Marry nun in cawn awk

John 2:3-5 Mitsur zu kha a dih tikah Jesuh cu a nu nih khan, “Mitsur zu an ngei ti lo,” tiah a chimh.

Jesuh nih cun, “Ka nu, zeidah tuah awk ti kha, na ka chimh awk a si lo, ka caan pei a phan rih lo cu,” tiah a ti. Jesuh nu nih cun sinum pawl cu, “An chimhmi hna paoh kha tuah te u,” tiah a ti hna.

1. Jesuh a nu Marry hi Kana khua mi asi lo, nupi tthit puai ah an sawm ve caah a va kal mi tu asi. Cucaah, anih cu mikhual sawhsawh asi. Mitsur zu a dih tikah Jesuh cu a nu nih khan, mitsur zu an ngei ti lo, tiah a chimh. Sawmmi le mikhual sawhsawh asi mi Marry nih an mitsur zu a dih mi cu amah he zeidah aa saing? Aa thlak nak ding zeihmanh a um lo. Sihmanhsehlaw, thil kha tluang tein kal seh ti mi siaherhnak a ngei i a ti khawh tawk aa zuam. Khrihfa kan sinak ah hibantuk thil hmuh thiam hi a herh ngaingai mi asi. Christmas hna, bawipa thawh hna, civui hna, hawikomhnak hna kan tuah tikah, thil herh bau mi tete kan hmuh, kan theih tikah zeihmanh a saing lo bantuk in kan um sual maw? Mi cheukhat cu kan theih nain kan tuah duh lo, mi cheu cu kan thei bak lo, mi cheu cu kan theih nain an kan fial sual lai tiah a dang ah kan hrial tak! Hibantuk hna hi, an mah nih tuah hna seh, ka rian si lo kan ti sual maw? Hi bantuk thil hmuh thiam long si lo in, volunteer in a tuah tu zong kan si awk ah a herh ngaingai mi asi.

2. Jesuh nih cun, ka nu, cucu tuah, khakha tuah, tiah na ka ti awk a si ttung lo, tiah a ti nain, Marry cu a dai hlei lo, sinmu pawl sin ah, an chimmi hna paoh kha tuah te u, a va ti rih thiamthiam. Sinum pawl zong cu zeitindah nawl a va pek thiam rih hna, mikhual sawm mi sawsawh pei a si ko cu! Ka hawi pakhat airport immigration ah harnak a ton lio ah, heh tiah phone ka chawnh, ka hawi le ka theih mi upa pawl, cun lawyer pawl hna zong phone hna ka chawn hna, a si khawh chungin ka colcangh lio ah, mi pakhat nih hihi, nang he zeidah aa siang tiah a ka ti. Sinain, ka dai hlei lo, ka tuah thiamthiam ko. Khrihfa nun cu Jesuh zulh, a kan cawnpiak mi zulh kha asi. Khrihfa nun cu kan thih tiang kan nun pi ding mi asi. Cucaah, Pathian rian ah hin i dinh le pension ti hi a um lo.

3. Marry nih hi vial te thil a can tikah, keimah thawngin asi ti mi, keimah nih Jesuh ka va chim caah asi ti mi, mah thangthat duhnak aa kawl lo. Tlam a tlin hnu ah cun aa thlak ti lo. Minthannak aa kawl lo. Thil pakhatkhat kan tuah khawh tikah, kan mah thawng hna in thil a rak cang tikah, minih an kan thei sual lai lo ti hi kan phang ngaingai ton. Hruaitu upa sinak ah minthang duh nak hi tukforhnak ngan taktak mi pakhat cu asi. Thil kan tuah mi mi nih theih hnaseh ti kan duh, kan private tangka kan hman mi hna kha cu zah dakaw, keimah tangka bak ka hman cu tiah kan hei chim hna. Kan thil tuah khawh nak hna kan langh ter. Cu tik ah, kan tuah kan ttuan len ko nain thluachuah kan hmuh ding tluk kha kan hmu kho ti lo. Mah pumpak min than duh nak hi kawl hrimhrim hlah uh sih. A can a zat tikah mi nih an thei te ko lai. An thei lo zong ah a poi hlei lo, zeicahtiah kan nih kan kawl mi cu hi vawlei minthannak asi lo.

Pastor Hniang Uk

Ka pa ka lawmh ter maw?

Phungthlukbia- 23: 25, “Nangmah an hringtu cu lawm tein um seh”

Ka pa hi Hmawngtlang khua in Ciainn khua a rak i țhial lio ah, Ciainn cu a lin tuk caah, a fa le cu chunnitlak an țap. An zun chuak, an ek chuak zong ah Hmawngthlang i kan inn long ah zun kan duh, ek kan duh tiah chunnitlak an țah hnawh i, ka pa nih cun a celh ti ve lo caah, “Hmawngtlang lei ah ka kir pi țhan ko hna lai” a ti, tiah ka nu nih a ka chim bal mi te ka philh kho bak lo. A ngaingai ah cun, Hmawngtlang in a rak chuah pi lio hna ah hin zantim ah, a thli tein inn le lo vial te kal tak in, pasal kaa thawh ve cang tiah a chuah tak cang mi kha, a fa le an țah aw a theih a zoh hna tikah a celh ti lo, ka kir țhan ah cun mi nih an ka nih sawh lai ti zong a thei ko nabu in, a fa le a dawt tuk hna ruang ah ‘ka kir pi țhan ko hna lai’ a ti bak! Cucu pa le dawtnak tahchunhnak pakhat te ka rak langh ter mi a si. Fa le zawn ruah nak ah cun, mi nih an ka nih sawh lai, an ka zawmhtlaih lai ti mi zong a tuak ti lo. Ka pa cu ka caah Hero bak a si!

Pa le an sunlawinak kong cu hmurkaa in chim khawh le chim cawk zong a si lo. Ho sin hmanh in kan hmuhkhawh lo mi dawtnakvel kha anmah sin in kan hmuh. Zeitikhmanh ah, ‘ka fa le sinin ka ngah ţhan te lai, a ka cham ţhan te lai’ ti mi ruahnak in a kan zoh khenh bal lo. A tianghlim taktak mi dawtnak in a kan daw tu an si. Asinain, hinak in thuk deuh le sangdeuh in a kan daw kho tu le a kan daw pengtu Pathian a um ti mi hi philh hrimhrim ve hlah uh sih. Zeicahtiah, Isaiah- 49: 15, “Nu nih a fa a philh hnga maw? Daw loin a um kho hnga maw? Nu nihcun a philh hmanh a philh ko hnga, sihmanhsehlaw kei nihcun kan philh hna lo” a ti. Kan philh hna lo a kan titu hi, a sawhsawh a si lo. Van le vawlei zeizong vialte a sertu asi. Zeizong a hngal i khuazei ka hmun poh ah a ummi a si. Pa le hna upatnak caan kan phak caan poah ah zeitik hmanh ah a kan philhlo tu Bawipa a dawtnak ruat țhan ve usih.

Hringtu pa le hna ni (Fathers’ Day) ah hin kan pa le upat kan pek hna cu kan mithmuh Pathian an si caah a si. Pa le hna kan dawt hna le upat kan pek hna cu sertu Pathian upat kan pek le kan dawt a si. Kan mit hmuhmi kan pa le hmanh kan dawt khawh hna lo ahcun mit hmuh lo Pathian cu kan daw taktak kho hnga maw? Ka pa ka dawt ah cun zeitindah ka um lai? Kuli hlawh le tangka kuat le hei cawm long hi asi rih lo. Hi nak pinlei pi ah siter a kan duh mi a um rih.

Bible nih “nangmah an hringtu cu lawm tein um seh” a ti. Cucaah, a ka hringtu ka pa ka lawmhter asiahcun Pathian zong aa lawm ve ti nak asi. Zudin, sa ei, duhpoh in tlawng leng le hmuitinh mi ngei lo in um sawh, vakvai sawh nak nih ka pa a lawmh ter hnga maw? A kan hringtu kan pa le cu zeitindah kan lawmh ter lai? ‘Nifatin ka tuahser mi pawl hi ka pa aa lawm hnga maw’, ti hi ruat lengmang hna uhsih law, nihin pa le ni longah si lo in nifatin kan nunnak ah pa le a lawmh tertu, Pathian a lawmhter tu nun kan ngei khawh nak hnga Pathian nih thluachuah rak kan pe hram cio ko seh!

Pastor Hniang Uk

Manila, Philippines

Khuaruah harnak kan uar tuk sual maw?

Mathai 16:4 “Khuaruahharnak tuah nan ka fial, sihmanhsehlaw ka tuah lai lo”

2008 hrawng ah Philippines TV channel 9 in (mon-fri tiang) 9am ah Benny Hinn Ministry ti mi ara i ka zoh ton. Khuaruahhar in mi a dam ter hna, hnachet mi an thei khawh, a zengmi an kal kho, tehte khan mi zong an tam ngaingai.

Kan bible chung i khuaruah harnak (miracles) atam deuh pawl cu harnak ton hmasa hnu ah hmu mi deuh long te an si. Tahchunhnak ah, Israel mi pawl cu khuaruahhar ngai in rili sen an tan hlan ah kum 400 chung Egypt sal an tuan hmasa, khuaruahhar lungchung in ti a chuah hlan ah thideng in an ti hal hmasa, dar rul tar mi zoh ah cun khuaruahhar ngai in damnak an hmu hlan ah rul nih a cuk hna i ni tam non pi an tuar hmasa, mitcaw mi khua an hmu hlan ah kumtam non pi an mitcaw hmasa, kut le ke zeng mi an kal kho hlan ah kum tam non pi kal kho lo in an tuar hmasa.

Cucaah, minthang Andrew Womack nih cun (if we are after miracles to miracles, it means crisis to crisis or suffering to suffering) khuaruah harnak long te kan kawl, kan uar ah cun harnak, tuarnak kha kan kawl mi he aa lo ee a ti. Henry B. Blackaby nih cun, hmelhchunhnak caah khuaruah harnak thil hi kan hal lengmang ah cun zumhnak ngei lo lei tu khi a sawh deuh ee, a ti ve.

Cu bantuk khuaruah harnak longlong kan ti asi ah cun, kan zumhnak hna kha khuaruah harnak ah khan a um lai i , a tuah tu a minung cung ah khan zong a um sual lai ti hi phan a um ngaingai. Khuaruahhar thil tuah nak hi a herh lo ka ti mi si lo, ka doh mi zong si lo. Keimah ka nunnak hrim zong ah khuaruah harnak tam pi ka ton ve i, Pathian min ka țhangthat. Cun, Jesuh hrimhrim nih a rak tuah mi le a rak dam ter mi hna an si. Sihmanhsehlaw, khuaruahharnak tuah longlong kha an kawl cang i , an fial cang tik ah Jesuh nih “Khuaruahharnak tuah nan ka fial, sihmanhsehlaw ka tuah lai lo”(Mat. 16:4) a ti nak hna kha a si. Hihi kan theih a herh ngaingai mi a si. Nihin vawlei cungah khuaruahhar in mi a dam ter tu hna Pathian mi hman tampi an um ko. Khi pawl i an minung cung ah kan zumh nak kha i bunh hlah seh, khuaruah har an tuah khawh mi cungah khan doi hlah uh sih, khuaruah harnak hi uar tuk hlah uh sih. Pathian tu kha țhangthat uh sih.

Angaingai ah cun “khuaruah harnak” ti mi cu Pathian nawl kan ngeih lo ruang i kan tuar mi chung in a kan chanhnak ah kan hmuh mi “khuaruah harnak” nak in, Pathian nawl kan ngeih ruangah kan nun ah amah tein a rak langh ding tu kha asi. Zeihmanh tuar hmasa lo in, Pathian nawl zulh ruangah ngah mi le hmuh mi ‘khuaruahharnak’ a um ve. Kawl le uar ciammam zong a hau lo mi asi. Kan zumhnak a nun peng khawh nak hnga “khuaruah harnak thil” hi kan herh peng ah cun, cu zumhnak cu a derthawmmi zumhnak asi. Asinain, khatlei in, ‘every day is miracle’ ti mi Pathian thangthat zumhnak kha kan nun pi awk zong kan philh lo awk asi.

Pastor Hniang Uk

Manila, Philippines

Pathian thil pek ning

Deu. 1:21 “zohhmanh, Bawipa nan Pathian nih ram cu nan hmai ah a chiah cang; hung kal u law, hung co u”

Pathian nih hin zei thil poh, kan herh mi poh a tuah khawh dih ko, a kan pek kho ko. A kan pek dan belte hi kan ruah nak he aa lo lo can a tam ngaingai. Biakam hlun chung in a kan cawn piak mi hi fiang tein kan hmuh a herh ngaingai.

Kanan ram cu Pathian nih Israel mi pawl an pupa hna chan in ‘kan pek hna lai’ tiah a rak kamh cang mi hna asi. Cun, Deu. 1:21 zong ah “ zohhmanh, Bawipa nan Pathian nih ram cu nan hmai ah a chiah cang; hung kal u law, hung co u, Bawipa nan pupa hna Pathian nih an chimh hna bang khan; tih hlah uh, nan lung zong dong hlah uh” tiah a ti hna. ‘Nan hmai ah a chiah cang, hung kal u law, hung co u’ ti mi ning in cun zeihmanh ral doh zong hau ti lo, inn le lo he, satil he a ciasa in a um ding mi khi a lo. A ngaingai ah cun an ral pawl hmanh hi an mah nak in an thawng, an sang i an ngan deuh (Nam. 13:28). An tih ning hi a mak! Mitam deuh cu Egypt lei kir hmanh kha an ngamh deuh (Nam. 14:4). Asinain, hika chung in Pathian nih cawnpiak a duh mi hna cu: nan ka bochan lai, minung lei in kan tei hna lai lo nan ti mi chungah khan teinak kan pek hna lai, nan mah hrimhrim nih nan colcangh lai, nan doh ve hrim lai (a ciasa (packing tuah cia mi) si lai lo). Khuaruah har ngai in Jericho vanpang a cim nak hnga ding caah cun Jericho khua pi kha voi 7 an hel tahmasa a hau ve. Khuapi pakhat voi 7 hel ding cu a fawi ve bak lai lo dah! Cucaah, Pathian nih ‘kan pek cang hna’ a ti mi kamhmi ram hi an mah hrimhrim nih va doh i, cu chung tu ah cun Pathian pek mi țhawnnak le khuaruahhar nak tu kha an hmuh ding mi cu asi.

Pathian sinah kan hal mi pawl hi kan mah i tel duh lo in, packing te he a ciasa in hmuh kan i timh ah cun kan ngah lai lo. Camipuai on nak dingah thla long cam i, ca zoh lo kha cu teinak hmuhnak, onnak a si hlei lo. Degree lak ka duh! Kaa zuam lo i ka ca hna ka tuah ve bak lo ah cun ka la kho ve hlei lai lo. ‘zeiruang ah dah ka hal mi ka ngah hnga lo, thla ka cam tuk ko nain’ ti mi bia hi ka thei ton. Nihin canah kan hal mi le kan tuah sernak kha zoh țhan hna uh sih, zei dah ka chambau nak um ti mi kha i check țhan hna uh sih. Kan hal mi le thla kan cam chih mi he aa kaih in kan colcangh le kan nun a hau ve.

Cucaah, Pathian nih kan hal mi pawl le thil țha vial te hi a kan pek khawh dih ko, asinain, kan mah lei zong in kan thinlung, kan ziaza, kan nuncan, kan tuahsernak le kan zumhnak hna zoh in pek kan si caah, Pathian thil pek ning cang hi theih uh sih law, nifatin kan nunnak ah a thluachuah phuntling a co mi kan si nak hnga Bawipa nih thluachuah rak kan pe cio ko seh!

Pahniang

Manila, Philippines

Jesuh fuh duh nak hmun

Luka 24:15 “Jesuh hrimhrim nih khan a hei fuh hna i an sinah cun a kal ve”

Laimi hi capo seih cu kan hmang bak. Ram dang kan phan zongah hawi le kom hna he a bu piin kan ni ton hna si cun capo seih rumro asi ko. Sau non pi tiang kan thu hna i capo kan seih mi kha ramdang mi nih an kan hmuh tikah an khuaruah zong a har pah ngaingai. A bu pipi in bia i ruah, pakhatkhat hna i ceih ţi hi a ţha ngaingai mi si, idea ţha zong a chuak. Hibantuk a bupi in bia i ruah kan hman mi ah hin kan i ceih mi (topic) hi Pathian kong lei deuh ah thlen uh sih law zeitlukin dah a ţhat lai ti hi ka ruat ton.

Luka 24:13-35 hi Jesuh thawhţhan kaa hrawng i Kleopas le a hawi nih Emmaus khua lei an kal cuahmah lio ah Jesuh kong bia an i ruah mi le Jesuh cu an sinah a rak langhnak kong asi. Luka 24:15 “Cu ti i bia an i ruah lengmang i an i ceih lengmang lioah cun Jesuh hrimhrim nih khan a hei fuh hna i an sinah cun a kal ve” a ti. Hinih hin a langhter mi cu, hawi le kom he bia kan i ruah lio i Jesuh kong kan i ceih asiahcun, Jesuh nih cu a um kho ve ti lo i, a rak kan fuh ve lai. A kong kan ceih, a Bia kan i ruah tikah a rak kan fuh ve ti cu a fiang ngaingai. Cucaah Jesuh fuh duh nak hmun cu: Amah kong i ceihnak, A Bia i ruahnak, Amah thangţhat nak hmun hna kha an si. Cun, Luka 24:27 ah “amah kong aa ṭialmi vialte kha fiang tein a chimh hna” a ti. Cu ve bantukin Amah kong le a Bia kan i ceih tikah kan theih khawh lo mi zong Thlarau Thianhlim in a kan fian ve lai.

Khrihfa asi mi nih biakinn chung chim lo in; a lengah, kan hoi le he kan i tonnak ah, lam kan kal ţi nak ah zei kong dah kan i ceihbik ton? Kleopas le a hawipa hi Emmaus khua lei an kal cuahmah lio lampi cung i Jesuh kong bia an i ruah mi asi. Kan nih teh, capo long maw kan seih peng rih ko lai? Kan um nak, kan biachim mi le ruah mi hna hi Jesuh nih fuh duhnak hmun a si maw? Jesuh kong kan i ceih i a bia kan i ruah ah cun kan sin ah a kan fuh colh hlei ah, kan fian lo mi hna zong Thlarau ThiangHlim in a kan fian ter lai.

Kan inn, kan lo, kan rian tuan nak, kan sianginn kai nak, kan um kal nak hna hi Jesuh fuh duh mi hmunhma ah ser hna uh sih.

PaHniang

Manila, Philippines

Pathian kamh mi chung ah

Lam. 27:22, 24 “Pakhat hmanh kan thi lai lo,…… Pathian nih amah ṭhatnak thawngin nangmah sinah a kalmi vialte an nunnak hi nangmah kha an pek,’ a ka ti.”

Lam. 27:31 “hi lawng cung i nan um peng lo ahcun nan nung lai lo,” tiah a ti hna

Kan laimi upa pakhat, ralkap pawl nih tlaih an timh i Yangon lei ah a tli. Bawi pawl he aa thei mi a si tikah bawi pawl cu a va leng hna. An leh mi cu, “Yangon ah hin um peng, Yangon na um chung poh cu tawin kan lak khawh, Yangon na um lo belte ah cun tawin kan la kho lai lo” a ti, ti asi. Ri khiah piak mi area chung ah a um paoh ah cun tawin lak ding kha asi.

Lamkaltu 27:13-44 hi kan zoh ah cun, tilet tho nak kong asi. Tilet cu ni 15 hrawng a tho ciammam i kan thi lai maw kan nung lai an ti lio ah, Paul nih cun, Pathian sinin bia a ra, pakhat hmanh kan thi lai lo, a ti hna. Pathian sinin a ra mi bia, “pakhat hmanh nan thi lai lo” ti hi zoh ah cun zeitipaoh in um poh ah thih lo ding khi a lo. Asinain, Lam. 27:31 ah “hi lawng cung i nan um peng lo ahcun nan nung lai lo” a ti than hna. Hi nih hin a langh ter mi cu, Pathian bia kam nak hi zeitluk hmanh in um ko seh law, minung lei in (response) lehnak, zulhnak tawin te hi a rak um peng ve. Pathian nih a kan dawt tuk caah a Fapa ngeihchunh te cu a kan pek, cu a Fapa chungah cun zungzal nunnak le a biakam nak hna tam pi a um. Sihmanhsehlaw, zumhnak le Fapa zulhnak a um lo ah cun ngah a si ve hlei lai lo.

Cucaah, nihin ah Pathian nih a kan kamh cia mi zungzal nunnak, thluachuahnak, kilvennak, zohkhenhnak, tawin laknak tibantuk kha a um cang, cucu Khrih chungah, a Bia chungah khan asi. Cu chungah kan um lo i, cu chungin kan zam tak a si ah cun, amah sinin a ra mi thluachuahnak, kilvennak, zohkhenhnak, tawin laknak hna kha kan hmu ve lai lo. Nihin i Pathian kamh mi chung ah kan ti mi cu lawng cung le hmunhma le ramri ban tuk asi lo. Khrih chung le a Bia chung tu ah khan asi. Paul sin i a ra mi ‘pakhat hmanh nan thi lai lo’ ti mi biakamnak um hmanh sehlaw, ‘lawng cung i nan um peng lo ah cun nan nung lai lo’ a ti than ban tukin, zungzal nunnak le thluachuah phuntling cu rak kan kamh hmanhsehlaw, Khrih chung ah kan um lo ah cun kan thi thiamthiam ko lai.

Pathian kamh piak mi zungzal nunnak le thluachuah phuntling kan co nak hnga, Khrih chung ah a um peng mi zumtu nusal țha, pasal țha kan si cio nak lai Pathian nih thluachuah kan pe cio ko seh!

Pahniang

Manila, Philippines