Salm 133
Kan Bible Biakam hlun chung kan zoh tik ah Pathian hi mi phun in rian a rak tuan ti cu kan hmuh khawh. Cu miphun cu Israel mi phun an si i, Israel mi phun ah hin phun 12 ah an i then ve. Tahchunnak ah senthang kan ti nain, senthang chung ah Surkhua, Dongva, Phaipha ti ban tuk in an si ve. A bik in Joshua chan ah hin an lung aa rual kho tatak. Moses nih Egypt in a rak hruai hna i Thetse ram car chung ah kum 40 chung a rak hruai hna hnu ah, Pathian nih a kamhmi hna ram an luh lai te ah Moses cu a thi. Kumsau pi a rak hruai tu bik Moses nih a thih tak hna tik ah, an tha a der i, an lung zong a dong pah. Sihmanhsehlaw, Pathian nih Joshua cu a thim than i,
“tthawng ngai le ralttha ngai in um tuah; zeitintiah an pupa hna sinah pek awk in chiat ka rak ser cang-mi ram hi, hi mi hi na co ter hna lai. Moses ka sal nih nawl an pek-mi phungbia vialte ning in ralringte in tuah awk ah, a tthawn bel tthawng ngai le ralttha ngai in um ko; khuazei ka na kalnak hmanh ah khua awng na pemh nak hnga, orhlei ah siseh kehlei ah siseh i mer hlah. Kei mah nih nawl kan pek a si lo mei? Tthawng ngai le ral tha ngai in um ko; na thin phang hlah, na lung zong dong hlah; zeicahtiah Bawipa na Pathian cu khuazeika na kalnak hmanh ah na sinah a um ko, tiah a ti” (Joshua 1:6-9).
Pathian nih Joshua sin ah a rak chim ban tuk in a kamh mi cu an doh dih hna i an tei dih hna. Joshua ca uk chung 22:10-20 kan zoh ah cun, Israel mi pawl zei tluk in dah an lung aa rual ti mi hi kan hmuh khawh.
A pakhatnak ah,
Pathian kha an ttih i lungrual tein an um.
Reuben mi hna le Gad mi hna le Manasseh phun cheu a si mi hna nih Jordan tivakam ah Biaktheng pakhat (Pathian duh lo mi) an ser tiah thawng an theih tik ah Tlawngbawi Eleazar fapa Phinehas le Israel miphun pakhat cio i upa a lu bik pawl an thlah hna. Khah, Pathian duh lo mi thil nan tuah cang hih, tiah va chim ding ah an kal ter mi hna an si. An mah le miphun tenau cio i upa pawl i ton nak le kan mi pawl hi Pathian sin in lam an pial sual maw ti mi ceih hmai nak an ngei lengmang. Zei tluk in dah an lung aa rual ti cu hi ka ah hin kan hmuh khawh mi si. Pathian duh lo mi thil kan tuah sual lai hih tiah an i ralring lengmang. Zeicahtiah cun, Akhan pakhat sual ruang ah zei hmanh a thei lo mi a chungkhar dih lak le a saram vial te tiangin vawlei nih a dolh dih hna. Kan nih Senthang unau hna zong nih kan i zoh chunh awk ngaingai a si. Senthang ti mi tang ah hin, mah le khua min cio in kan um dih hna i, upa tete zong kan ni thiah cio, kan ngeih cio hna tik ah, hi Israel pawl he hin kan i lo ngaingai ko. A bau mi pakhat cu lungrual nak te hi kan chambau deuh rih hnga maw tiah ka ruah…..
A pahnihnak ah
Pakhat le pakhat an ni chimh hrin i an thin zong a hung lo.
Tlawngbawi Eleazar fapa Phinehas le Israel miphun pakhat cio i upa a lu bik pawl nih, “zei ruang ah Pathian duh lo mi thil nan tuah, Peor i sual ruang ah Bawipa mi bu cung ah rai a tlun i a thenh hmanh kan i thenh khawh rih lo mi kha, kan i zaa rih lo maw, cu i nannih i Bawipa sinin nihin i i mer nan i timh?” tiah an va sik hna. Miphun dawt nak thin lung an ngeih mi hi zoh chunh awk tlak ngaingai an si. Kan nih hna teh pakhat le pakhat kan i chimhhrinh tik ah, ri hlah uh, ding hlah uh kan ti tik hna ah kan thin hna a hung ton maw? Israel timi tang ah hin miphun phun 12 an um i phunkhat le phunkhat lungrual tein an i chimhhrinh ban tuk in, kan nih hna teh Senthang timi tang ah hin khuakhat le khuakhat zawnruahnak, chimhhrihnak kan ngei hna maw? Chinhhrinh kan ton tik ah teh kan thin hna a hung sual maw? Reuben mi hna le Gad mi hna le Manasseh phun cheu a si mi hna nih cun, chimhhrinhnak an ton tik ah an thin a hung lo i, Pathian duh lo mi biaktheng kha kan tuah lo, a mah Pathian caah kan rak tuah mi tu kha a si tiah tha tein an nawl hna. Cu tik ah , an mah zong an thin hung lo i Israel hruai tu pawl zong lung lawm tein an kir than. Hi ka i kan hmuh khawh mi cu, zeitluk in dah pakhat le pakhat, phunkhat le phunkhat an ni pehtlaihnak hi a tluangtlam ti mi hi a si. Kan nih hna zong senthang timi tangah hin pakhat le pakhat kan i pehtlaihnak a tluangtlam awk, lungrual tein kan um awk a si ti mi kha hi Bible cacang nih a kan hmuh sak duh mi cu a si.
A pathumnak ah
Miphun pakhat le pakhat an ro covo tianghmanh cheuh ve duh nak thin lung an ngei.
Tlangbawi le upa hruaitu pawl nih an ti mi hna cu, “Nan ram a thian lo ruang i Bawipa duh lo mi nan tuah ding nak cha cun, kan lakah ra uh law kan covo i lak ve ko hngat uh,” an ti mi hrimhrim hi kan zoh ah cun, zeitluk in dah phunkhat le phunkhat, khuakhat le khuakhat an i daw ti cu kan hmuh khawh. Zerngeihnak thinlung zong an ngei lo hlei ah an ngeih mi ro (an ram) tianghmanh cheuh ve duh nak thin lung an ngei. Pathian kha an ttih i, an miphun ningpi in Pathian duh lonak thil kan tuah sual lai ti kha lungrual tein an ni ralring peng i pakhat le pakhat chimhhrinhnak zong an ngei peng hna. Hi thin lung an ngei mi hna hrimhrim hi aa dawh tuk mi thinlung put le kan nih nih kan i zohchunh awk thinlung put bak si.
A toinak in kan chimh than ah cun,
Pathian dawtnak tang ah,
1. Lung rual nak an ngei
2. A hmanmi thinlung put an ngei
3. Miphun zawnruahnak an ngei.
Salm 133 ah a ti bang in, an nih Israel unau rual miphun phun 12 pawl cu lungrual tein an um i an ni nuam tuk hna, zeitluk in dah a that i a nuamh ti mi kha an nun nak hrimhrim nih a rak tep. Kan nih senthang mi hna zong nih tep ve cang uh sih law, tep caan zong a cu cang ti hi nihin ah kan Bible nih a kan chimh duh mi cu a si.
Hi hna hi, nihin kan nih senthang hna zong nih kan ngeih awk a herh ngaingai mi thin lung put cu an si.
No comments:
Post a Comment