Na Nunnak ah Zisuh Aa Hngilh Maw?
August 15, 2010
Mathai 8:23-26
Kan ttih, kan phan,le harnak kan ton caan ah thla kan cam tawn. Hihi cu zumlotu(zumhnakdang hna) zong nih an tuah ve lengmang mi a si ko. Pathian kan zumhnak hi a fiangcia mi le kan hmuh khawh pah cia mi lawng ah kan zumh i, kan bochan tawn. Kan hmuh khawh ti lo mi, kan ruah khawh ti lo mi khuaruah har, harnak tilet, thlichianih a kan phanh tik ah Pathian kan i bochan kho taktak ti tawn lo. Bible chung i a um mi pawl hi tuanbia sawhsawh ah kan ruah hna i, kan nun ah a cang kho ve mi thil a si ti hi kan zum kho tawn lo. Bible ca chung ning bak in nihin ka nun ah a cang ve lai ti duh nak a si lo. Pathian tthawnnak, khuaruahhar thil ti khawh nak kha nihin zong ah a nung peng rih ko ti hi kan nunnak a dih umh tiang in kan zumh awk ah ka duh mi a si.
Nifatin kan nunnak i kan ton mi thil poh hi Pathian nih a theih mi le a mah hnatlaknak lawng tein kan cungah a rak tlung mi thil an si. Zeibantuk tukforhnak, harnak a si zongah, hihi cu a tei khawh ko lai tiah Pathian nih a kan ruah chan mi kan si. Kannih nih teh Pathian nih a kan ruahchan bantukin kan lehrulh (response)kho maw?
Kan nunnak ah harnak zong tong lo in kan tlam a tlin can tampi a um. Cutikah minung thil ti khawhnak lawng tein kan cawlcang i, kan chung i a um mi Zisuh cu a cawlcang kho ti lo. Harnak kan ton tik ah aa hngilh mi bantuk a si cang i va tthangh chawm hau in a um. Cucaah harnak kan ton caan i Pathian kan i bochan ning le kan tlam a tlin lio caan i Pathian kan i bochan ning aa lo maw?
Pathian nih a kan duh piak mi cu nifatin a mah kha hmunhma pek peng i punghman tein a mah he lenti hi a si. Cu ti kan tuah ahcun kan nunnak ah hnangamnak, daihnak, lawmhnak he a khat lai i, Pathian thil ti khawh nak kha kan nun ah a lang chinchin lai.
Bawipa nih thluachuah in pe chin ko hnaseh!
Pastor Hniang Uk
Manila, Philippines
///////////////////////////
No comments:
Post a Comment