Thawhţhan nun

Rom 6:13 “Thihnak in nunnak ah thawhter ṭhanmi bantukin Pathian sin tu ah i pe u law dinnak tuahnak ding caah nan pum cu a ningpi in Pathian cu pe ko u”

Thawhţhannak hi khrihfa kan si nak i kan hram pi cu a si. Thawhţhannak nih lawmhnak, daihnak, hngangamnak le ruahchannak a kan pek. Jesuh a Thawhţhannak nak thawng in zultu, zumtu pawl lawmhnak, daihnak, hngangamnak le ruahchannak kan hmu.

Thawhţhan nun kan ti tikah a pakhatnak ah a herh bik mi cu “thih hmasa a herh” ti hi asi. Thih hmasa loin thawh ţhan ti mi hi a um lo. Cucaah, kan nun hlun kan thih ter lai, pumsa duh nak kan thih ter lai. A thi mi nih cun siduhnak a ngeih mi a um ti lo. A thothan mi nun tu nih khan nawl a ngeih ding a si cang. Hi kong hi Rom 6:6-14 chungah in a fiang ngaingai. “Kan minung hlun cu Khrih he vailam cungah thah a si cang ti kha kan hngalh. A sualmi kan minung hlun cu zeicahdah thah a si ti ahcun, sualnak sal kan si tinak hnga lo caah a si. Cucu zeitindah a si ti ahcun minung cu a thih tikah cun sual ṭhawnnak chung khan a luat. Kannih cu Khrih he kan thih ṭi cang ahcun, amah he kan nung ṭi lai ti zong kha kan zumh. Zeicahtiah Khrih cu thihnak in thawhter a si cang i a thi ti lai lo ti kha kan hngalh — thihnak nih a cungah nawl ngeihnak zeihmanh a ngei ti lo. A inmi thihnak cu voi khat ah za lakin sualnak ruang i a thih kha a si; cun atu i a nunmi nunnak cu Pathian ca nunnak a si. Cu bantukin nannih zong nih, kannih cu sualnak ah kan thi cang i asinain Khrih Jesuh he i pehtlaihnak thawngin Pathian ah kan nung tiah nan i ruah awk a si. Cucaah thih a hmangmi nan pum kha sualnak nih uk ti hlah seh law, pumsa duhnak kha in zulhter ti hna hlah seh. Cun nan pum a zeihmanh kha thil ṭhalo tuahnak ding caah sualnak kha pe ti hlah u. Thihnak in nunnak ah thawhter ṭhanmi bantukin Pathian sin tu ah i pe u law dinnak tuahnak ding caah nan pum cu a ningpi in Pathian cu pe ko u. Sualnak nih cun in uk hrimhrim ti hna hlah seh, zeicahtiah nawlbia tangah nan um ti ṭung lo, Pathian vel tangah pei nan um cang cu.

Thawhthan nun he pehtlai in tlawmpal langhter ka duh mi:

1. Pathian kha zeizong vialte nak in a dawt lai i pakhatnak ah a chiah peng lai (Luka 14:26-27)

2. Mah zawn long ruah nak kha a ngol lai. (Luka 9:23)

3. Jesuh cawnpiaknak a zulh lai. (Johan 8:31)

4. A minung hoi a dawt lai, zawn a ruat lai. (Johan 15:12-17)

5. Pathian lungtlinnak le Khrih chungah um kha aa zuam peng lai. (Gal. 1:8; Johan 15:7; Sam 40:8)

6. Sualnak kha asi khawh chung hrial khawh aa zuam peng lai. (Titas 2:11-12)

7. Pathian le a Bia kha ti hal in a hal peng lai. (Sam 42:1-2)

Khrihfa nun hi fawituk ah kan tuah ton, azeipoh in nun a ngah ko bantukah kan tuah, ţha pah te ko lai kan ti. Cu tikah Thlarau lei kan ţhang bal ti lo, zumhnak lei ah kan zawr deuh chinchin. Kan nun ah ţihphannak in a khat. Thawhţhanzing i Jesuh nih a kan chiah ta mi, “nan cungah daihnak um ko seh” a ti mi zong kan nun ah a um kho ti lo! A cung lei pawl hi zoh ţhan uhsih law thawhţhan nun chung ah kar a hlang mi kan si hnga hnga Pathian nih thlua kan chuah ko seh

PaHniang

Manila, Philippines

/////////////////////////////

Thawhţhan vel ngeih nak

Mark 16:6-7 “Sihmanhsehlaw hika ah hin a um ti lo — a tho cang!.......Cucaah cun va kal u law a zultu hna kha le Peter kha,……. va chim hna u,”

Mathai 26:33 ah Peter nih khan Jesuh cu a hun thawh i, “Midang vialte nih in zamtak hna hmanh seh law, kei cu kan zamtak bal lai lo,” tiah a ti. Jesuh nih Peter cu “hihi va philh hlah: Tuzan i ar a khuan hlan ah amah cu ka hngal lo, tiah voi thum na ka ti lai,” tiah a ti. Mahtluk, i zumh ngai, i seihchiah ngai in a chim mi nih cun Mathai 26:69-75 ahcun, Jesuh nih a chim chung bang khan, “amah cu ka thei lo” tiah voi thum tiang a hlawt ko! Peter cu aa ngai chih ţhan i a ţap thluahmah (Luke 22:62)

Sihmanhsehlaw, Jesuh a thawh ţhan tikah min char bak in a hlam hmasa bik mi cu Peter kha asi. Jesuh nih “an ka tlaih lio i voi thum tiang a ka hlawt mi cu ‘um cang ko seh’” a ti hrimhrim lo. Mark 16:7, Cucaah cun va kal u law a zultu hna kha le Peter kha, ‘Amah nih an chimh hna bantuk te khan nan hlanah Galilee ah a kal i cuka ah cun nan va hmuh lai,’ a ti tiah va chim hna u,” tiah a ti. Hihi thawhţhan vel ngeih nak cu asi. Peter cu Jesuh sin a panh ţhan hnu ah cun a tlau ti lo, a donghnak ah cun thih ngamh sasawh hmanh si ti lo in, “Jesuh bantuk in thih awk kai tlak lo, ka bihtaling in rak ka thah uh” ti tiangin a ti ngam cang!

Nihin ah Jesuh cu kan ka(holh) in ‘ka thei lo’ tiah cun kan ti lai lo nain, kan um tu, kan ziaza, kan tuahsernak in Jesuh hi kan hlawt theu ton ko lo maw! Nihin ah Peter a ţhanghter tu ar khuang aw cu thei ve cang hna uh sih law, i ngeihchihnak he Jesuh sinah panh hna uh sih.

Nihin Jesuh thawh ţhan nak Easter Sunday ah, hawi dawt, Jesuh nih na min char bak in an hlam ve. “Hniang Uk kha va chim uh, ka tho ţhan cang, rak ka tong seh, ka sinah rak kir seh” tiah thawhţhan vel ngeihnak aw ka theih. Nang na thei ve maw? Nihin ah na min nai theih ve a hau cang. “min an au tikah kei zong ka um ve lai” tiah hla kan sa ton mi hi nihin ah kan i fiang ahau i, kan theih zong a hau mi si cang. Nihin ah na min auh nak aw cu theih law Jesuh sinah rak kir cang tuah! Nihin ah nangmah theng te na min char bak in an hlam ve.Hla pakhat ka lung ah a chuak ngai rih mi:

- Nem tein an auh, thinfual in an nawl, tuukhal ţha an auh nak kha ngai tuah

- Nem tein an auh, thinfual in an nawl, dawtnak in “Ka sin ra tuah” an ti

Thawhţhan vel ngeih nak, Jesuh hlam nak aw a thei mi le, Jesuh sinah panh in zeitikhmanh ah a tlau ti lo mi kan si cio nak hnga kan dih lak cungah Pathian thluachuah velngeihnak um ko seh!

PaHniang

Manila, Philippines

///////////////////////////

Jesuh he i peh nun

John 15:4 “Keimah ah hin i peh u law kei zong nanmah he kaa peh ve lai”

Jesuh cu Palestine ram ah a rak chuak caah Palestine mi hna nih an hmu ton mi, an theih khawh ding mi le an theih fawi ding mi tahchunhnak tete in a cawn piak ton hna. Mitsur ruang cu kei mah hi ka si, a ti tikah, cu ka mi hna nih cun mitsur dum a tuah mi le mitsur hang cu tihang ban tuk in a hmang mi long te an si caah an theih khawh colh. Kei cu mitsur ruang zong ka hmu bal rih lo nihin tiang. Jesuh hi kan khua ah hin rak chuak sehlaw cu tahchunhnak a chim mi hna hi aa dang deuh ve ko hnga. Kan theih khawh colh ding mi le kan hmuh ton mi hna in tahchunh nak a lak ve ko lai.

Jesuh nih “Mitsur ruang cu keimah hi ka si….. keimah ah hin i peh uh…..; zeicahtiah keimah loin nan tuah khawhmi zeihmanh a um lo” a ti mi ahhin ka lungah a chuak ve ngaingai mi cu: thingkeppar (သစ္ခြပန္း- orchid)hi a si. Thingkeppar cu kan khua ah a tam ngaingai. Kan inn zong ah ka u le nih kan dum chung i thingkung cung ah an peh ton ve.

Thingkeppar(သစ္ခြပန္း-orchid)—cu thingkung ah aa peh (aa kepchih) lawnglawng ah a nung i a par ve. Cucaah thingkep par tiah an auh si lai tiah ka ruah. Thingkung bochan longin a nung mi si. Amah longtein vawlei ah va chiah ah cun a ro, a car i a thi colh ko. Cu ve bantukin kan nih zumtu hna zong Khrih ah kan i peh longlongah hin Thlarau lei ah kan nung lai, kan ţhang lai, kan par lai i kan thei a tlai ding mi kan si. Kei mah lo in nan tuah khawh mi thil zeihmanh a um lo, akan ti ban tuk in, Jesuh ah peh peng ding kha thingkep par nih hin a kan cawn piak ve. John. 15:4-5. Nifatin Khrih ah aa peh lo mi nun cu Thlarau lei ah a ro, a car lai i a thi ko lai.

Cucaah, nifatin Jesuh kan herh, biaruah peng kan herh, pehtlaih peng, i pehpeng kan herh. Zeicaah tiah, Amah lo in kan tuah khawh mi zeihmanh a um loh. Zum lo tu pawl thil an tuah kho ngai ko ţung kan ti men hnga, asinain, cu pawl hna cu:

1. -Thlarau lei ah rel piak an si lai lo (minung lei zoh nak long si)

2. -Sertu Pathian an thei lo, kan nun hi Pathian kut ah a um ti an thei lo, Pathian nih nun a zuah rih mi hna an thei lo caah, ka tuah khawh, ka ti khawh, ka nung kho tiah an i ruah.

Jesuh he i peh nun um lo in kan tuah mi thil vial te cu Thlarau lei ah rel piak zong a si lai lo. Amah cu kan nunnak asi, kan hrampi asi. Cucaah Paul nih “kei caah nun cu Khrih a si” a ti nak kha si. Thingkeppar i a nun khawhnak, a thazang le a par khawh nak cu aa hngatchan mi thingkung in ngah mi a si bantuk in, kan nih khrihfa zumtu hna zong kan nunnak, kan thazang, kan tuahser mi le kan hmurka nih a chim mi vial te hi Khrih sin in a ra mi le a sunparnak a langhtertu a si khawh nak hnga nifatin kan nunnak ah Khrih ah i peh peng hna uh sih.

Pathian nih thluachuah in pe ko hna seh!

Pastor Hniang Uk

Manila, Philippines

Tei tu dir hmun

Johan 16:33 “Vawlei cu ka tei cang”

1961 Jan. 17 ah Cia-inn (ၾကာအင္း) khua cu Pu Ni Dun (Hmawngtlang) hruainak in tlak mi khua a si. Tukum hi kum 50 tlin nak jubilee zong tuah a si cang. Kan khua pongah hin tibual a rak tam ngaingai i, cu tibual ah cun ciapan (ၾကာပန္း, lotus, water-lily) longte an si. Khua an rak tlak ka ah hin kan khua pong Thauhcianh khua (kawl mi) i upa hna nih, “nan khua pongah cia-pan (ၾကာပန္း) in a khat mi tibual an tam ngai caah, nan khua min hi cia-inn (ၾကာအင္း) ti maw nan duh deuh, cia-pan (ၾကာပန္း)” tiah an rak hal hna. Kan pa le nih cia-inn (ၾကာအင္း) kan duh deuh an rak ti caah kan khua min cu cia-inn (ၾကာအင္း) tiah sak a rak si. Ka hngakchia lio ah hin kei zong tibual cung i cia-pan (ၾကာပန္း) cu ka rak hmuh ton ve.

“Hla phuahtu pa nih sermi thil vialte hna hi Pathian lamkaltu an si dih” a ti bangin, hi cia-pan (ၾကာပန္း) nih hin ka thinlung ah a ka hmuh ter ngaingai mi cu: Cia-pan (ၾကာပန္း) cu ti a cung te ah a um peng, ti a ţum zong ah a kai zong ah, zeiban tuk a si zong ah ti a cung te ah aum peng. Cuveban tukin, kan nih khrihfami hna zong zeiban tuk thil kan ton poh ah, lungretheihnak, harnak, lomhnak, tbt.. kan ton tik ah a cung te ah um peng ding kha Jesuh nih a kan timh piak mi kan si. Jesuh nih a kan teipiak cang i teitu dir hmun a cung te ah um peng ding kha a kan duh piak mi kan si. Hi vawlei ah harnak kan ton ding hi Jesuh nih a theih ko, cucaah Johan 16:33 ah “vawlei nih harnak an pek hna lai” a ti. Sihmanhsehlaw ţih hlah uh vawlei cu ka tei cang a ti ţhan. Jesuh nih a tei cia mi cung te ah khan a um peng ding cu kan si. Vawlei cung sualnak le vawlei thli hran ruang ah hin ti chungah a pil ding kan si lo. Jesuh tei nak kha aa hrawm mi kan si, teitu dir hmun cu a cung ah a si peng.

Zumhnak in Khrih he pehtlaihnak tling kan ngei i, Thlarau Thianghlim nih nun thian nak lei ah a kan hruai cuahmah lio ah tukforhnak, hneksaknak, harnak aphunphun le lawmhnak tampi kan tong lai. Zeibantuk thil kan ton poh ah teitu asi mi Khrih chung ah hnget tein a dir kho pengmi zumtu kan si khawh cio nak hnga Pathian nih thluachuah rak kan pe hram ko seh!

Pastor Hniang Uk

Pathian Mithmai zoh nun

Sam. 5:3 “Zinglei ah ka aw kha na ka theihpiak: nichuak kate ah na sinah thla ka cam tawn i na ka lehnak kha ka hngah tawn”

Nihoipar(Sun-flower –Neciapan) hi zingka tein ni achuahnak lei a hoi peng i nitlak tiang, cu caah kannih lai in cun nihoipar ti a si.

1996 kum, thal ah ka pa he kan khua (Cia-inn) ah Nihoipar (sun-flower—Neciapan) dum kan tuah. Kan dum cu a ţha tuk lem lo. Pakhat pahnih a ţha mi te ka zoh tikah: zingka tein cun nichuah lei bak ah khin an hoi an cuanh dih. Par dang nak in aa dawh khun nak cu ‘aa rual tein nichuah lei ah an hoi dih’ nak hi a si.

Kan nunnak ah khuadei ka in Pathian mithmai zoh te in kan nun ah cun kannun hi duh a nung mi nun, hawidang nak in aa dawh deuh mi nun kan ngei lai ti hi hi par nih a kan cawn piak. Ka hoi pa saya Sum nih “nangmah ni zakhat na tuah tuan mi nak cun, Pathian nih minit pakhat a tuah mi kha santlai ţhahnem deuh a si lai, cucaah zingka na thawh kaa ah hin zeitluk na ca a tam, tuah ţuan ding tam na ngei zongah Pathian sin khukbil thlacam i amah he bia i ruah hmasa hi cu philh hrim hla” a ka ti. A hman ngaingai ka ti! Pathian nih hin kan thazang, kan fimnak, kan thiam nak le thil kan tuah khawh nak hi a herh mi si lo. Kan thinlung kan pek mi le amah mithmai kan zoh hmasa mi tu kha a duh mi si, cu hnu ah kan tlam a tling lai, kan hlawh a tling lai. Nihin ah Pathian rian kan tuan kan ti nak ah Amah Pathian he bia i ruah, thlacam can pek hna hi kan philh kan huam lo can hna a um kho men. Zeitluk kan rian a tam zong ah Pathian mithmai zoh hmasa, kawl hmasa, chawnh hmasa hi i zuam hna uh sih! Devotion kan tuah mi zong hi i hnawh hlah uh sih. Zingka tein thlacam hi dai thlang hlah uh sih!

David Siangpahrang nih cun, “Zinglei ah ka aw kha na ka theihpiak: nichuak kate ah na sinah thla ka cam tawn i na ka lehnak kha ka hngah tawn” a ti. Kan nih teh amah ban tuk in Pathian kan duh maw, kan kawl maw, Amithmai kan zoh hmasa maw, kan hngak maw?

Jesuh nih ‘a ngan bik si a duh mi nih cun a hme bik kha a tuah lai’ a ti. Cun zultu hna i ke zong amah bak nih a ţawl piak hna (John 13:1-17). Nihoipar cu a thei fang a ţha deuhdeuh si le tang ah a kun deuhdeuh ve. Hinih hin kan rum deuh, kan fim deuh, kan ţhat deuhdeuh ahcun mi taang ah i dor ding Khrihfa nun kha a kan cawn piak. Pathian mithmai zoh nun nih cun keimah ka tuah khawh, keimah ka ti khawh ti mi hi a chim ti lo, amah ah i uahpi ding hrimhrim pakhat hmanh a hmu ti lo, zeicahtiah cun zeizong vialte kha Pathian thawng longlong in a tuah khawh mi si i Pathian min sunparnak pek ding long kha a ruah mi le a tuah mi a si cang.

Pathian mithmai zoh nun a ngei mi si hram ko uh, Bawipa nih thluachuah in pe ko hna seh!

Pastor Hniang Uk

Manila, Philippines