh ko lai, a kan khamh lo hmanh ah" an ti. Cu caah Pathian nih bia a kamh ta hna lo ti cu a fiang, asinain, an zumhnak cu khuaruah har a si ko. Ni hin ah kan nih zum tu hna cu, Pathian nih bia tam pi a kan kamh. Cathiang chung ah Pathian nih bia a kan kamh mi tam pi a um. Asinain, kan zum ngam lo. Tahchunh nak ah, "Na thih tik ah van ram na kai hnga maw?" kan ti tik ah, ka kai lai tiah a chim ngam lo mi hna tam pi kan um rih. Cathiang nih fiang te in "Fapa a um mi poh cu, zungzal nun nak an ngai cang" tiah bia a kan kamh na in, kan nunnak nih a chim ngam taktak lo i, kan zumh ngam lo. Shadrak, Meshak, le Abednego hi zoh hna hmanh, Pathian nih zeihmanh bia a kamh cia hna lo nain, an zumh nak a thawng tuk. Ni hin, nang le kei si hna uh sih law, Milem hmai ah kan bawk ko cang hnga lo maw. An zumh nak hi , i zoh chunh ding hrimhrim a si.
Pahnihnak ah: Zumh Awk Tlak an si nak (their faithfulness)
Hi tuan bia ah hin kan theih awk pakhat cu, Siangpahrang nih milem hmai ah a kun ter mi hna hi, ni fa tin a si lo, zarhkhat voi khat zong a si lo i, thlakhat voi khat zong a si lo. Milem dedication tuah ni(phuntpuai kan ti lai cu) long ah a biak ter mi hna a si. Asinain, Shadrak, Meshak, le Abednego hna cu, cu voi khat te biak ding , kun ding zong an duh lo. Mi nung hmai le Pathian hmai ah zumh awk tlak in an nung. Ni hin, nang le kei, Pathian hmai le mi nung hmai ah zumh awk tlak in kan nung maw? Pathian hi khoika pauh ah a um ti mi le, zei kan tuah pauh ah a kan hmuh, a kan theih ti mi hi cu kan theih cio ko lai dah! Kan rian tuan nak ah , kan hawi le sin ah, kan mah long kan um lio ah, tangka hna kan tlaih nak ah, thil hme te ah si seh, thil ngan pi ah si seh, Pathian hmai le mi nung hmai ah zumh awk tlak in kan nung maw? Milem hmai ah ka kun lo kan ti ko lai, zuu hmai hna ah kan kun maw, thatlo nak a phunphun hmai ah kan kun maw? voi khat te kan ti mi zong hi a poi ngai lai dakaw? A ho hmanh nih an ka hmuh lai lo kan ti maw?Shadrak, Meshak, le Abednego cu voi khat te zong an ti lo., Pathian hmai ah zumhawktlak te in an nung peng. Hi Judah tlangval pathum hna "zumhawktlak an si nak:" hi i zoh chunh hna uh si. Tlangval te dakaw an si. Na fel ah cun na fel man cu na hmuh hrim hrim lai.
Pathumnak ah: Harnak Chung ah Hnangamnak (Peace in Suffering)
Meiphu chung paih an si hlan ah cun, hri in an htem hna i, za lon nak an ngah kho lo. A sinain, meiphu chung an paih hna hnu ah cun, zalonnak an hmu. An tem nak hri te long a kang. Zalong te in meiphu cung ah an tlawngleng kho. Khat lei in chim ah cun meiphu chung ah hnangam nak an hmu. Nihin ah, Satan nih a kan htem ton nak hri vial te Zisuh nih a kan chah piak dih cang i, hi vawlei cung kan nun chung har nak phun za kip chung ah um ko hna hmanh uh sih law, Zisuh he cun, hnangamnak, daihnak le lomhnak he kan leng ti peng kho cang. Cu hnangam nak cu na ngei maw?
Vawlei cung hi har nak long te in a khat hrimhrim ko. "Duh tlin lo nak ram" an ti i a hman taktak ka ti. Mi rum nih rum chin lengmang a duh. Fimnak a cawng mi zong nih sang deuh chin lengmang kan duh. Khrihfa a si lo mi caah ka vun tuak tikah hin hnangamnak hrimhrim a um lo. Mi rum pawl khi an hna a ngam lai tiah na ruah ko lai,an rum deuhdeuh an lung re a thei deuhdeuh. Hthat lo nak in a khat mi vawlei: zerngeihnak, mi zawmhtlaih nak, kei mah ti mi thin lung ngeih nak, mi hthan chonak phih ti ban tuk hna hi, Zisuh na chung ah a um lo ah cun na tei kho lai lo i, hnangam nak zong na ngei kho lai lo. Mi va huat hi kan mah tu kan ba dakaw.
Khrihah u le nau hna, hruai tu na si nak ah, rian na tuan nak ah, mi na chim hrin ruang ah, thil dik/thil hman na chim/ in na nun ruang ah har nak tampi na tong ko lai. Asinain, na lung dong hlah. Pathian hmai le mi nung hmai ah a hman ning te in nung peng ko. Har nak na ton tikah na ngeih chia hlah, zeicatiah, Zisuh nih pei, Vawlei nih har nak an pek hna lai a si cu. A lomh hmanh kan ni lawmh deuh ding a si ka ti. Zeicatiah cun , Pathian fa pa Zisuh nih a rak chim ta mi bia kha kan cung ah a tlun ve tik ah, a fa kan si nak tehte (witness) a langhter deuh tu khi a si.
A dongh nak ah Zisuh nih "htih hlah uh, vawlei cu ka tei cang" a ti. Zeithil na ton pauh ah, zei ban tuk har nak na ton pauh ah, Zisuh i bo chan in hnangam te in um kha vawlei tei cu a si. Cu cu "Har nak chung i hnangamnak" cu a si. Zisuh kan ngeih lo, kan ni bochan lo a si ah cun, kan thin a phang peng lai i, hnangamnak tlamtling zong kan ngei kho lai lo.
A toi nak in ka vun komh than ah cun (1) Pathian i bochan ngam/ zumh ngam (2) Pathian hmai le mi nung hmai ah zumhawk tlak te in nun le, (3) Zeithil kan ton pauh le, zei ban tuk har nak kan ton paoh ah, Zisuh i bochan in hnangam te in um, hi hna pathum hi a bik in nan cung ah thazang pek le, forhfial kan duh mi hna a si.
Hi ca par (Pathian bia) nih hin na nun nak ah rian tuan hram seh!
Pathian nih thluachuah in pe ko hna seh!
Pastor Hniang Uk
Philippines
//////////////
No comments:
Post a Comment