I Cor. 4:16 “ka zia ka cawng u tiah kan nawl hna”
Voikhat ah khrihfa upa pakhat nih rawl ulh nak ding kong, rawl ulh ţhatnak kong le thaizing rawl kan ulh hna lai tiah thawng a thanh ti si. Asinain, a thaizing ahcun a mah cu a ra lo an ti.
Voikhat ah pastor pa cu pulpit cung in dawtnak kong a chim i a thiam tuk nak ah, a nupi cu phungchim dih bak ah a ihphah tom he pulpit ah a rak ra an ti. Ziah tiah an hal tikah, “ka va pa hi pulpit ah cun a ţha tuk, pulpit longlong ah um ka duh cang, inn ţin cu ka duh ti lo a ti an ti.
Khrihfabu pakhat ah mino upa nih mino pawl kha ‘hla nan cawng lo, nan chuak lo ee, tiah a sik hna’ nain, a fa le nungak tlangval pawl zeitik hmanhah biakinn ah a rak hruai kho bal hna lo an ti!
Feb. 13, 2011 Philippine Myanmar Christian Fellowship ah ka nau pa Panun (Van Nun Thang) nih thawngţha chim ding asi i, kan hawi le he motor in kan kal ţi hna. Motor chung ah kan hoi pa pakhat nih nihin thawngţha chimtu hodah si lai ti kha theih a duh. Zeitindah a hal tiah cun, “mah hmanh tuah duh tung loin mi tuah fial tu ding hodah si lai” tiah a ti (capo pah in).
Hi kan chimh mi pawl hi capo biatak ban tuk an si i, nihin khrihfa kan si nak kha fiang tein a langh ter ngaingai caah, kan ruah awk a herh hrimhrim ko ti hi ka langhter duh mi asi.
Mahatma Gandhi sin ah nu pakhat nih ‘ka fapa hi cini thanthling rang (sugar) a ei tuk caah a ha zong rawk dih cang lai, rak ka chimhhrinh piah’ tiah a rat pi ti si. Gandhi nih zarhhnih hnu ah ra ţhan te uh a ti hna. Cun zarhhnih hnu cun an ra ţhan. Gandhi nih cun ‘ka fapa, cini ei tuk ti hlah’ tiah a ti. Nuhmei nu nih cun ‘ziah, ka fapa cini ei tuk ti hlah ti tham cu a voikhatnak kan rat ah khan na chim ko lo?’ tiah a ti. Gandhi nih a leh mi cu, “mah lio ah khan kei zong cini ka rak duh tuk i, keimah kaa phiat ta hnu long ah ka chim ngam i, ka cawnpiak ngam ee” tiah a leh.
Khrihfa kan i cawnpiak nak zong ah hin hibantuk in a si awk a si ko lo maw? Jesuh nih “ka nawl hi i cawn ve uh” a ti (Matt. 11:29) Pual zong nih “ka zia ka cawng u” a ti (I Cor. 4:16). Devotion ngeih nak ding kong kan chimh ah cun kan tuah hmasa hau; thlacamnak kong kan chim ah cun thlacam nun kan ngeih a hau; rawl ulh nak kong kan chim ah cun kan ulh pi hna hau; tlang rian kong kan chim ah cun kan i thawh ve hau; kuak zuu hlah, zuu ding hlah kan ti hna ah cun kan mah kha kan i sum (kan tuah lo) hmasa ahau.
Ahopaoh kan umnak paoh ah cawnpiaktu kan si ti mi thinlung put ngei uhsih (kan umnak paoh i saya va tuan ciammam kha ka chim duh mi si lo). Inchungkhar ah pa bik nih fale cawnpiaktu a si, fa upa nih a nau le cawnpiaktu a si, ngakchia zong nih amahnak in a hngakchia deuh mi kha cawnpiaktu a si thiamthiam. Cawnpiaktu dir hmun na si cang tik ah, na fa le na nau le nih an in zulh cang lai, zeitindah na um lai?
Nun a kan chimtu le Thlarau lei ah a kan ţhan tertu si hram ko seh!
Pastor Hniang Uk
///////////////
No comments:
Post a Comment