I Ţhumh nun

Filipi 2:6-7 “Pathian sinak kha a ngeih zungzalmi a si ko nain …..sal sinak tu kha aa lak”

(1) Kan Bawipa Jesuh Khrih cu vawlei ah ‘i ţhumh nun’ he a ra. Cawrawl ei nak kuang ah an thlim, ngunkhoikhawltu, hlawhhlangnu, thinghmuimi tbt.. hna sinah a tlawng leng i luat nak thawng ţha achim. Paul nih fiang ngai in “Pathian si nak kha a ngei ko nain.. Sal sinak kha a lak" a ti ( Filipi 2:7). Cu nih a kan chimh mi cu Christmas nun cu i ţhumh nun asi ti asi. Voi khat ah Pastor pawl meeting an tuah an ti . Khual cheu cu theihhngalh inn ah an i ţhum, a cheu cu hotel ah an i ţhum. Chun lakphak ti din pah ah biaphong an deng hna. A cheukhat nih an tlunnak hotel a ţhat ning kong an chim, a cheu nih an tlun inn ngeitu an fel lonak kong an zai, an bia a thaw ngai. Kan Bawipa Jesuh tu cu vawlei a tlawnlen lio ah “Caw inn hotel” ah ai ţhum diam, zohkhenh tu reprai ngai a ngei lo! Ruah awk ah….???Bia phong den nak ah Jesuh Khrih ţhu ve sehlaw zei kong dek chim a thok hnga?

(2) Mary kha vanmi nih na chung in mi khamhtu a chuak lai an ti tik ah “kei cu Bawipa salnu ka si ko, na chim bang cun ka cungah si ko seh“ a ti. Aa uah lo, a phorhlaw lo. Lai tuanbia ka nu nih a rak ka chimh bel. Vorvok ti mi saram hi saram vial te nih saram bawi ah vote in an thim ti asi. Vorvok cu bawithim mi si cu a lawm tuk luakchauk, a uang, a phorhlaw i, a per, a chawi, a lam an ti. A perchawi nak ah ek-inn a vai pal sual rua, vanchait ah ekkhur ah a tla diam ti asi. Cu caah vorvok khi a rim a nam nak asi, ti a si. Mary nih “Bawipa salnu” tiah tangdor nak a ngeihmi nih hin Messiah nu sinak degree a ngeih hi a feh ter. Tangdornak nunnak hmun ah Jesuh a chuak ( Luke 1:38).

(3) Tipil petu John cu “ Vancung pen nak cu a nai cang” tiah Judea ram car ah a au len ko. Mi nih an fuh len i nangmah cu Messiah cu na si ko lo maw? an van ti len. An uar tuk cang! A lartuk cang. An but len. Kan nih cu kan hnar a puar hnga i “si ril mal” kan ti men sawk hnga. Nain John hi a mak ka ti . “Kei cu Messiah i a keden hri phoih tu hmanh ah ka tlak lo” a ti hna. ( Cf: John1: 26; Mathai 3:1ff). Thantlang Pastor ka tuan lio ah an ka chimh mi ral bawipa kong ka lungchung ah a hong chuak ve . Khua te lei pa nih ralbawi pa Major kha Captain tiah a auh sual an ti. Ralbawipa nih zaih Major cu Captain na ka ti hrim a ti i, thi deng in a vuak an ti. Major hi Lt. Colonel ti auh an duh an ti. Jesuh Khrih cu Siangpahrang level cung ( Senior general cung) a si nain, Sal (ralkap sen ngeilo) ti auh ah zei poi dawh asi lo. Kan nih theh???? (Ruah awk : Senior pastor, President, Founder, SayaGyi, Dr., Ph.D., Queen & King, Boss etc.. ti hna a hmaiah bunh piak kan uar tuk sual maw?)

Christmas caan ah kan lut cuahmah cang. Kan nih zumtu Khrihfa pawl zong “ i ţhumh nun” hi kan cawn ve a herh ko. Cu nun cu Kan bawipa Jesuh nih a suai ta mi Christmas hmantlak pakhat a si ve. Christmas caan ah, Uahnak lo sehlaw Tangdornak ţhang seh. Siaherh nak nih kan khrihfa cu kan tuam sehlaw Dawtnak nih kan uk seh. Midang nakin ka thiam, ka ţhawng, ka ngei ti lungput ţum sehlaw, keicu sal, san tlai lo ka si ti lungput ţhang seh. Kan lungput cu Khrih nih a ngeih mi lungput “I ţhumh lungput” sihram seh.

Bawipa sunparnak caah si ko seh. A men!

Sang Cung Uk

Manila

Remdaih duhnak lungput

Matthai 2:14, Josef cu a tho i ngakchia le a nu cu Izipt ram i zampi awk ah zan ah khan a thawhpi hna

Tu lio hrawng cu mail group pohpoh ah December thla a si bantukin Christmas sermon deuh longte kan rel cio hna. Christmas lungput zong a phunphun in an kan chim: Herod lungput, Mifim hna lungput, Mary lungput, Josef lungput, Tukhal hna lungput ti bantuk in an chim cio, an tha ngaingai hna. Tutan ah hin keizong nih Remdaih Duhnak Lungput timi in thazang la hna usih tiah kan sawm hna.

Jesuh chuah lio can ah hin Herod nih Jesuh that duh ruangah kum 2 tang ngakchia vialte thah dih ding in order a chuah. Jesuh that lo ding in luat ternak lam hi Pathian nih a phunphun in a tuah kho tuk ko: Herod kha a nunnak tiang hmanh a lak khawh ko, a lungput zong a thlen khawh ko, a rian zong in a dinh ter khawh ko, nawl ngei lo zong ah a chiah khawh ko. Herod teinak ding caah Pathian nih zei poh a tuah khawh ko nain dohnak le teirul icham in nang maw kei tiah rian a ttuan lo. Herod teinak ding caah Pathian a hman mi (hriamnam) cu Herod hrial kha a si, Matt. 2:14 ah kan hmuh ban tuk in “Josef cu a tho i ngakchia le a nu cu Izipt ram i zampi awk ah zan ah khan a thawhpi hna”. Herod a hrial ter hna tikah Herod nih Jesuh cung ah le a nu le a pa cung ah zeihmanh a tuah kho ti lo. Jesuh cu Herod kut chungin him tein a luat ti kha kan hmuh.

Rian kan tuannak ah, asiloah, Khrihfa bu chung i rian kan tuannak cio le kan tthut kan dirnak cio ah hin mi dang he ihua hlah usih, dawntu si hlah ning, mi dang thil rit si hlah ning ti kan duh ah cun piahtana (problem) a si ding mi thil tuah le ttuan le i cuh le bia chim hna hi Josef le Mary nih Jesuh he Herod an hrial bantuk in hrial khawh izuam hna usih law, cucu Pathian duhnak le remdaih duhnak lungput cu si. Nang maw kei maw tiin kan i entainak le tthawn le nawl ngeihnak (power) kan icuhnak nih hin kan khua, kan riantuannak le kan Khrihfa bu hna ah hin piahtana a chuah pi tawn. Tahchunnak ah Khuabawi naa cuh ruang i nan khua a dam lo le a zawt peng ding ah cun i cuh lo a tha deuh. Senior Pastor naa cuh ruang i na Khrihfa bu a dam lo peng ding ah cun i cuh lo ding asi ko. Founder le president si naa cuh ruang ah bu tthennak le dohkalhnak a chuah ding ah cun nangmah tu kha i phet diam i, hrial diam ding asi ko. Nangmah he aa cuh mi hna an dam le khua mi le Khrihfa bu an tthat kha ilawmh awk asi ko. Cucu, tutan Christmas nih a kan cawmpiak duh mi, remdaih duhnak lungput ka ti duhmi cu asi.

Na umnak, na dirhmun, na rian te ah khan felte tu in um i zuam ko. Caan nih bia a chim ve tik ah cun nangmah kha Khuabawi, President le Senior Pastor tbt.. ah an in hlam caan a um ve te ko lai. Cu tikah cun daihnak le remnak, dawtnak le zawnruahnak a karh lai. Na rian ttuannak cu a ngan chin lai i na ram cu a kau chinchin lai.

Christmas Lomhnak le Hnangam Daihnak cu nan dihlak cung ah a thar in tlung ko seh. Amen!

Pastor Hniang Uk

Manila, Philippines

//////////////////////////

Zisuh Hmunhma Kan Pe maw?

Biathlam 3:20 “ka aw a thei i innka a ka hunhmi cu, a inn chungah cun ka lut lai”

December thla kan phan cang! Hi thla ah kan thinlung le kan hnathlam ah kan theih ton mi hla cu: “keimah lungchung ah rung um tuah, Nang caah um nak hmun kha a um” ti hi asi. Khuadang, ramdang a phan mi nih cun kan mah le kan chuahkehnak hmunhma i kan rak tuah ton ning Christmas te kha ngaih cio asi.

Campinas khua ah, Brazil mi hawi le kom group in zuu an ding hna i an hawi pakhat an thlau. Zuu an ri tuk. Va kawl than ding ah an chuak than. Pakhat nu nih cun, a fanu kha a ri tuk i a kal ter duh ti lo, a thlauh len nain a thlauh kho ti lo, a dongh nak ah a nu nih cun, “Pathian he va kal ne uh” a ti. A fanu nih cun, “Motor kan khat dih cang, Pathian caah hmun a um ti lo” a ti. Nazi pakhat hrawng rauh ah, thawng a rak thang mi cu, accident in an thi dih ti a si. Mi vial te an khuaruah a har dih, zeiruangah tiah cun, motor hi a zei hmanh a cang lo, cun an motor cu arti a phurhpah mi a si i, arti zong pakhat hmanh a kuai lo.

1995 December thla, Hakha, CCC fanfit zan ah drama an phiah mi ka philh khawh lo mi cu: innchungkhar pakhat nih an pa caah chuahlawmhnak an tuah piak. A fa le cu an hoi le hna he an lam, an ding, an i nuam tuk hna lio ah an hoi pa khat nih cun, “ziah, ka pa caah chuahlawmhnak kan tuah piak nan ti i na pa zong ka hmu tung lo, ati. Fapa te nih a leh mi cu, ka pa cu kan mah mino pawl kan i nuamh ning hna hi ka lu ari ati i inn cung ah amah long in a um ko” tiah a leh. Nihin ah Khamhtu Zisuh chuahlawmhnak kan tuah mi hi “ka lu ari” tiah kan sinah um duh lo, ţhutter ngam lo le amah kan tuahhnawh chanmi Zisuh hna tel ve lo in kan tuah sual lai ti hi phan a um ngaingai. Mino hna zeitindah Christmas kan tuah? ti hi ruat ţhan hna usih.

“Pathian caah hmunhma a um ti lo” ti hi ţih a nung ngaingai mi si, zeicahtiah cun, nidongh ni ah “na caah hmunhma a um lo” a kan ti ve lai. Kan thinlung ah, kan innchungkhar ah, kan rian tuannak ah, kan zung ah, kan motor ah, kan classroom ah, khoi ka kan kal nak le kan um nak poh ah Zisuh hmunhma kan pe maw? Zisuh sawm le hmunhma pek cu hlawhtling nak a si. Kana nupi ţhit puai ah Zisuh an sawm i misurhang a dih zong ah mualpho nak um lo tein hlawhtling nak tu a rak si kha kan hmuh (John. 2:1-9). Cucaah, tutan Christmas camtuak nih hin kan umnak pohah Jesuh hmunhman ngeihter peng ve ding ah a kan theihter ţhan tu siseh law, Jesuh hmunhma pe uh sih, Jesuh sawm uh sih, zeicah tiah kan nunnak hram pi asi i hlawhtlin nak a kan pe tu zong asi.

Christmas daihnak, lawmhnak le hnangamnak cu nan cung ah um ko seh!

Pastor Hniang Uk

Manila, Philippines

////////////////

Minung ruah khawh nak leng in

Isaiah 55:8 “Ka ruahning cu nan ruahning a si lo, ka thil tining zong nan thil tining he an i khat lo”

2010 April thla ah Malaysia ah ka kal. Ka kir lei ah Singapore Air-line ka cawk caah Singapore transit a si i Singapore ah nazi pa hnih hrawng aa din. Cu ah cun ka thil an thlen sual si men lai, Manila ka phak ah cun ka thil cu ka bawh lengmang nan a um ti loh, ka thil cu a tlau ko. Pathian, ziah zeitin dah si hnga, tiah thla ka cam, a thaizing ka va hlat than, a ngah hlei lo, zarhhnih rak kan hngak chung ti si. Pathian, zei na duh nak dah si tiah ka mawtchiat cang. Sinan, thlakhat rauh hnu ah an ka au than i; na bag kan hmu kho bak ti lo, na thil pawl zeizat man dah si lai dollar in kan in liam lai an ka ti. Dollar 150 man hrawng si lai tiah ka ti hna. Ka thil tlau mi cu bag fate si i laphehtoh, coffee, suantam..tbt…ka chiah mi 5 kilo te khi si. Dollar 300 kan in liam lai, na lungtling lai maw tiah an ka hal. Tling ka ti hna. Cu ti cun, dollar 300 cu ka ngah. Malay um mi ka u le cu, Laphehtoh, coffee pawl ei din nan ka cawk piak mi kha a tlau dih tiah ka chimh hna. Ka hoi nu May thla ah Malay ah a kal i ka u le nih ka thil tlau mi pawl cu a thar in an ka cawk piak than, an rak ka kuat than! Dollar 300 ka ngah hlei ah, ka thil tlau mi pawl cu ka u le nih a thar in an ka kuat ţhan. Malay ka rak kal lio ah hin dollar 300 bak leiba ka ngei. Cu vial te kha cham piak ding in Pathian nih khua a rak khan, a rak tuaktan cia dih mi kha ka rak thei lo. Ka bag a tlau lio i Pathian ka rak mawtchiat ning le thla ka rak cam ning ka ruat than tik ah ka ning a zak ngaingai, Pathian sinah ngeihthiamnak ka hal ţhan. Pathian min thangthat in um ko seh!

Cucaah, Pathian cu minung kan ruahkhawhnak leng lei in a ţha bik in khua a kan khan piak tu a si peng. Isaiah 55:8 chung ah Pathian nih “ka ruahning cu nan ruahning a si lo, ka thil ti ning zong nan thil ti ning he an i khat lo,” tiah a ti ban tuk in, a rak si hrimrhim ko. Zeizong vial te hi a ţha bik in a rak tuaktan dih, khua a rak khan dih tak ko ti hi kan nun in fian khawh i zuam hna uh sih. Rom 8:28 ah “Pathian nih hin, amah a dawmi hna caah le amah nih aa tinhmi ningin a kawhmi hna caah cun, zeizong vialte hi a ṭha lei ah a serpiak ko hna ti kha kan hngalh” a ti ban tuk in Pathian nih khua a kan khan piak mi hi a ţha bik a si lengmang ko, suaisel awk a um bal lo. Zeipoh kan nun ah a rak chuak mi kha “Amen” pek khawh i zuam hna uh sih. Khatlei in kan theih awk belte cu, kan tuah ning kan zumh ning in kan ton ve, kan zun ve lai ti kha cu kan philh lo awk a tha. Kan mah tu hi zumhawkthlak tein um kan i zuam peng a hau mi si.

Pastor Hniang Uk

Manila, Philippines

DINFELNAK

Phungthlukbia 14:34 “Miphun a lianngantertu cu dinnak a si”

A tu vawlei cung thil si ning kan zoh tik ah, khui ka hmun poh ah zikhnawhnak, dinfellonak (corruption) hi kan hmuh khawh. Sual kha sual ah hmuh lo in a phung si ko tiah kan ruah i, zei rel lo in mitam pi cu kan um. Cu caah din fel nak hi , kan sin ah hmuh a har ngai mi thil a si cang. Zei hmanh kan rel lo mi thil nih kan nunnak a kan hrawh ti hi kan theih lo.

Bawipa nih a duh mi cu nun thiang hlim a si ti hi kan theih dih mi a si. Sinain zei kan rel lo i, “ma hi cu zei a pawi lai lo” kan ti. Hibantuk hi, kan nunnak a kan hrawk tu a si kan theih lo. Cu caah kan nunnak ah buaibainak tam pi kan tong i , a phi kan hmuh khawh lo nak a si. Phungthlukbia 10:3 ah, “Bawipa nih miding mi cu rawl taam in a um ter siang hna lo” tiah kan hmuh. Ding fel tein kan nung ko na in har nak kan tuar a si ah cun, Bawipa nih a kan hnek sak mi a si kho i a rau hlan ah a phi kan hmuh cawlh te ko lai. Sinain, can sau pi ei awk ngei lo, rian zong ngei lo in kan um i, har nak kan tuar asi ah cun, kan nun ning i check a hau than cang. Thil pakhat Khrihfa tam deuh nih kan palh mi cu, har nak kan tuar tikah zei ruang ah a si ti ruat lo in , “bawipa nih hnek sak mi a si, a dong nak ah cun a tha te ko lai” tiah kan i hnemh ton. Kan din fel lo ruang ah, kan nun ning that lo ruang ah Bawipa nih a kan chimh hrin (rebuke) a si tiah kan thei kho lo. Cu caah ah kan sual peng i, kan buainak le piahtana chung in kan chuah khawh lo nak a si. Phungthlukbia 11:1-11 ah kan hmuh mi cu, ding fel tein a nung mi le mithalo kong kan hmuh. Cang 8 ah cun, “miding mi cu har nak chung in chuah asi” tiah kan hmuh.

Nihin ah, lih chim a tha lo ti kan theih ko na in, lih chim cu sual ah kan rel ti lo, a ho poh nih lih kan chimh dih (cf. John 8:44, 1 John 2:4, 21,22). Satan nih kan mit a kan phen i kan that lo nak kan hmu kho lo. Khua le ram kan dawt kan ti si ah cun, nun ning dawh tein nung hna uh si. Bible nih tangka nih khua le ram a than ter a ti lo, din fel nak nih mi phun a than ter ti kan hmuh (Phungtb. 14:34). Khua le ram kan mi phun kan dawt tak tak a si ah cun, kan um nak hmun poh ah le kan rian tuan nak poh ah ding fel te in bawipa tih za ngai in kan nun ding asi. Ding felte le bawipa tih zah tein na nun a si ah cun thluachuah na hmuh lai ( Prov. 21:21).

Cuti asiah, zei tin ding fel te in kan nun khawh lai? Kan mi nung si ning in kan i zuam len ah cun a har ngai ngai mi a si, sinain Bawipa Thlarau nih a kan bawmh ah cun zei zong vial te a fawi dih. Cu caah bawipa he pehtlaihnak (relationship) kan ngei a herh. Zei tin dah pehtlaihnak kan ngei kho lai tiah cun, thlacam nak le bible rel nak in. Zing ka ten zei hman kan tuah hlan ah Bawipa sin ah thlacam le bible rel in kan nun nak kan ap a herh.

Bawipa nih Abraham sin ah a ti mi cu, miding pa 10 an um ah cun Sodom le Gomorrah ka hrawk lai lo a ti (Gen. 18:32). Sodom le Gomorrah cu mi nung tam ngai mi khua a si. Bawipa nih ding fel tein a nung mi a dawt tuk ruang ah 10 an um ah cun ka hrawh lai lo a ti nak a si. Mi tam pi cu duh poh in an nung ko lai, sihmanhsehlaw nang le kei cu ding fel tein nun i zuam ko uh sih, Bawipa nih nang mah pakhat ding fel tein na nun ruang ah, na in chung khar, na khua le na mi phun thlachuah an co lai. Bawipa nih thlachuah in pe ko hna seh!!!!

Van Nun Thang

Manila, Philippines

//////////////////////////////

Zumhnak tling

John 11:26 “Hihi na zum maw?”

John 11 cu Lazaruh thihnak le thawhthannak kong asi. A tuanbiapi cu kan theihcia dih a si ko caah kan chim duh ti lai lo.

Mary le Martha nih hin Jesuh hi an zumh ko. Mi a dam ter, khuaruahharnak zong tampi a tuah ti mi an theih. Sinan, an zumhnak cu, “kan ţa pa hi a zawt lio ah um law cu na dam ter khawh ko hnga” ti mi tiang long kha si. An pa 2 in “Bawipa, hika ah hin rak um law cu, ka ṭa hi a thi hnga lo,” tiah an ti veve (John 11:20, 32). “Na ṭa cu a tho ṭhan lai,” tiah Jesuh nih Martha cu a ti. Martha nih cun, “Asi, a tho ṭhan lai ti cu ka hngalh ko, sihmanhsehlaw ni hmanung bik thawhṭhannak ah pei a si ko lai cu,” tiah a leh. Jesuh nih Martha cu, “Keimah hi thawhṭhannak le nunnak cu ka si. Keimah a ka zummi paoh cu a thih hmanh thi seh law a nung lai; Cun ahohmanh a nung i keimah kha a ka zummi cu an thi bal lai lo. Hihi na zum maw?” a ti (John 11:23-26)

Martha i zumhnak, a theology cu hmailei a si lai ding mi kha a si, ni donghni ah a thoţhan te lai ti mi kha a si. A zumhnak kha, a va hlat tuk, hmailei ca pi kha a si. Sihmanhsehlaw, cu a hlat tuk mi a zumhnak kha Jesuh nih a vun naihter i, mithmuh kuttongh nihin ca bak ah a si tiah a vun langhter.

Jesuh kan zumhnak hi hmailei ca, ka thih tik ah vanram ka kai te lai ti long a si ah cun, Martha ban tuk kan si lai i, nihin caah zeihmanh santlaihnak, ruahchannak kan ngei lo ah a cang i, cu cu a tling rih lo mi zumhnak asi. Ka thih tik ah vanram ka kai lai ti long si lo in, nihin kan nunnak ah Pathian ţhatnak kha mithmuh kuttongh in co ve ding in zumhngam nak kan ngeih ding kha Jesuh nih a kan duh piak mi cu a si.

Kan lungretheih can, kan khuaruahhar can le kan piahtana vial te zeican poh ah Jesuh nih phisin piak a kan duh. Sinan, na zumh lo ah cun a tuah ve lai lo. “hihi na zum maw” tiah an hal peng lai. Cucu zumhngam lo nak hna kan ngei sual maw? Kan umnak pongkam vawlei thil sining hna nih zumhngam lo ding in a kan tuah sual maw? Jesuh kan zumhnak hi a hlat tuk sual maw? Hmailei ca long hna maw asi? Thih hnu ca long ah kan i ruah a si ah cun a tling rih lo mi zumhnak a si. Nifatin kan nunnak kan cawlcanghnak ah vun naih ter deuh uh sih! Nihin ca he, hmailei ca he, thihhnu thawhţhan nun ca he kan ni bochan, kan ni hngatchan longah zumhnaktling cu kan ngei lai. Pathian nih thluachuah in pe ko hna seh!

Pahniang

Manila, Philippines