Kan tei a herh ngai mi hakkauhnak

Phungthlukbia 15:27, A hak a kaumi nih a innchungkhar cungah harnak a tlunter,

Mahatma Gandhi nih the earth can provide your need, not your greed a rak ti i, vawlei nih hin na herh mi cu an pek kho ko nain, na hakkauhnak tu cu an pe kho lo, a ti. Hitler nih vawlei pumpi hi tei dih, uk dih le a kuttang ah chiah dih a rak duh. Cucaah, Hitler bantuk minung pahnih pathum um hna seh law, vawlei pi nih a daih ti hna lo. Kan hakkauhnak cu vawlei nih an kan pe kho ti lo.

Philippines ram i mirum pahra hna lak ah aa tel ve mi Zobel de Ayala cu fanu le fapa a ngeih hna. An rum ngai caah, ka fanu le ka fapa nih hin midang tthi hna sehlaw, kan ngeih mi pawl hi mi dang nih an i hrawm ve lai i a donghnak ah cun a chuh zong an kan chuh dih sual lai, ti kha an phan caah, a fanu a fapa bak cu a tthitumh ter hna. Cu unau pahnih hna nih fa an ngeih mi hna cu hawi an lo lo, an thluak zong a hman lo, tiah ka hoi nu nih a ka chim. Hi nih hin khua a ka ruah ter ngaingai. Vawleicung thil le ri ruangah hin unau, tta far ayin bak an si ko mi an ni um bak ko! An fa le zong cu hawi an lo lo, an thluak hna a hman lo tikah hmailei ah an sipuazi a tthi hruai kho tu ding an si hlei ti lo i an ro vial te vuih tak awk zong an i tlak hlei lo. Cucaah, Phungthlukbia 15:27 chung i a kan cawnpiak mi, A hak a kaumi nih a innchungkhar cungah harnak a tlunter, ti mi hi ruat than tuah uh sih. Hakkauhnak nih lungretheihnak le hnangamlonak le mi zawnruahlonak long te a kan pek. Hakkauhnak ngeih cu mah le mah harnak i pek zong a si rih. Cucaah, kan i ralring ngaingai a herh hlei ah, kan tei khawh ding zong a herh ngaingai mi asi. Zeipoh ngeih dih hi nuamhnak le hnangamnak asi hlei lo.

Jesuh nih Luka 12:15 chung ah “Ralring tein um u, hakkauhnak kha i veng u; zeicahtiah mi a nunnak taktak cu, zeitluk hmanh in rum seh law, a thilri hi a si lo,” tiah a ti. Rumnak cu kan thinlung le kan nun chung i kan ngeih mi Khrih tu ah khan a si. Cun, Kolose 3:5 chung ah, hakkauhnak hi siasal biakning phun khat a si a ti tthan. Cucaah hakkauhnak ngeih hi ttih a tung ngaingai mi a si i, siasal biakning phunkhat a si a ti caah, Pathian he aa ral kah mi zong a si. Kan i ralring a herh ngaingai ko!

Paul nih Filipi 4:12 chungah fiang tein a kan cawnpiak rih mi cu, “Herhbau in um kha zeidah a lawh ti ka hngalh, cun a hlei a hluat in ngeih kha zeidah a lawh ti zong kha ka hngalh. Cucaah khuazeika hmanh ah, zeitik caan paoh ah, ka paw a khim ah siseh ka rawl a ṭam ah siseh, tam tuk ka ngeih ah siseh, tlawm tuk ka ngeih ah siseh, lungsi hnangam tein um kha ka thiam cang” ti hi asi.

Hakkauhnak a tei kho mi le ngeih mi cung ah lungsi hnangam tein um kha a tiam mi kan si i Pathian a thangthat kho peng tu kan si nak hnga Pathian nih thluachuah kan pe hram cio ko seh!

Pastor Hniang Uk

Manila, Philippines

/////////////////////////////

Pitling Nun le Zumhnak lei ah

Rom 8:28, Pathian nih hin, amah a dawmi hna caah le amah nih aa tinhmi ningin a kawhmi hna caah cun, zeizong vialte hi a ṭha lei ah a serpiak ko hna ti kha kan hngalh.

Kan ton mi thil paoh hi phun hnih in hmuh khawh a si: chiatnak lei le tthatnak lei. Chiatnak lei in thil a zoh kho peng mi hi an nun khua zong a toi ti asi. Khrihfa mi kan nunnak ah chiatnak lei in thil hmuh awk pakhat hmanh a um lo ti mi hi Paul nun nak nih a kan cawn piak. Cucaah, kan ton mi thil poh hi zeitin dah kan lak, zei ah dah kan hman ti mi kha kan mah cungah aa hngatchan mi asi.

Paul hi Khrih zultu asi hnu i a nunnak pawl minung sinak lei in kan zoh ah cun si duh awk pakhat hmanh a um lo. Asinain, a chiatnak lei in Paul nih pakhat hmanh a hmu lo. A hman lo piin thong an thlak zongah, thonginn chung ah zeitindah Pathian bia ka karhzaih ter khawh lai ti tu kha a tuah (Phil. 1:13; Lam. 16:19-34). Mibupi nih an kulh, an velh zong ah thawngthabia chim ding can ttha tu kha a zoh i tehte hna a khan (Lam.22:1-21). Siangpahrang Agripa hmai a phanh zongah, a zumhnak kong langhter ding tu kha aa zuam (Lam. 26:1-32). Lawng in Rom lei ah biaceih ding in kuat a si zong ah, lawng cungah van le vawlei sertu Pathian lianngannak thawngthabia tu kha a chim. Thong an tlak zongah, thonginn chung in Khrihfabu tampi thazang pek nak cakuat a tial. Cu cakuat pawl cu nihin ah Bible ah kan i hman rih. Zei thil a ton poh ah, cu a ton mi chungin zeitindah Pathian bia a karhzaih khawh lai ti mi long a tuak. Chiatnak lei in a hmuh mi pakhat hmanh um lo. Thihnak le nunnak kar lak i a va ton mi thil a si ko zongah a tuak mi thil dang zeihmah a um ti lo. Cucaah, Paul cu pongkam thil sining thli hran nak nih a zumhnak kha zeiti hmanh in a hninh kho ti lo mi zumhnak a ngei. Cucaah Nun dan ka thiam cang a ti khawh nak cu si. Cucaah Paul cu pi a tling mi zumhnak le pi a tling mi nun lei ah a hmaibik in a kan kal piak tu asi. Pathian nih zumtu vial te kha, cu pitling nun le zumhnak lei ah kal peng hna seh ti a kan duh piak.

A can ah cun kan ton mi thil hi vawlei cungah a harbik le mivanchia bik zong ah kan i ruah kho men. Pathian na um maw um lo ti zong in bia kan hal kho men. Asinain, kha chungin khan Pathian nih nangmah hmang in a sunparnak langhter le hmuh a duh ca tu ah asi ti mi hi thei hna uh sih law, kan ton mi thil poh hi a tha mi siseh, a chia mi siseh, Paul nih a nun hrim in a rak kan cawn piak ban tuk in, pi a tling mi nun le zumhnak lei ah a kal thluahmah mi kan si nak hnga Pathian nih thluachuah rak kan pe hram cio ko seh!

Pahniang

Manila, Philippines

///////////////////////////

Kan hal mi kan ngah lo tik ah

Rom 8:28, Pathian nih hin, amah a dawmi hna caah le amah nih aa tinhmi ningin a kawhmi hna caah cun, zeizong vialte hi a ṭha lei ah a serpiak ko hna.

Ka hawipa pakhat Grace Foundation scholarship kha apply a tuah i a ngah lo. Ngah ding va sisehlaw, $ 2000 hrawng an ngah cio ton. A thin a hung ngaingai, mah tluk thla ka cam ve ko mi a ti i, na ngah lo tiah ca an rak kuat nak mi cabawm cu ka hmai ka ah a hlawnh, leng zong a chuak duh loh, zarhkhat deng hrawng a lung fak.

Aung San Shu Kyi nih a ttha bik mi kha kan i ruah chan lai i, a chia bik zong ton (yinsaing) ngam ding a rak ti mi hi ka lungah a rak chuak ngaingai. Thil ttha kan i ruahchan lio ah a chia bik mi zong ton (yinsaing) ngam ding in timhtuah nak kan ngei lo ah cun, mualpho nak le thil tuah sual nak tam pi a chuak lengmang ton.


Thla kan cam mi Pathian nih a kan pek lo tik ah kan cohlan kho ton maw? Thil hmete ah cun kan cohlan kho ko kan ti ko lai nain, thil ngan pi le sunghzatlaknak tibantuk ah cun kan cohlan khawh ding hi a har ngaingai ton. Cu tikah Pathian nih a ka daw rua lo tiah kan ruah sual can zong a um ton.

Lamkaltu 12 chung ah Peter cu thongin a tla i zumtu pawl nih thla an cam piak. Cutikah khuaruah har in Pathian vancung mi hna nih Peter cu thongin chung in an khamh. Peter cu a luat! Lamkaltu 12 chung thiamthiam ah Jeim cu an tlaih ve. Zumtu pawl nih thla an cam piak ve hrimhrim ko lai. Asinain, Jeim tu cu Siangpahrang Herod nih vainam in a that ter hna. Jeim cu a thi! Zeiruangah dah, Jeim cu Peter bantuk in Pathian nih a vancungmi hmang in a luat ter ve lo? Peter cu Pathian nih Jeim nak in a dawtdeuh caah si hnga maw? Khi tin si hlei lo. Paul nih Filipi 1:21-26 ah “Kei ka caah cun nunnak cu Khrih a si ko. Cucaah thihnak nih hin a ṭha deuh chinchinmi thil hmanh a chuahpi lai. 22Asinain ka nun ko rih i cu ka nun ruang i thil ṭha tam deuh ka tuah khawh ding a si ahcun, a zei cu dik kaa thim deuh hnga, ka hngal lo. 23Thil pahnih karlak ah kaa tenh: hi nunnak hi kaltak i Khrih he um cu ka duh hringhran, cucu a ṭha deuh suaumaumi a si; 24asinain ka nun rih cu nanmah ruangah a herh deuh rih fawn. 25Cucu nan caah a ṭha deuh ti kha fiang tein ka hngalh caah nung ko rih ning. Zumhnak i nan ṭhannak le nan i lawmhnak kha chap awkah nan sinah ka nung ko rih lai. 26Cucaah nan sin i ka um ṭhan tikah, keimah ruang i Khrih Jesuh chung i nan i lawmhnak kha a karh chinchin lai,” ti mi hi kan zoh ah cun hodah a dawt deuh, a van tha deuh ti zong a um ti lo.

Cucaah, nihin ah khrihfami taktak nih kan hal mi kan ngah ah siseh, ngah lo ah siseh, vanchia le van ttha zong um ti lo. Kan ton mi poh ah Khrih hmuh khawh ding le a sunparnak langhter ding tu kha Pathian nih a kan duh piak mi si cu. Amah cu thangthat peng uh sih!

Pahniang

Manila, Philippines

////////////////////////////

Pathian ngaihthiamnak phun khat

2 Samuel 12:13-14 “Bawipa zong nih na sualnak kha an ngaihthiam cang, na thi lai lo. Sihmanhsehlaw........na hrin mi na fa cu a thi lai” tiah a ti.

German theologian minthang Dietrich Bonhoeffer nih cheap grace, Khrihfa mi nih Pathian velngeih zangfahnak nak hi man fawi tuk ah kan tuah sual cang a rak ti mi hi nihin kan nih sin zong ah a phan ve cang ko lo maw? ti hi ka ruat ton. Khrihfa nun hi duh poh in nun a ngah maw? Pathian ngaihthiamnak kong hi awl tuk le fawi tuk in kan chim caah, kan nunnak nih hin cu ngaihthiamnak cu man ngei tein a dir pi kho ti lo. Pathian cu dawtnak, velngeihnak, zangfahnak le ngaihthiamnak he a khat mi kan ti ban tukin a dik mi (justice) Pathian, biaceihtu Pathian asi nak zong kan philh lo awk asi.

Ngaihthiam ka hal tthan te ko lai ti hi a ra ton. Biatak tein kaa ngai chih lai i, ngaih thiam ka hal te lai, ti asi ton. Pathian nih hin ngaih cu a kan ngaih thiam ton ko lai nain, sualnak kan tuah mi le kan rak tuah man kha cu kan zun ve thiamthiam ko. Biakam hlun chung kan zoh ah cun, David nih Uriah nupi a sual pi mi kha, aa ngai chih i biataktein Pathian lei a panh than tikah, (2 Samuel 12:13-14) Bawipa zong nih na sualnak kha an ngaihthiam cang, na thi lai lo. Sihmanhsehlaw mah hi thil na tuah thawng in Bawipa khan a zomhtaih ngaingai cang caah, na hrin mi na fa cu a thi lai tiah a ti. Kan ngaih thiam nain na fapa cu a thi thiamthiam lai a ti. 2 Samuel 12:10 ah vainam cu na inn in aa then bal lai lo a ti. David fapa Amnon nih David fanu Tamar a tlaihhrem (2Samual. 13:14). Cun, Absalom nih Amnon cu a thah (2 Samuel 13:28-29). Afapa Absalon nih a doh hoi (2 Samual 15) tiban tuk a rak si.

Cucaah, kan sual kan ni ngaichih ah cun, ngaihthiam kan hal ah cun zeipoh a remcang, a sinpi dih te ko lai tiin ruat hlah uh sih. A kan ngaihthiam ko lai nain, fakdeuh in kan rak tuah sual si cun, fakdeuh in kan zun ve ko lai. Asinain, hibantuk dantatnak kan ton mi hmanh ah hin Pathian a zangfahnak le velngeih nak cu a ngan rih thiamthiam ko, kan tuah mi tluk ngaingai in a kan tuar ter siang rih lo thiamthiam. Asinain, Pathian a mifa taktak a si mi cu chimhhrinh lo in cun a kan chia hrim ve lo. An nih cu tthat lo nak tuah in an rum, duh poah in an nung ko nain zeihmanh Pathian dantatnak zong an tong loh kan ti ding a si lo. Pathian fale an rak si taktak lo zong a si kho. Hi kong ah hin cun, mi he i tahchunh ding zong si lo. Pathian nih minung pakhat cio hi a kan pehtlaih dan aa lo dih theng lo nain, a thil hram pi a si ning principle tu cu a um peng mi si. Cucaah, Pathian ngaihthiamnak phun tam pi lak ah, thil hrampi a si ning principle phunkhat te ka rak langhter mi tu kha si. Kan mah tu kha dingfel tein a si khawh chung Pathian he i pehtlaih ding tu kha a biapi bik mi cu a si ko. Cucaah, Hebru 12:1b-2 nih a kan cawnpiak ban tuk in lam a kan dawntu thil paohpaoh le kan tlaihchan peng mi sualnak vialte kha hlaw hna u sih law kan hmai i chiah mi tlikzuamnak ah khan i zuam uh sih. Jesuh kha fekte in i zohchih u sih, amah cungah cun kan zumhnak cu a hramthawk in a dongh tiang a um ti mi hi fek tein i tlaih peng hna uh sih.

Pahniang

Manila, Philippines

////////////